Read MUKANDA WANZAMBI Ezekiele 44 Bible Online

Ezekiele 44 - MUKANDA WANZAMBI bible

Ezekiele 44

¹Hakunfuntisha cheŋi njila yachisu chakumalala chahanzi, chatala kumusela; kuchiwana chakwenzela.

²Yehova hakuŋila nindi, Chisu ichi chakekalaŋa chakwenzela hohu, kuchenzulula nehi, muntu kwipililaku nehi, muloŋa kunepilili dehi Yehova, Nzambi yaIsarela; dichi chakekalaŋa chakwenzela hohu.

³Chiŋa yowu kalamba hohu, diyi wakashakama mwenomu chawukalamba nakudya yakudya kumesu aYehova. Diyi wakeŋilila njila yekeki dakuchisu ochu, nikwidika akedikili kunjila yekeki odu.

⁴Hakuntwala kumesu etala njila yakuchisu chakukabeta kakuchimunswa; nami nitali, hinukumona mwitala daYehova munenzali dehi kulema kwaYehova; hinukudimbuka chamesu ami heseki.

⁵Yehova hakuŋila nindi, Eyi mwana kamuntu, shakuku muchima, wutali namesu eyi, wutiyi namatu eyi, yuma yejima yinukukuleja yakutena yidika yakwitala daYehova yejima, ninshimbi jadu jejima. Shaku muchima kuwipililu wakwitala, hamu nakumawidikilu ejima akumalala.

⁶Kayili adikaŋa, wowu akwamutaŋa waIsarela, neyi, Mwanta Yehova nindi, Enu akwamutaŋa waIsarela, yishimashima yenu yinawani dehi;

⁷yishimashima yakuleta mumalalami antu akumatuŋa acheŋi, ela kumuchima ayidima, nikumujimba ayidima, atamishaŋamu mwomwitala dami, himwalambulaŋa yakudya yami, nimanji nimashi, anajahi dehi nichitiyaŋenu chami nayishimashima yenu yejima.

⁸Yuma yami yajila yinayinkeli kuhemba himunayihembi enu awenuku, ilaŋa malalami nayinkeli kuhemba munayinki antu acheŋi ayihembeluwu.

⁹Dichi Mwanta Yehova nindi, Muntu wakwacheŋi wakwila kumuchima chidima, nikumujimba chidima, kwipila mumalalami chinjila, hela antu akwacheŋi adi mukachi kawanyana kaIsarela chinjila;

¹⁰ilaŋa aLevi ayili kwakulehi nanami hapwapukiluwu aIsarela, apwapukili kudami hiyakulondela akishi awu akutuŋa; diwu akasendaŋa kuluwa kwawu.

¹¹Akekalaŋa kwanamudimu wakukalakala mumalalami, nakutala kuyisu yetala, nakukalakala mwitala. Akayijahilaŋa antu nyilambu yakushita nikuyiketwila yimuna yawu, akemanaŋa kumesu awu nakuyikalakela.

¹²Mwanta Yehova nindi, Nayolweli chikasa chami kwiwulu, akasendaŋa kuluwa kwawu, nanochu chayikalakelaŋawu kumesu awakishi awu akutuŋa, hiyakwikala chuma chakudimbwisha nakuluwapesha mutaŋa waIsarela.

¹³Hiyakakundamaŋa kwakwihi nanami nakunkopela mudimu wawupristu, hela kukundama kwakwihi nayuma yami yajila nayuma yasweja kujilaku. Ilaŋa wena akasendaŋa nsonyi yawu niyishimashima yawu yakopeluwu.

¹⁴Ilaŋa nukuyinka kwamudimu wakwikala akwakukalakala mudimu wakuhemba itala, nakukalakala nyidimu yadu yejima, nakwila yuma yejima yelaŋawu mwenomu.

¹⁵Ilaŋa tupristu aLevi anyana kaZadoki, ahembelaŋa malalami hapwapukiluwu anyana kaIsarela kwakulehi nanami, diwu akakundamaŋa kwakwihi nanami nakunkalakela; diwu akemanaŋa kumesu ami nakunlambula nimanji nimashi. Dimu mwanahoshiyi Yehova.

¹⁶Diwu akeŋilaŋa mumalalami, diwu akakundamaŋa kwakwihi namesa yami nakunkalakela, diwu akahembaŋa yuma yinayinkeli kuhemba.

¹⁷Chakepila ŋawu muyisu yachiŋapu chamukachi akavwalaŋa mahina awanda amawahi; bayi akavwalaŋa mahina amavuji anyikoku hachiduwu kukalakala muyisu yachiŋapu chamukachi, hela mwitalaku.

¹⁸Akavwalaŋa mabonye awanda wawuwahi kunyitu yawu, akavwalaŋa tuputula twawanda wawuwahi mumbunda jawu; bayi akavwalaŋa chuma chaletaŋa masulwilaku.

¹⁹Chakedika ŋawu nakuya muchiŋapu chahanzi, nakuya kudi antu muchiŋapu chahanzi, akavúulaŋa mahinawu akalakalaŋawu nachu, akayitentekaŋa mumatala ajila, akavwalaŋa mahina acheŋi kuchina kujilika antu namahinawu.

²⁰Hela kutewulatuwewa, hela kuleka nsuki jawu jilehaŋa tuhu chinjila; akakumini dakutewula kwakunyitu yawu hohu.

²¹Chakepila ŋawu atupristu muchiŋapu chamukachi, kunwa vinyuchinjila.

²²Kusumbula mumbanda wantuluwa, hela mumbanda aseŋawu dehi, chinjila; kusumbula chiŋa mumbanda wamujiki wakudi anyana akumutaŋa waIsarela, hela ntuluwa wadipi iŋodakapristu.

²³Akalejaŋa antu ami haambukila yajila nayakadi kujila, akayishinshikishaŋa mwambukila yuma yamajilu nayuma yaka majilu.

²⁴Neyi kudi muloŋa diwu akemana nakuwusompesha; akawusompesha mwaya wuŋaji wami. Akahembaŋa nshimbi jami niyidika yami muyawŋa yami yakushiika yejima; akajilikaŋa sabata jami.

²⁵Kwinza kwakwihi namufu adijiloli chinjila. Kudijilola chiŋa hadi tata yindi, hela hadi mama yindi, hela hadi mwanindi weyala, hela hadi mwanindi wamumbanda, hela hadi mana kwindi, hela hadimuhelindi wakadi iyala.

²⁶Neyi anamutookeshi dehi akamuchindili mafuku atanu nayedi.

²⁷Ifuku dakepilayi mumalala, muchiŋapu chamukachi, nakukalakala mumalala, akalambuli himulambu windi wahanshidi. Dimu mwanahoshiyi Mwanta Yehova.

²⁸Akekali nawuswana wawu. Wuswana wawu yami. Bayi mwakayinka iheta damuIsarelaku. Iheta dawu yami.

²⁹Akadyaloŋa nyilambu yawuŋa, ninyilambu yahanshidi, ninyilambu yakutanya. Yuma yamuIsarela yakwambula dehi yejima yakekali yawu.

³⁰Yikusambila kunyikabu yatachi yayuma yejima, niyákuyuma yimukulambula yejima, niyányilambu yenu yejima, yakekali yambala yawatupristu. Mwakamwinkaŋa kapristu wuŋa wenu wumwakafuŋa wakusambila, kulonda wakashakamishi nkisu hetala deyi.

³¹Atupristu kudya chuma chakudifwila, hela chamukoka, hela hikajila hela hikanyama, chinjila.