Read MUKANDA WANZAMBI Ezekiele 46 Bible Online

Ezekiele 46 - MUKANDA WANZAMBI bible

Ezekiele 46

¹Mwanta Yehova nindi, Kuchisu chakuchipaŋu chamukachi chatala kumusela, kwakekalaŋa kwakwenzela mumafuku anyidimu atanu nadimu; ilaŋa hefuku dasabata akenzululaku, nimwifuku dakwaluka kakweji akenzululaku.

²Kalamba akeŋililaŋa njila yekeki dakuchisu chahanzi, akemanaŋa kuchiŋamba chakuchisu, atupristu akaletaŋa himulambu windi wakushita, ninyilambu yindi yakuwunda, yena akadifukuli kwiluŋa dakuchisu; hakedika hanzi. Ilaŋa kuchisu kwenzelaku nehi chiŋa kumelela.

³Antu amwituŋa akadifukulaŋa kumesu aYehova kuchisu ochu hajisabata nihakwaluka tukweji.

⁴Mulambu wakushita wakalambulayi kapristu kudi Yehova hefuku dasabata, wakekali wanyana kanyikoku akadi hatamawu atanu nawumu, nichizamba chamukoku wakadi hatamayi.

⁵Mulambu wawuŋa wakekali chimpaya chimu hachizamba chamukoku, himulambu wawuŋa wahanyana kanyikoku wakashiki mwakutweshelayi kuhana, hachimpaya chimu chiŋa haya nawa nswaha yamanji yimu.

⁶Hefuku dakwaluka kakweji himulambu wakekali weyoŋa daŋombi weyala wakadi hatamayi, nianyana kanyikoku atanu nawumu, nichizamba chamukoku; akekalaŋa akadi hatamawu.

⁷Yena akaletaŋa himulambu wawuŋa, chimpaya chimu haŋombi weyala, chimpaya chimu hachizamba chamukoku, hanyana kanyikoku akaleti mwomwanatwesheliyi, hachimpaya chimu chiŋa haya nswaha yamanji yimu.

⁸Chakeŋila ŋayi kalamba, akeŋililaŋa njila yekeki dakuchisu, nikwidika akedikilaŋa njila yoyenoyu.

⁹Ilaŋa ntu amwituŋa, chakenzaŋawu kumesu aYehova kuyawŋa yakushiika, akelaŋa muntu wukwiŋilila njila yakuchisu chakuchimunswa nakudifukula kudi Yehova, akedikili njila yakuchisu chakukabeta kakuchidiilu; muntu wukwiŋilila njila yakuchisu chakukabeta kakuchidiilu akedikili njila yakuchisu chakukabeta kakuchimunswa. Bayi afuntila njila yachisu cheŋililayuku, chiŋa akumina dakwimakana zwa.

¹⁰Kalamba akelaŋa chakwijila wu wena, niyena nawa akeŋilaŋa nawu hamu; chakwidikawu wena akedikili hamu.

¹¹Nikuyawŋa, nikuyawŋa yashiikawu, himulambu wawuŋa wakekali chimpaya chimu haŋombi weyala, chimpaya chimu hachizamba chamukoku, wahanyana kanyikoku wakashiki mwakutweshelayi kuhana, hachimpaya chimu chiŋa haya nawa nswaha yamanji yimu.

¹²Kalamba chakaletayi himulambu wakulambula chakumuchima windi, hela hihimulambu wakushita, hela hinyilambu yakuwunda yakuhimulambu la Yehova chakumuchima windi, akamwenzulwili kuchisu chatala kumusela, akaleti himulambu windi wakushita, ninyilambu yindi yakuwunda, neyi chelaŋayi hefuku dasabata, hakedika. Neyi nediki dehi akenzeli chenzelu.

¹³Akaletaŋa mwana kamukoku wamwaka wumu wakadi hatamayi wamulambu wakumushitilaŋa Yehova hefuku hefuku; akamuloŋeshaŋa habudidi habudidi.

¹⁴Kuhimulambu owu akaloŋesheluku habudidi habudidi himulambu wawuŋa, chibalu chachimpaya chachitanu nachimu, nichibalu chanswaha yamanji kulonda kwovwahisha nachu wuŋa walembuluka, hihimulambu wawuŋa wakuhimulambu laŋa Yehova hefuku hefuku chachidika chahaya nyaka.

¹⁵Dimu mwakaletelaŋawu mwana kamukoku, nihimulambu wawuŋa, nimanji, habudidi habudidi, hihimulambu wakushitaŋa hefuku hefuku.

¹⁶Mwanta Yehova nindi, Neyi kalamba wakenka mwanindi weyala wumu chamukunkulu, chakekali chawuswana windi, chakekalaŋa chawanyanindi amayala; hiiheta dawu dawuswana.

¹⁷Ilaŋa neyi kuwuswana windi wakanonaku chamukunkulu enka kambuŋindi wumu, chakekalaŋa chindi kushika nikumwaka wakusubuka, hamwakowu chakafunta cheŋi kudi kalamba; hakwila wuswana windi wakekalaŋa wawanyanindi amayala.

¹⁸Kalamba bayi akanonaŋa kuwuswana wawantu mwaka ayihaŋaŋa kwiheta dawuku, kwiheta dindi yomweni kwokwakanonaŋayi wuswana wakwinkaŋa anyanindi amayala, kulonda antu ami abulaŋa kuŋalaŋana, iwu nakufuma mwiheta dindi, iwu nakufuma mwiheta dindi.

¹⁹Hakunhanwisha muwiŋililu wadiŋi kumbadi yakuchisu, hakuntwala mumatala awatupristu ajila atala kukabeta kakuchimunswa; kutala kumbadi yakunyima yatala kumujika kudi chipela.

²⁰Hakuŋila nindi, Kuchipelichi diku kwakatelekelawu atupristu himulambu wakutanya nihimulambu wahanshidi, diku kwakochelaŋawu himulambu wawuŋa kuchina kuyitwalaŋa muchipaŋu chahanzi ajiliki antu.

²¹Hakuŋidisha, hakuntwala muchipaŋu chahanzi, hakunhitisha kumawombu achipaŋu awana; kutala, mumawombu achipaŋu ejima mudi chipaŋu nawa.

²²Mumawombu achipaŋu awana mwadiŋi yiŋaŋu yakwenzela, kuleha kwayu nkotweli makumi awana, mukutoha nkotweli makumi asatu; yejima yiwana yadiŋi mumawombu yesekeli mwomumu hohu.

²³Muyiŋaŋu oyu yiwana mwanyeŋumukili nyisululu yatumeŋa twakutuŋa, mwishina danyisululu oyu elilumu majiku akutelekaŋa.

²⁴Hakuŋila nindi, Wenawa diwu matala akutelekela, kwakatelekaŋawu yimuna yawantu, kudi akwakukalakala mwitala.