Read MUKANDA WANZAMBI Ezekiele 9 Bible Online

Ezekiele 9 - MUKANDA WANZAMBI bible

Ezekiele 9

¹Hakubilela kumatu ami nezu deneni, nindi, Kundamishaku kwakwihi antu ahembaŋa mukala, wejima wawu enzi nayitwa yawu yakujilumuna nachu kumakasawu, iwu nachindi, iwu nachindi.

²Nami nitali, amayala atanu nawumu hiyakufuma kunjila yakuchisu chakundundamu chatala kukabeta kakuchimunswa, wejima wawu adi nayitwa yawu yakujahana nachu kumakasawu, iwu nachindi, iwu nachindi; mukachi kawu mwadiŋi iyala wavweli mahina amawahi, mumbunda yindi mwadiŋi luseŋu lwawulombu lwamukwakusoneka. Hiyakwijila, hiyakwimana kwakwihi nakameŋa kawuneŋu.

³Henohu kulema kwaYehova kwanyamuka dehi kukerubi kukwadiŋi, kwaya dehi mbadi yeluŋa dakuchisu chetala. Hakutambika owu iyala wavweli mahina amawahi, wadiŋi naluseŋu lwawulombu lwamukwakusoneka mumbunda yindi.

⁴Yehova hakumwila nindi, Hitaku mukachi kamukala, mukachi kaYerusalema, wufundi mufunda hamahama awantu ejima adi nakushikoka nakudila nayishimashima yejima yadi nakukoŋakoŋawu mukachi kawu.

⁵Hakuyila akwawu, iku nidi nakutiya, nindi, Kahitenu mumukala, mwakamulondeli nakutaŋa antu. Disu denu bayi daka anakena muntuku, bayi mwakatiya luwuku.

⁶Kajilumunenu chikupu nimukulumpi nimukwenzi, nichaŋadima, nianyana anyanya, niambanda. Ilaŋa bayi mwaka kundama kwakwihi namuntu wukweti mufundaku; mwakatachikila kuma lalami. Hiyakutachikila kudi awakulumpi adiŋi kumesu etala.

⁷Hakuyila nindi, Tamishenu itala, mwakenzeshi muyiŋaŋu nawafu mwakajaha. Idikenu, muyi. Hiyakwidika, hiyakuya nakutaŋa antu mumukala.

⁸Cheliluwu hiyakutaŋa antu, ami nawa nashali dehi, hinukudimbuka chamesu hamaseki, hinukubilela nami, Ala Mwanta Yehova! Ichi chiwukwichila kulendumuka kweyi haYerusalema, keŋa wujilumuni aIsarela ejima anashali, tahindi?

⁹Hakuŋila nindi, Kuluwa kwamutaŋa waIsarela naYuda kwasweja dehi, ituŋa dinenzali dehi namashi, mumukala munenzali dehi mafwefu; muloŋa wena adi nakwila nawu, Yehova naleki dehi ituŋa; nawu, Hamonaŋaku.

¹⁰Ninami nawa, disu dami hidakaanakena muntuku, hinakatiya luwuku, yuma yelaŋawu nakayishikŋa hanyitu yawu.

¹¹Kutala iyala wavweli mahina amawahi, wadiŋi naluseŋu lwawulombu mumbunda yindi, hakwinza nakushimuna nsaŋu oyu, nindi, Nela dehi muwanleja.