Read MUKANDA WANZAMBI Ezekiele 48 Bible Online

Ezekiele 48 - MUKANDA WANZAMBI bible

Ezekiele 48

¹Tiyenu majina anyichidi. Kufumisha kunsa yakukabeta kakuchimunswa kumbadi yanjila yakuHeteloni, nikuwiŋililu wakuHamati nikuHazari Enani, kuŋinza yaDamakasa, nakutalisha kukabeta kakuchimunswa kumbadi yaHamati; akekali nanyitamba yawu kumusela nakumujika, Dani iseka dimu.

²Kuŋinza yaDani kufumisha kumutamba wakumusela ndo nikumutamba wakumujika, Asheri iseka dimu.

³Kuŋinza yaAsheri, kufumisha kumutamba wakumusela ndo nikumutamba wakumujika, Nafwatali iseka dimu.

⁴Kuŋinza yaNafwatali, kufumisha kumutamba wakumusela ndo nikumutamba wakumujika, Manase iseka dimu.

⁵Kuŋinza yaManase, kufumisha kumutamba wakumusela ndo nikumutamba wakumujika, Efweremi iseka dimu.

⁶Kuŋinza yaEfweremi, kufumisha kumutamba wakumusela ndo nikumutamba wakumujika, Rubeni iseka dimu.

⁷Kuŋinza yaRubeni, kufumisha kumutamba wakumusela ndo nikumutamba wakumujika, Yuda iseka dimu.

⁸Kuŋinza yaYuda, kufumisha kumutamba wakumusela ndo nikumutamba wakumujika, kwakekali himulambu wumwakalambula, mukutoha nkotweli makombakaji makumi ayedi najitanu, mukuleha hohamu namaseka amakwawu, kufumisha kumutamba wakumusela ndo nikumutamba wakumujika. Malala akekali mukachi kawu.

⁹Mulambu wumwakahimulambu la Yehova wakekali mukuleha makombakaji makumi ayedi natanu, mukutoha makombakaji ikumi.

¹⁰Tiyenu maseka akuhimulambu wajila akayanjaŋenawu atupristu; hakabeta kakuchimunswa makombakaji makumi ayedi natanu, hamujika makombakaji ikumi mukutoha, hamusela makombakaji ikumi mukutoha, hakabeta kakuchidiilu makombakaji makumi ayedi natanu mukuleha. Malala aYehova akekali mukachi kawu.

¹¹Masekowu akekali awatupristu ajilikawu akudi anyana kaZadoki, ahembeli chuma chinayinkeli kuhemba, abulili kupwapuka hapwapukŋuwu anyana kaIsarela, neyi chapwapukiluwu aLevi.

¹²Wakekali himulambu wawu wakufumisha kuhimulambu wetuŋa, hichuma chasweja kujila kuŋinza yawaLevi.

¹³ALevi akekali neseka damakombakaji makumi ayedi natanu mukuleha, makombakaji ikumi mukutoha, dakakulishi ŋinza yawatupristu, kuleha kwejima kwakekali makombakaji makumi ayedi natanu, kutoha makombakaji makumi ayedi.

¹⁴Kulandishaku chibalu, hela kuchihimpa, hela kutwala kwacheŋi nyikabu yamwituŋa yatachi, chinjila. Muloŋa isekodu dajila daYehova.

¹⁵Dichi owu makombakaji atanu anashali mukutoha kwatalaŋana namakombakaji makumi ayedi natanu, kwakekali kwachinsaŋa, kwamukala, kwakushakama, nikumpata. Mukala akawutuŋili mukachi.

¹⁶Tiyenu mwakashikila yesekelu yawu; mutamba wakukabeta kakuchimunswa makombakaji awana namakulakaji atanu, mutamba wakukabeta kakuchidiilu makombakaji awana namakulakaji atanu, mutamba wakumusela makombakaji awana namakulakaji atanu, mutamba wakumujika makombakaji awana namakulakaji atanu.

¹⁷Mukala wakekali nampata jawu; hakabeta kakuchimunswa makulakaji ayedi namakumi atanu, hakabeta kakuchidiilu makulakaji ayedi namakumi atanu, hamusela makulakaji ayedi namakumi atanu, hamujika makulakaji ayedi namakumi atanu.

