Read MUKANDA WANZAMBI Ezekiele 37 Bible Online

Ezekiele 37 - MUKANDA WANZAMBI bible

Ezekiele 37

¹Chikasa chaYehova chadiŋi hadami, hakuntwala muSpiritu ya Yehova, hakuntenteka mukachi kachinekineki, chenzala kwamafwaha hohu to-o.

²Hakunnyeŋu mwishaku kwi-ndo. Nami nitali, muchinekineki mudi mafwaha amavulu nankashi, adi tuhu haheni hatooka. Kuyitala asweja dehi kuuma.

³Hakuŋila nindi, Eyi mwana kamuntu, awa mafwaha akutwesha kuhanda, tahindi? Kuchinka ami nami, Eyi Mwanta Yehova, yeyi weluka.

⁴Hakuŋila cheŋi nindi, Profwetaku hamafwahawa, wuyili neyi, Enu mafwaha awuma, tiyenu izu daYehova.

⁵Mwanta Yehova nayili mafwahawa, nindi, Nakeŋija muuya mudenu, mwakahanda.

⁶Nakasha nyisunyi hadenu, nakaleta mbiji hadenu, nakayibuta ikowa, nakasha muuya mudenu, mwakahanda. Mwakeluka nenu yami Yehova.

⁷Dichi naprofweteli mwanlejeluwu. Chinadiŋi nakuprofweta hikukuswala, hikukunyinkesha, mafwaha hiyakwinza nákubulakana, ifwaha niifwaha dindi ndwa.

⁸Nami nitali, hadi wena nihadi nyisunyi, henza dehi nimbiji, hanabuti dehi niikowa. Ilaŋa muuya mudi wena mwosi.

⁹Hakuŋila nindi, Profwetaku mpepela. Eyi mwana kamuntu, profwetaku, wili mpepela neyi, Mwanta Yehova nindi, Eyi muuya, fumaku kumpepela jiwana winzi kunu, woni hadi awa ajahawu kulonda ahandi.

¹⁰Dichi hinukuprofweta mwanlejeliyi, muuya hiwukwinza mudi wena, hiyakuhanda, hiyakwimana zululu, zululu, njita yeneni nankashi.

¹¹Hakuŋila nindi, Eyi mwana kamuntu, mafwahawa diwu mutaŋa waIsarela wejima. Tiya, adi nakwila nawu, Mafwahetu oma dehi chau, chikuhwelela chetu chinayi, tunaketukili mwakanka wetu.

¹²Dichi profwetaku wuyili neyi, Mwanta Yehova nindi, Enu antu ami tiyenu, nakajikula majamu enu, nakayikandwisha mumajamu enu. Nakayifuntisha cheŋi mwituŋa daIsarela.

¹³Enu antu ami, chinakela najikuli dehi majamu enu, nayikandwisha dehi mumajamu enu, mwakeluka nenu yami Yehova.

¹⁴Nakasha Spiritu yami mudenu, mwakahanda, nakayisha mwituŋa denwenu aweni. Mwakeluka nenu munahoshami Yehova dimu munakoŋi nawa. Dimu mwanahoshiyi Yehova.

¹⁵Izu daYehova denjili cheŋi kudami,

¹⁶nindi, Eyi mwana kamuntu, nonaku mutondu wumu wusonekuhu neyi, WaYuda nawakwawu anyana kaIsarela. Wunoni nawa mutondu wukwawu, wusonekuhu neyi, WaYosefu, mutondu waEfweremi nawakwawu akwamutaŋa waIsarela.

¹⁷Wuyinuŋi hamu wumu nawukwawu wikali mutondu weyi wumu, kulonda yiikali mutondu wumu muchikasa cheyi.

¹⁸Chakukwihulawu anyana kawakwenu nawu, Hiwukutuleja mwaya yumiyuku, tahindi?

¹⁹wuyili neyi, Mwanta Yehova nindi, nakatambula mutondu waYosefu wudi muchikasa chaEfweremi nawakwawu amunyichidi yaIsarela, nakayibomba namutondu waYuda, akela mutondu wumu, akekala wumu hohu muchikasa chami.

²⁰Nyitondu oyu yiwukusoneka yikwikala muchikasa cheyi kumesu awu.

²¹Wuyili neyi, Mwanta Yehova nindi, Tiyenu, nakafumisha anyana kaIsarela munyuza mwayiluwu, nakayipompesha niniku niniku, nakayileta cheŋi mwituŋa dawu;

²²nakayibalumuna kwikala muza wumu mwituŋa, hampidi jamuIsarela; mwanta wumu diyi wakekala mwanta wawu wejima wawu. Hiyakekala cheŋi nawa nyuza yiyeduku, hiyakaambuka nawa cheŋi mawanta ayeduku.

²³Hiyakaditamisha nawa cheŋi nawakishi awu akutuŋa, hela nayuma yawu yikweti niwunyeŋu, hela nanyiloŋa yawu niwumuku. Nakayamwina chakuyifumisha mwashakamawu mwejima, mwanavulumunuwu nakayitookesha. Akekala antu ami, ami nakekala Nzambi yawu.

²⁴Kambuŋami Davidi diyi wakekala mwanta wawu. Akekala nakabiŋa kawu wumu wejima wawu. Akendaŋa muwuŋaji wami, akahembaŋa nshimbi jami nakwilamu.

²⁵Akashakamaŋa mwituŋa dinenkeli kambuŋami Yakoba, mwashakaminaŋawu ankakulula jenu. Akashakamaŋamu niwena, nianyanawu, niezukulu awu haya nyaka. Kambuŋami Davidi wakekala kalamba kawu kahaya nyaka.

²⁶Nakatiyaloŋana nawu chitiyaŋenu chakuwunda. Chakekala chitiyaŋenu chakutiyaloŋana nawu chahaya nyaka. Nakayishakamisha, nakayivulisha, nakasha malalami mukachi kawu hayanyaka.

²⁷Akekala nawa natabanaka yami. Ami nakekala Nzambi yawu, wena akekala antu ami.

²⁸Chakekala malalami mukachi kawu haya nyaka, nyuza yakeluka nawu ami Yehova yami najilikaŋa aIsarela.