Read MUKANDA WANZAMBI Ezekiele 43 Bible Online

Ezekiele 43 - MUKANDA WANZAMBI bible

Ezekiele 43

¹Hakuntwala nawa kuchisu, chochisu chatala kumusela.

²Kutala, kulema kwaNzambi yaIsarela hikukwinjila kunjila yakumusela. Izu dindi dadiŋi neyi lushindu lwameji amavulu. Hamaseki hatoŋekeli nakulema kwindi.

³Kwamwekeni neyi chimwenu chinamweni, neyi chimwenu chinamweni hinenjili nakujilumwisha mukala. Yimwenu oyu yadiŋi neyi chimwenu chinamweni kukaloŋa Kebari. Hinukudimbuka chamesu hamaseki.

⁴Kulema kwaYehova hikukwijila mwitala kunjila yakuchisu chatala kumusela.

⁵Spiritu hakunnyamuna, hakuntwala muchiŋaŋu chamukachi. Kutala, kulema kwaYehova kunenzali dehi mwitala.

⁶Hinukutiya muntu wudi nakuhosha nanami, izu dindi didi nakufuma mwitala. Kudami hikukwimana nimuntu.

⁷Hakuŋila nindi, Eyi mwana kamuntu, hanu dihu hachididi chetanda dami dawanta, dihu hachididi chakudata nyendu yami, diku nakashakama mukachi kawanyana kaIsarela chahaya nyaka. Mutaŋa waIsarela hiwamba katamisha nawa cheŋi ijina dami dajila nawuvumbi wawu, hela nayibimbi yawanyanta jawu kuyina ŋanaŋa yawu, hela wena, hela anyanta jawuku.

⁸Chanashuwu iluŋa dakuchisu chawu kwakwihi neluŋa dakuchisu chami, nchiŋamba chawu kwakwihi nachiŋamba chami, mukachi kamami nawena himukushala kwambaŋu hohu, anatamishi ijina dami dajila nayishimashima yawu yanakoŋuwu, dichi chinayinoŋesheli nakuzuwa kwami.

⁹Ichi dinu afumishi wujila wawu, niyibimbi yawanyanta jawu, atwali kwakulehi nanami, ninami nakashakama mukachi kawu chahaya nyaka.

¹⁰Eyi mwana kamuntu, yileji akwamutaŋa waIsarela italidi, kulonda akatiyi nsonyi yakuluwaluwa kwawu, akadeseki mudaya.

¹¹Neyi akatiya nsonyi yayuma yanakoŋuwu yejima, wakayileja mwaya itala, nichifwikija chadu, nimawidikilu adu, nimawiŋililu adu, nimudaya mwejima, niyidika yadu yejima, ninshimbi jadu jejima, wudisoneki kumesu awu; kulonda akahembaŋa mudaya mwejima, niyidika yadu yejima, akakoŋaŋamu.

¹²Tiyenu lushimbi lwetalidi, nawu, Hewulu dampidi iyi kuŋinza yadu kwejima kwakasweji kujila kwi-ndo. Tiyenu, dilu lushimbi lwetalidi.

¹³Tiyenu mweseka kameŋa munkotweli jachikasa; nkotweli oyu hinkotweli yakunuŋaku niipwehelu damuntu; ishina dakekali damunkotweli yimu, mukutoha nkotweli yimu nawa, mukinkita wadu wahita kunsa yadu kwi-ndo, muchikasa chakusamanesha, dimu mwakekalili itentaminu dakameŋa.

¹⁴Kufumisha kwishina heseki nakutwala kumukusa wakwishina kwakashika munkotweli jiyedi, mukutoha nkotweli yimu. Kufumisha kumukusa wanyanya nakutwala kumukusa weneni kwakashiki munkotweli jiwana, mukutoha nkotweli yimu.

¹⁵Kameŋa kahewulu kakekali kamunkotweli jiwana; kufumisha kwijiku dakameŋa nakutwala kwiwulu kwakekali nseŋu jiwana.

¹⁶Ijiku dakameŋa dakekali mukuleha nkotweli ikumi najiyedi, mukutoha ikumi najiyedi, desekani mbaŋu jadu jejima jiwana.

¹⁷Mukusowu wakeli mukuleha nkotweli ikumi najiwana, mukutoha nkotweli ikumi najiwana, mumbavu jawu jiwana; mukinkita wawu wakanyeŋumukaku wakekali wamunkotweli yachiketu; ishina dakekali dankotweli yimu kwi-ndo. Wukandaminu wawu wakatali kumusela.

¹⁸Hakuŋila nindi, Eyi mwana kamuntu, Mwanta Yehova nahoshi nindi, Tiyaku yidika yakameŋa yamwifuku dakakatuŋawu, kulonda akashitiluhu nyilambu yakushita, akasampwiluhu nimashi.

¹⁹Yehova nahoshi nindi, Atupristu aLevi asemuka kudi anyana kaZadoki, akundamaŋa kwakwihi nanami kulonda ankalakelaŋa, wakayinki iyoŋa daŋombi weyala wamulambu wahanshidi.

²⁰Wakanoni mashi awu, wakashi kunseŋu jakameŋa jiwana, nikumawombu amukusa awana, nikumukinkita kwi-ndo; dimu wakakatookeshela, nakwila yakukabuta nachu.

²¹Wakatambuli nawa ŋombi yahimulambu wahanshidi, wakayochi muchipela chamwitala, mwayilejawu dehi, hanzi yamalala.

²²Hefuku damuchiyedi wakalambuli chizamba champembi chakadi hatamayi chamulambu wahanshidi. Akatookeshi kameŋa neyi chakatookesheluwu naŋombi.

²³Chiwakela wunakumishi dehi kukatookesha, wakalambuli iyoŋa daŋombi weyala wakadi hatamayi, nichizamba chamukoku wakufuma mwiyinda, wakadi hatamayi.

²⁴Wakayishikŋi kwakwihi naYehova, atupristu akakuwuhu muŋwa, akayishiti akeli himulambu wakumushitila Yehova.

²⁵Wakaloŋeshi mafuku atanu nayedi, hefuku hefuku, mpembi wamulambu wahanshidi. Akalopeshi nawa niiyoŋa daŋombi weyala, nichizamba chamukoku wamwiyinda, akadi hatamawu.

²⁶Akeli yakubuta nachu kameŋa nakukatookesha mafuku atanu nayedi; dimu mwakakakunjikilawu kumudimu waYehova.

²⁷Chakela anawanishi dehi mafuku owu, kufumisha hefuku damu chitanu nachisatu nakutwala kumbidi, atupristu akalopeshaŋa hakameŋa nyilambu yenu yakushita, ninyilambu yenu yakuwunda; ami nakayiitŋa. Dimu mwanahoshiyi Mwanta Yehova.