¹⁸Mukuleha munashali mwaya nakukulisha himulambu wajila, mwakekali hamusela makombakaji ikumi, hamujika makombakaji ikumi nawa. Mwakayi nakukulisha himulambu wajila; yakudya yakafumaŋa mwenomu yakekalaŋa yakudiisha antu akakalakalaŋa mumukala.

¹⁹Antu amunyichidi yawaIsarela yejima akakalakalaŋa mumukala, diwu akadimaŋa mpatoyu.

²⁰Owu himulambu wejima wakekali imu makombakaji makumi ayedi natanu, imu makombakaji makumi ayedi natanu nawa. Owu himulambu wajila mwakawulambuli wesekana mbaŋu jejima jiwana hamu nelieta damukala.

²¹Oku kunashali kwakekali kwakalamba, niishinadi niishinadi dahimulambu wajila niiheta damukala, kwatalaŋana nanowu makombakaji makumi ayedi natanu, atala kuŋinza yakumusela, kwatalaŋana nanowu makombakaji makumi ayedi natanu, atala kuŋinza yakumujika, kwaya nakukulisha maseka amakwawu, kwakekali kwakalamba. Mulambu wajila nimalala etala akekali mukachi.

²²Niiheta dawaLevi nidamukala dakekali mukachi keseka dakalamba. Iseka dakalamba dakekali hakachikaŋainza yaYuda naŋinza yaBenjamini.

²³Hakwila nyichidi yinashaluku; kufumisha kumutamba wakumusela ndo nikumutamba wakumujika, Benjamini iseka dimu.

²⁴Kuŋinza yaBenjamini, kufumisha kumutamba wakumusela ndo nikumutamba wakumujika, Simeyona iseka dimu.

²⁵Kuŋinza yaSimeyona, kufumisha kumutamba wakumusela ndo nikumutamba wakumujika, Isakari iseka dimu.

²⁶Kuŋinza yaIsakari, kufumisha kumutamba wakumusela ndo nikumutamba wakumujika, Zebuluni iseka dimu.

²⁷Kuŋinza yaZebuluni, kufumisha kumutamba wakumusela ndo nikumutamba wakumujika, Gadi iseka dimu.

²⁸Kuŋinza yaGadi, kumutamba wakukabeta kakuchidiilu, watala kuchidiilu, ŋinza yakafumi kuTamari yakashiki kumeji akuMeribati Kadeshi, nikukakaloŋa kaEjipitu, yakahiti nikukaluŋalwiji keneni.

²⁹Denidi didi ituŋa dimwakayambwila nyichidi yawaIsarela nachinjikijilu chakusakula nachu kulonda kudiswanaŋa, wenawa diwu masekawu hamuchidi hamuchidi. Dimu mwanahoshivi Mwanta Yehova.

³⁰Tiyenu mawidikilu akekala kumukala. Kumutamba wakukabeta kakuchimunswa wakweseka munkotweli makombakaji awana namakulakaji atanu.

³¹Yisu yamukala yakekali namajina anyichidi yawaIsarela; kwena kuchimunswa oku yisu yisatu; chisu chaRubeni chimu; chisu chaYuda chimu; chisu chaLevi chimu.

³²Kumutamba wakumusela wamakombakaji awana namakulakaji atanu, yisu yisatu nawa; chisu chaYosefu chimu; chisu chaBenjamini chimu; chisu chaDani chimu.

³³Kumutamba wakukabeta kakuchidiilu wakweseka mumakombakaji awana namakulakaji atanu, yisu yisatu nawa; chisu chaSimeyona chimu; chisu chaIsakari chimu; chisu chaZebuluni chimu.

³⁴Kumutamba wakumujika wamakombakaji awana namakulakaji atanu hamu nayisu yawu yisatu; chisu chaGadi chimu; chisu chaAsheri chimu; chisu chaNafwatali chimu.

³⁵Kuwunyeŋumuka kwi-ndo makombakaji ikumi natanu nasatu. Kufumisha kwifuku odu ijina damukala akaditena nawu, Yehova Kwadiyi.