Read MUKANDA WANZAMBI Ezekiele 8 Bible Online

Ezekiele 8 - MUKANDA WANZAMBI bible

Ezekiele 8

¹Mumwaka wamuchitanu nachimu, mukakweji kamuchitanu nachimu, mwifuku dakakweji damuchitanu, chinadiŋi nashakama mwitala dami, niakulumpi awaYuda anashakami kumesu ami, chikasa chaMwanta Yehova hichikunholokela kwenoku.

²Nami nitali, hinukumona chifwikija chikumwekana neyi kesi; kufumisha kunamwekani neyi mbunda yindi nakukunkumwisha, kesi; kufumisha kumbunda yindi nakukandwisha kudi nakumwekana neyi kutoŋeka, kutalaku kudi neyi weŋi wamulombi.

³Yena hakwolola chuma chidi neyi chikasa, hakunkwatila kumukanji wansuki jakunamutu wami. Spiritu hakunnyamuna hakachi keseki newulu, hakuntwala kuYerusalema muyimwenu yaNzambi, hakuntwala kuwiŋililu wakuchisu chachipaŋu chamukachi, chatala kukabeta kakuchimunswa, kwashakamaŋa chifwikija chamukawu wasaŋumunaŋa mukawu.

⁴Kutala, hikudi kulema kwaNzambi yaIsarela, mwomwamwekeni chuma chinamweni muchana.

⁵Yena hakuŋila nindi, Eyi mwana kamuntu, fumbulaku mesu eyi, wutali kukabeta kakuchimunswa. Hinukufumbula mesu ami, hinukutala kukabeta kakuchimunswa, hinukumona kumbadi yachisu chakameŋa yakukabeta kakuchimunswa chifwikijochu chamukawu, chidi muwiŋililu.

⁶Yena hakuŋila nindi, Eyi mwana kamuntu, wunamoni chadi nakwilawu, tahindi? Wunamoni yishimashima yamaneni yidi nakukoŋawu akwamutaŋa waIsarela kunu, yinanleteshi ami kuya kwakulehi namalalami, tahindi? Keŋa wumoni nawa niyishimashima yamaneni yikwawu.

⁷Hakunshikŋa kuwiŋililu wakuchipaŋu. Chinelili nami nitali, mumbaŋu himudi muteta.

⁸Hakuŋila nindi, Eyi mwana kamuntu, pundaku dinu mumbaŋu. Chinapundili mumbaŋu, kutala hikudi chenzelu.

⁹Hakuŋila nindi, Iŋilaku wutali yishimashima yatama yidi nakukoŋawu kunu.

¹⁰Hinukwijila, hinukumona. Kutala hambaŋu jetala asoneka sonekahu nyitundu yejima yayuma yazalalaŋa niyawanyama ayishimashima, niakishi akutuŋa ejima amutaŋa wawaIsarela kwi-ndo.

¹¹Kumesu awu kwemeni awakulumpi akumutaŋa wawaIsarela makumi atanu nayedi, mukachi kawu nunemani mwana kaShafwani Yazaniya, wejima wawu adi nayeŋa yakusedela insensi kumakasawu, iwu nachindi, iwu nachindi. Kudi nakukamuka wishi wevumba dadeni dainsensi.

¹²Hakuŋila nindi, Eyi mwana kamuntu, wunamoni chadi nakwilawu akulumpi amutaŋa wawaIsarela mumwidima, mutupeka twamukachi kayifwikija yafuukulaŋawu, muntu himuntu, tahindi? Muloŋa wena adi nakwila nawu, Yehova hatumonaŋaku; nawu, Yehova naleki dehi ituŋa.

¹³Hakuŋila nawa nindi, Keŋa wumoni nawa niyishimashima yamaneni yikwawu yadi nakwilawu.

¹⁴Hakuntwala kuwiŋililu wakuchisu chakwitala daYehova chatala kukabeta kakuchimunswa. Kutala kunashakami ambanda, adi nakumudila Tamuzi.

¹⁵Hakuŋila nindi, Eyi mwana kamuntu, wunachimoni? Keŋa wumoni nawa yishimashima yabadika yeniyi.

¹⁶Hakuŋiŋija muchipaŋu chetala daYehova damukachi. Kutala kuchisu chatembeli yaYehova, kwela ikeki iku, kameŋa nawa iku, kudi amayala makumi ayedi natanu; omba nyima jawu kutembeli yaYehova, mesu awu atalisha kumusela; adiŋi nakudifukula kwitaŋwa kumusela.

¹⁷Hakuŋila nindi, Eyi mwana kamuntu, wunachimoni, tahindi? Chakukoŋakoŋawu akwamutaŋa waYuda yishimashima yadi nakukoŋawu kunu, anachimoni nawu hichuma chapepela, tahindi? Muloŋa wena anenzeshi dehi ituŋa namadombu, anabalumuki dehi nawu anvuloki nizuwi; hiyakusha nyitayi kumazulu awu.

¹⁸Dichi ami nawa nakakoŋa mwakulendumuka. Disu dami hidakaanakena muntuku, hinakatiya luwuku. Hela akabilela kumatu ami nezu deneni, hinakayitiyaku.