Read MUKANDA WANZAMBI Ezekiele 42 Bible Online

Ezekiele 42 - MUKANDA WANZAMBI bible

Ezekiele 42

¹Hakuntwala muchipaŋu chahanzi, njila yatala kukabeta kakuchimunswa. Hakuntwala mwitala datalaŋana nanoku kwambwiluwu, kwatalaŋana nachuma chatuŋiluwu chatala kukabeta kakuchimunswa.

²Kumbidi yamuwuleli wamunkotweli nkulakaji, kwadiŋi chenzelu chakukabeta kakuchimunswa, mukutoha mwashikili munkotweli makumi atanu.

³Oku kwatalaŋeni nankotweli makumi ayedi jakundamini kuchipaŋu chamukachi, ninoku kwatalaŋeni nachisesa chamalola chakundamini kuchipaŋu chahanzi, kwadiŋi wuhitilu watalaŋana nawuhitilu wamumusululu wamatala ahewulu wamuchisatu.

⁴Kumbidi yamatalowu kwadiŋi muwendelu, mukutoha kwawu munkotweli ikumi watala mukachi, njila yamunkotweli yimu. Yenzelu yawu yatala kukabeta kakuchimunswa.

⁵Matala ahewulu adiŋi amehi, muloŋa mawuhitilu atepulwiluku kubadika chatepulwiluwu kumatala amwishina, niahakachi kuchumochu chatuŋiluwu.

⁶Muloŋa matalowu adiŋi nyisululu yisatu yadilunjika, hiyadiŋi nayishimi neyi yishimi yamuyiŋaŋuku; dichi chiwakeheleli musululu wahewulu chakubadika wamwishina niwahakachi kufumisha heseki.

⁷Mbaŋu yahanzi yamumbavu yamatalowu yatala kuchipaŋu chahanzi kumesu amatalowu, kuleha kwayu nkotweli makumi atanu.

⁸Muloŋa kuleha kwamatala adiŋi muchipaŋu chahanzi, kwashikili munkotweli makumi atanu. Hakwila kumesu atembeli kwadiŋi nkotweli nkulakaji.

⁹Mwishina damatalowu mwadiŋi wiŋililu kumutamba wakumusela, wakwila neyi muntu wukukeŋa kufuma kuchipaŋu chahanzi hakwijila mu.

¹⁰Mundama yambaŋu yachipaŋu chatala kumusela, kumesu anoku kwambwiluwu, kumesu achuma chatuŋiluwu, mwadiŋi matala nanjila yadiŋi kumbidi yawu;

¹¹amwekeni neyi owu matala akukabeta kakuchimunswa; kuleha kwawu kwokumu, nikutoha kwawu kwokumu nawa, nimuwidikilu wawu nimuwuloŋeshelu wawu, nimwaya yenzelu yawu, mwejima mwomumu.

¹²Mwaya yenzelu yamatala atala kukabeta kakuchidiilu, mwadiŋi nawa chenzelu kwakumina njila, yoyi njila yatala chikupu hambaŋu yatala kumusela, yakwila neyi muntu wukukeŋa kwijila mu.

¹³Hakuŋila nindi, Matala akukabeta kakuchimunswa nimatala akukabeta kakuchidiilu, atalaŋana nanoku kwambwiluwu, diwu matala ajila kwakadiilaŋawu yuma yasweja kujila kudi atupristu akundama kwakwihi naYehova. Diku kwakashaŋawu yuma yasweja kujila, ninyilambu yawuŋa, ninyilambu yahanshidi, ninyilambu yakutanya, muloŋa kwenoku kwajila.

¹⁴Chakeŋilaŋawu atupristu mwenomu, hiyakedikamu nawa cheŋi mwajila aya muchiŋaŋu chahanzi, chakadi kushiya mahinawu akalakalaŋawu nachu mwenomuku; muloŋa mahinowu ajila; akavwalaŋa mahina acheŋi kulonda akakundamaŋa kuyuma yawantu.

¹⁵Chanakumishiyi kweseka itala damukachi hakuŋidishila kunjila yakuchisu chatala kumusela, hakucheseka kwi-ndo.

¹⁶Hakweseka kumutamba wakumusela neteti dakweseka nachu, mated makulakaji atanu, akweseka neteti dakweseka nachu kwi-ndo.

¹⁷Hakweseka kumutamba wakukabeta kakuchimunswa, mateti makulakaji atanu, akweseka neteti dakweseka nachu kwi-ndo.

¹⁸Hakweseka kumutamba wakabeta kakuchidiilu, mateti makulakaji atanu, akweseka neteti dakweseka nachu.

¹⁹Hakubalumukila kumutamba wakumujika, hakweseka mateti makulakaji atanu neteti dakweseka nachu.

²⁰Wesekeli kunyitamba yonsu yiwana. Kwadiŋi mbaŋu kwi-ndo, kuleha makulakaji atanu, kutoha nawa makulakaji atanu, kulonda kwambula nachu yajila nayabula kujila.