Read MUKANDA WANZAMBI Ezekiele 41 Bible Online

Ezekiele 41 - MUKANDA WANZAMBI bible

Ezekiele 41

¹Hakuntwala kutembeli, hakweseka yishimi mbadi iyi nkotweli jitanu nayimu mukutoha, mbadi yikwawu nawa nkotweli jitanu nayimu mukutoha, mwomweseka kutoha kwatabanaka.

²Mukutoha kwakuwiŋililu nkotweli ikumi. Mumbavu jakuwiŋililu, mbadi yimu nkotweli jitanu, mbadi yikwawu nawa nkotweli jitanu. Hakweseka kuleha kwayu nkotweli makumi awana, mukutoha nkotweli makumi ayedi.

³Hakuya nakwijila mukachi, hakweseka yishimi yakuwiŋililu yejima yankotweli jiyedi; kuwiŋililu nkotweli jitanu nayimu; mukutoha kwamuwiŋililu nkotweli jitanu najiyedi.

⁴Hakweseka iluŋa dakumesu atembeli, mukuleha kwadu nkotweli makumi ayedi, mukutoha nkotweli makumi ayedi nawa. Hakuŋila nindi, Munu mwomwamweni mwajila.

⁵Hakweseka mbaŋu yetala nkotweli jitanu nayimu. Kutoha kwamatala amumbavu anyeŋumuka itala mbadi jejima, matala ejima nkotweli jiwana jiwana.

⁶Matala amumbavu adiŋi nyisululu yisatu yadilunjika, musululu wumu matala makumi asatu, yejima chochu; eŋila mumbaŋu yakundama kwitala yatuŋilawu matala amumbavu kwi-ndo, kulonda matalowu akakoleluhu, akabuli kukwata mumbaŋu yetala dadeni.

⁷Matalowu amumbavu chanyeŋumukiluwu itala nakudilunjika ayilaŋa nakutoha; muloŋa oku kunyeŋumuka kwanyeŋumukiluwu itala kwayilaŋa nakudilunjika kwitala kwi-ndo, dichi itala hidikutohela kwiwulu; muntu neyi wukufuma kwitala dakwishina akandami kwitala dahewulu wukuhitila dahakachi.

⁸Namweni nawa kwitala kwadiŋi chimeta chanyamuka kwiwulu kwi-ndo. Yikuku yamatala amumbavu yashikili mwiteti damana damunkotweli jitanu nayimu.

⁹Mudita wambaŋu yahanzi yatuŋililuwu matala amumbavu washikili munkotweli jitanu; oku kwasheli kwokuchipela chamatala amumbavu akundamini kwitala dadeni.

¹⁰Hakachi kamatalowu hadiŋi iluŋa damunkotweli makumi ayedi danyeŋumuka itala dejima kwi-ndo.

¹¹Yenzelu yamatalowu amumbavu yatalili oku kwasheli, chenzelu chimu chatalili kukabeta kakuchimunswa, chenzelu chikwawu chatalili kukabeta kakuchidiilu. Odu iluŋa dasheli mukutoha kwadu nkotweli jitanu kwi-ndo.

¹²Chuma chatuŋiluwu chadiŋi kumesu anoku kwambwiluwu kumbadi yatala kumujika, mukutoha chashikili munkotweli makumi atanu nayedi; mudita wambaŋu yachuma chatuŋiluwu, washikili munkotweli jitanu kwi-ndo, kuleha kwachu munkotweli makumi atanu nawana.

¹³Dichi hakweseka itala, kuleha kwadu nkotweli nkulakaji. Kwambwiluwu, nichuma chatuŋiluwu, nimbaŋu jachu, mukuleha nkotweli nkulakaji;

¹⁴kutoha kwakumesu etala nawa, ninoku kwambwiluwu kwatala kumusela, nkotweli nkulakaji.

¹⁵Hakweseka kuleha kwachuma chatuŋiluwu, kumesu anoku kwambwiluwu kwadiŋi kunyima yachu, nikuwuhitilu waku hambadi yimu nihambadi yikwawu, nkotweli nkulakaji; nitembeli yamukachi, nimakeki akuchipaŋu;

¹⁶nikumaluŋa akuyisu, nikunjanina jakwenzela, nikuwuhitilu wanyeŋumuka hanyisululu yawu yamatala adilunjika yisatu, waditala neluŋa dakuchisu, ashiluku walu wamaŋalanŋa kwi-ndo, kufumisha hamaseki ndo nikunjanina oju; njanina oju jadiŋi jakubuta;

¹⁷kushikŋa kwiluŋa dahewulu dachenzelu, ndo nikwitala damukachi, nihanzi, nikumbaŋu yejima kwi-ndo, nimukachi nihanzi, chakweseka hohu.

¹⁸Achituŋali chakusha niakerubi ninyikoma; elili kerubi iku, kerubi iku, mukachi mudi mukoma, akerubi ejima adiŋi nayifu yiyedi yiyedi;

¹⁹elili chifu chamuntu chitala mukoma wudi hambadi iyi, chifu chamwenzi wamutupa chitala kumukoma wudi hambadi yikwawu. Elili chochenochu ho-o, kunyeŋumuka itala dejima.

²⁰Elili akerubi nanyikoma kufumisha hamaseki ndo nihewulu dachenzelu; dimu mwadiŋi mbaŋu yatembeli.

²¹Tembeli oyu yiŋamba yakuyisu yakusoŋa yesekana ninimu ninimu, kumesu amalala kwamwekeni neyi chamwekeni tembeli.

²²Kameŋa kadiŋi kamaŋalanŋa, wuzandamu waku nkotweli jisatu, mukuleha nkotweli jiyedi; nimawombu aku, nikuleha kwaku, nimbaŋu jaku, jadiŋi jamaŋalanŋa. Hakuŋila nindi, Diyi mesa yekala kumesu aYehova.

²³Nitembeli nimalala adiŋi nayenzelu yiyedi.

²⁴Yenzelu oyu yadiŋi yaambuka hayedi, henohu hayedi hadiŋi hawuvuŋilu; chenzelu chimu chaambuka hayedi, chenzelu chikwawu nawa chaambuka hayedi.

²⁵Hayenzelu oyu yatembeli eliluhu akerubi nanyikoma, neyi oyu yeliluwu hambaŋu. Hanzi kumesu ekeki kwadiŋi nyalachi yanyitondu yadita.

²⁶Kumbadi jekeki kwadiŋi njanina jakwenzela, ninyikoma, nihambadi iyi nihambadi yikwawu nawa. Dimu mwadiŋi matala amumbavu yetala dadeni, ninyalachi yadita.