Read MUKANDA WANZAMBI Ezekiele 39 Bible Online

Ezekiele 39 - MUKANDA WANZAMBI bible

Ezekiele 39

¹Eyi mwana kamuntu, profwetaku nsaŋu jakuzuwila Gogi, wilineyi, Mwanta Yehova nindi, Eyi Gogi, kalamba kaRoshi naMesheki naTubali, tiya, ami nidi neyi nandombu.

²Nakakufunti shamu, nakakutwala kumbidi, nakakufumisha kukabeta kakuchimunswa kwakweni, nakakukandwisha hampidi jamuIsarela.

³Naketa kuwuta weyi wamukunji, wakaholoka kuchikasa cheyi chachimunswa, nakaholwesha nsewu jeyi muchikasa cheyi chachidiilu.

⁴Wakadimbukila hampidi jamuIsarela, nineyi niyendu yeyi yejima, ninyuza yawantu yiwudi nayu; nakakuhana kudi atujila atuhuka anyitundu yejima, nikudi anyama amumpata akakuvwoti.

⁵Wakaholokela hampata hatooka. Muloŋa ami nachihoshi dehi. Dimu mwanahoshiyi Mwanta Yehova.

⁶Nakatemesha kesi haMagogi, nihadi antu ashakama muyitutu chakadi kwakama. Akeluka nawu yami Yehova.

⁷Ijina dami dajila nakadilukisha mukachi kawantu ami aIsarela. Hina-kayiiteja nawa cheŋi kujilola ijina dami dajilaku. Nyuza yakeluka nawu yami Yehova Wajila wamuIsarela.

⁸Mwanta Yehova nindi, Tiyenu, hichikwinza, chakakoŋewa. Didi ifuku dinateni.

⁹Antu akashakama munyikala yawaIsarela akedikaŋa nakuchaya nchawa jawu jojayitwa yakunjita, diji jakotaŋawu, ninkebu jamaneni ninkebu janyanya, nimata anyikunji ninsewu, ninyitondu yakumakasa, nimayoŋa, yakekala nchawa jawu nyaka yitanu nayiyedi.

¹⁰Hiyakakaba nakuya nakuchaya nchawa mumpata, hela kutema nyitondu mumasaŋaku; muloŋa nchawa jawu jakekala yoyitwa yakunjita. Akapuŋa ayipupilaŋa, akabuwa ayibuwilaŋa. Dimu mwanahoshiyi Mwanta Yehova.

¹¹Dena ifuku odu nakamwinka Gogi chipela chamuIsarela chakujiika antu indi, chochinekineki chawantu ahitilaŋa kumutamba wakukaluŋalwiji wakumusela, chakajika njila yawantu akahitaŋa. Kwenoku diku kwakajiikawu Gogi naluntu lwindi lwejima. Akachitumba nawu, Chinekineki chaLuntu lwaGogi.

¹²Akayijiika kudi akwamutaŋa waIsarela tukweji tutanu natuyedi, kulonda akatookeshi ituŋa.

¹³Mwalala, akayijiikaŋa kudi antu ejima amwituŋa; chumochu chakayitiyakesha mpuhu yayiwahi mwifuku dakanlemeshawu. Dimu mwanahoshiyi Mwanta Yehova.

¹⁴Akaambulamu antu akekala namudimu wawu wahefuku hefuku, wakuhitaŋa mwituŋa nakujiikaŋa antu, hamu nawantu akudihitila, akajiiki antu anashali heseki, kulonda akatookeshi ituŋa. Chimwakahita tukweji tutanu natuyedi akayaloŋa nakukeŋakeŋa chakukeŋakeŋa.

¹⁵Akwakuhita mwituŋa akahitaŋamu, chakamonaŋawu ifwaha damuntu, hiyakutuŋilaku chuma chakwiluka nachu, nichakenza nakudijiikawu kudi akwakujiika muchinekineki chaLuntu lwaGogi.

¹⁶Ijina damukala dakekala yowu Hamona, dimu mwakatookeshelawu ituŋa.

¹⁷Eyi mwana kamuntu, Mwanta Yehova nindi, Hoshaku nawatujila anyitundu yejima, nawanyama ejima amumpata, neyi, Pompenu mwinzi, kumaŋanenu niniku niniku, mwinzi nakudya yimuna yinukuyiketwila, imuloŋa kudi kuketula yimuna yayivulu hampidi jamuIsarela, kulonda mwakadyi mbiji, mwakanwi mashi.

¹⁸Mwakadya mbiji yawayilobu, mwakanwa mashi awatulamba ahamaseki, ayizamba yanyikoku, awanyana kanyikoku, awampembi amaneni, amayoŋa aŋombi amayala, yejima hiyimuna yamuBashani yamanji.

¹⁹Mwakadya manji dye-e nichimwakekuta, mwakanwa mashi nwe-e nichimwakasheta, ayimuna yami yinakayiketwila.

²⁰Kumesa yami mwakekuta tuwalu namakálu, niayilobu, niamayala akunjita ejima. Dimu mwanahoshiyi Mwanta Yehova.

²¹Kulema kwami nakakusha mukachi kanyuza, nyuza yejima yakamona kusompesha kwami kunakoŋi dehi, nichikasa chami chinayinaŋikili dehi.

²²Dimu mwakelukilawu akwamutaŋa waIsarela nawu ami Yehova yami Nzambi yawu, kufumisha kwifuku odu kutwala nikumbidi.

²³Ninyuza vakeluka nawu komana mutaŋa waIsarela chiwayili muwukoli wayilili nsaŋu yakuluwa kwawu, ochu chamotokeluwu ami dichi chinayiswekeleli mesu ami, hinukuyihana kudi ayilumbu jawu, wejima wawu hiyakudimboka nampoku yakabali.

²⁴Nayikogeli mwaya majilu awu nimwaya nyiloŋa yawu, hinukuyiswekela nimesu ami.

²⁵Dichi Mwanta Yehova nindi, Ichi dinu nakaleta cheŋi ankoli aYakoba ayili muwukoli, nakatiyila mutaŋa waIsarela wejima wushona, nakatiyila ijina dami dajila mukawu.

²⁶Akavula mena nsonyi yawu ninyiloŋa yawu yejima yananmotokuwu ami, chakashakamawu mwituŋa dawu chakadi kwakama, chakadi niwakuyitiyisha woma;

²⁷chinakela nayifumisha dehi munyuza yawantu mwayiluwu, nayipompeshi dehi, nayifumishi dehi mumatuŋa awayilumbu jawu mwayiluwu, nadijiliki dehi mudi wena kumesu anyuza yayivulu.

²⁸Akeluka nawu yami Yehova Nzambi yawu, nanochu chinayitweli muwukoli munyuza, hinukuyipompesha cheŋi mwituŋa dawu awenawu, chakadi kushiyamu niwumu;

²⁹hinakayiswekela cheŋi mesu amuku, muloŋa ami henohu nechila dehi Spiritu yami hamutaŋa waIsarela. Dimu mwanahoshiyi Yehova.