Read MUKANDA WANZAMBI Daniele 1 Bible Online

Daniele 1 - MUKANDA WANZAMBI bible

Daniele 1

¹Mumwaka wamuchisatu wamwanta wawaYuda Yehova kimi, mwanta wakuBabiloni Nebukaneza wayili kuYerusalema nakuwukuchika.

²Yehova waheni mwanta wawaYuda Yehova kimi kudi Nebukaneza, hamu nayuma yi kwawu yamwitala daNzambi. Hakuyitwala mwituŋa dakuShinari, kwitala damukishi windi. Weŋŋili yumoyu mwitala damukishi windi dakuswekela yuma yalema.

³Mwanta hakuhosha namwanta wawatulala twindi Ashipenazi, nindi, Kaleti anyana kaIsarela akwivumu dawanta, niakudi ayilolu;

⁴chiŋa anyikwenzi akadi hatamawu, akweti lubanji, akweti wukalawenu wamaana ejima, eluka yuma yayivulu, akweti kashinshi kakwiluka yuma yakala, eluka kwimana muchipaŋu chamwanta; kulonda wuyilejaŋa ninyikanda niidimi dawaKaladeya.

⁵Mwanta hakuyitoŋwela yakudya yakadyaloŋawu hefuku hefuku, kwokudya t kwamwanta, nivinyu yanwaŋayi, kulonda akayidiishi chachiwahi nyaka yisatu, kulonda chiyakakuma nyakoyu akatweshi kwimana kumesu amwanta.

⁶Hadi wenowu anyikwenzi hadiŋi anyana kaYuda, iwu Danyeli, iwu Hananiya, iwu Mishayeli, iwu Azariya.

⁷Mukulumpi wawatulala hakuyitumba majinawu. Danyeli wanamutumbili, nindi Beleteshaza; Hananiya wanamutumbili, nindi Shadaraki; Mishayeli wanamutumbili, nindi Meshaki; Azariya wanamutumbili, nindi Abedinego.

⁸Ilaŋa Danyeli kwindi wafuukwili mumuchima windi, nindi, Kwonti kwami kudijilola nakudya kwamwanta, hela navinyu yanwaŋayi. Dichi wamulombeli mwanta wawatulala amwitŋi kubula kudijilola.

⁹Henohu Nzambi wafumba dehi muchima wamukulumpi wawatulala, kulonda Danyeli awani niwuselewa nikumutiyila wushona.

¹⁰Mukulumpi wawatulala hakumwila Danyeli, nindi, Ami natiyi woma wamwanta, diyi nayitoŋweli yakudya yenu niyimukunwaŋa. Neyi yena wakamona kumesu awakwenu anyikwenzi mwesekana nawu kunawahi, hakwila kumesu enu kunatami, chikuwaha? Keŋa munketwishi tuhu namutu wami kudi mwanta.

¹¹Danyeli hakumwila Meleza akunjikiluwu kudi mukulumpi wawatulala mudimu wakutala aDanyeli, naHananiya, naMishayeli, naAzariya,

¹²nindi, Atwesekuhu mwani, etu ambuŋeyi, mafuku ikumi; yakudya yetu atwinkaŋa kwayisakola hohu, yakunwa atwinkaŋa kwameji hohu.

¹³Wakatala chachiwahi kumesu etu, ni kumesu awanyikwenzi akudyaloŋa kudya kwamwanta; mwonsu muwakamona dimu muwakatwila etu ambuŋeyi.

¹⁴Dichi yena watiyili mwahosheluwu hansaŋu oyu, hakuyeseka mafuku ikumi.

¹⁵Chimunahiti mafuku ikumi, kumesu awu kwabadikili kuwaha, ninyijimba yawu yaswejeli kutoha, abadikili anyikwenzi ejima adiilaŋa kudya kwamwanta.

¹⁶Dichi Meleza hakufumisha kudya kwawu kwayitoŋweleluwu, nivinyu yakeŋeli kunwawu, hakuvinkaŋa kwayisakola hohu.

¹⁷Hakwila awa anyikwenzi awana Nzambi wayinkeli nikwiluka, nikashinshi kakwiluka nyikanda yejima, nima ana ejima. Danyeli wadiŋi nawa nakashinshi kakwiluka mwaya yimwenu yejima niyilota yejima.

¹⁸Chimunahiti mafuku ashiikiliyi mwanta akuyitwala, mukulumpi wawatulala hakuyitwala mwaNebukaneza.

¹⁹Mwanta hakuhosha nawu. Hadi anyikwenzi ejima hiyamwenuhu wakweseka naDanyeli, hela naHananiya, hela naMishayeli, hela naAzariyaku. Dichi wena hiyakwimanaŋa kumesu amwanta.

²⁰Hansaŋu jejima jayiihwiliyi mwanta, hela jamaana hela jakashinshi, wayimweni abadika nankashi mapampa ikumi atutepa ejima, niakwakutala tutumbwa ejima adiŋi mwituŋa dindi dejima.

²¹Danyeli washakaminumu kushika nikumwaka wamwanta Kirusi wakusambila.