Read MUKANDA WANZAMBI Ezekiele 38 Bible Online

Ezekiele 38 - MUKANDA WANZAMBI bible

Ezekiele 38

¹Izu daYehova denjili kudami,

²nindi, Eyi mwana kamuntu, talishaku mesu eyi kudi Gogi wamwituŋa daMgogi, kalamba kaRoshi naMesheki naTubali, wakaprofweti nsaŋu jakumuzuwila,

³neyi, Mwanta Yehova nindi, Eyi Gogi kalamba kaRoshi naMesheki naTubali, tiya, ami nidi neyi nandombu.

⁴Nakakufunti shamu, nakakusha malonda muchibaŋa cheyi, nakakwidishamu, ninjita yeyi yejima, atuwalu nawakwatuwalu, wowu ejima amanyeka yitwa yanjita ndo, chendu cheneni chikweti ninkebu janyanya ninkebu jeneni, wejima wawu akwatakwata mpoku jatubali;

⁵niaPeresi, niaKushi, niaPuti adi hamu nawena; wejima wawu adi nankebu nimateŋa ayikuŋu;

⁶niGomeri niyendu yindi yejima; nimutaŋa waTogarima akukabeta kakuchimunswa kakeni, niyendu yindi yonsu; yowu nyuza yawantu yayivulu yekala hamu naneyi.

⁷Diloŋeshaŋahu dehi, mwalala, kadiloŋeshi, nineyi niyendu yeyi yejima yinapompi kudeyi, eyi ikalaku kalama kawu.

⁸Chimwakahita mafuku amavulu akakuhempula. Kunyaka yakukuminina wakenza mwituŋa dafuntishawu dehi kumpoku jatubali, dapompeshawu dehi dakufumisha kunyuza yawantu yayivulu, hampidi jamuIsarela jadiŋi chinkalampata chamafuku amavulu. Ilaŋa difumisha dehi munyuza yawantu, akashakama chakadi kwakama wejima wawu.

⁹Eyi wakakanduka, wakenza neyi nvula yasweja kuzuwa, wakekala neyi ivu dinabuti hetuŋa wi-i, nineyi niyendu yeyi yejima ninyuza yawantu yayivulu hamu naneyi.

¹⁰Mwanta Yehova nindi, Dena ifuku odu mumuchima weyi mwakenza yuma, wakatoŋojoka chuma chatama.

¹¹Wakela neyi, Nukukanduka mwituŋa dikweti nyikala yakadi mpwembu. Nukuya kudi antu ashakama zo-o, ashakama chakadi kwakama, wejima wawu ashakama chakadi mpwembu, hiyakweti hela nyikomenu hela yenzeluku.

¹²Wakayipupi, wakayikwati, wakatalishi chikasa cheyi kuyinkalampata yatuŋawu dehi antu, wukabishi antu apompeshawu dehi, afumishawu dehi munyuza, aheta dehi niyimuna niyuma, ashakama hakachi keseki.

¹³ASheba naDedani nawakwakulandujola amuTarashishi, hamu nanyenzi yawu yanyituŋa, akakwila nawu, Wunenzi nakupuŋana, tahindi? Chendu cheyi chiwunapompeshi wunalondi wukwatani, tahindi? Wunalondi kusenda siliva nawuru, wakatwali yimuna nayuma, wakapupi yuma yayivulu, tahindi?

¹⁴Dichi eyi mwana kamuntu, profwetaku, wumwili Gogi neyi, Mwanta Yehova nindi, Ifuku dakashakama antu ami aIsarela chakadi kwakama, hiwakadilukaku, tahindi?

¹⁵Wakafuma muchipela cheyi oku kukabeta kakuchimunswa kwakweni, nineyi ninyuza yawantu yayivulu hamu naneyi, wejima wawu adi nakwendela hatuwalu hohu, chendu cheneni nanjita yasweja kuvula.

¹⁶Wakakanduka nakulwa nawantu ami aIsarela, neyi ivu dikubuta ituŋa wi-i. Eyi Gogi hamafuku akukuminina nakakuleta wakalwi netuŋa dami, kulonda akaŋiluki kudi nyuza chinakadijilika mudeyi kumesu awu.

¹⁷Mwanta Yehova nindi, Yeyi nateneni kushankulu kutunwa twawambuŋami atuprofwetu amuIsarela, aprofwetelaŋa hamafuku owu nyaka yayivulu, nawu nakakuleta wakalwi nawu, tahindi?

¹⁸Mwanta Yehova nindi, Dena ifuku odu dakenzayi Gogi nakulwa netuŋa daIsarela, kulendumuka kwami kwakamwekana nikumesu ami.

¹⁹Muloŋa nahoshi dehi namukawu wami, nakesi kandombu yami, nami, Chalala dena ifuku odu mwituŋa daIsarela mwakatenta,

²⁰chakwila ninshi jamukaluŋalwiji, niatujila ahaluzwizu, nianyama amumpata, niyuma yazalalaŋa yazalalaŋa heseki, niantu ejima ekala hewulu damaseki, akatenta kumesu ami, nimpidi jakashiwoka, nituposhi twakakundoka, nimpwembu jejima jakakundoka heseki.

²¹Nakamutambikila mpoku yakabali yakenzi kumpidi jami jejima, mpoku jawantu ejima jatubali jakataŋa ana kwawu, iwu nakutaŋa mana kwindi, iwu nakutaŋa mana kwindi. Dimu mwanahoshiyi Mwanta Yehova.

²²Nakasompa nindi nachipupu namashi. Nakamunokeshela niyena, niyendu yindi, ninyuza yawantu yayivulu yadiyi nayu, nvula yayeji, nimalola amaneni, nikesi, nikesi kaNzambi.

²³Nakaditohesha, nakadijilika, akaŋiluka kumesu anyuza yayivulu. Akeluka nawu yami Yehova.