Read MUKANDA WANZAMBI Daniele 10 Bible Online

Daniele 10 - MUKANDA WANZAMBI bible

Daniele 10

¹Mumwaka wamuchisatu wamwanta wakuPeresi Kirusi, amwekesheli chuma chimu kudi Danyeli atumbawu nawu Beleteshaza. Chumochu chadiŋi chalala, yadiŋi njita yeneni. Yena welukili mwaya chumochu, welukili mwaya chimwenu ochu.

²Hamafuku owu ami Danyeli nadilili nyilungu yisatu yamukuma.

³Hinadiili yakudya yakutiyisha kuwahaku, mbiji navinyu hiyahitili kukanwa kamuku, hela kuwaya manji nihanti nehi, chiŋa nyilungu yisatu yamukuma yinamani dehi.

⁴Mwifuku dakakweji kakusambila damakumi ayedi nakawana, chinadiŋi nakwimana kuchi kumu chakaloŋa muneni, yowu Hidekeli,

⁵hinukufumbula mesu ami nami nitali, hikudi muntu navwali ihina dadiwahi, mumbunda wakasamu wuru wakuUfwazi wakoseka.

⁶Mujimba windi wudi neyi berili, chifu chindi neyi chamwekanaŋa nzaji, mesu indi neyi manoŋu akesi, makasindi ninyendu yindi yamwekana neyi wuneŋu washilindindi, izu damazu indi neyi izu daluntu lwaluvulu.

⁷Ami Danyeli namweni chimwenu ochu kanka wami; muloŋa antu nadiŋi nawu hiyamweni chimwenu ochuku; ilaŋa kwayiholokeleli kuzaala kwakweni, hiyakutemuka nakubatama.

⁸Dichi nasheli kanka wami, hinukumona chimwenu ichi cheneni, mudami himwasheli Ŋovuku; kuwaha kwami kunadiŋi naku kubalumuka nikutoka, hinadiŋi nawa cheŋi naŋovuku.

⁹Hela chochu, natiyili izu damazu indi; chinatiyili izu damazu indi hinukudimbuka chamesu heseki namutulu twatweni, mesu ami atala heseki.

¹⁰Kutala, chikasa hichikunkunka, hichikunhindwisha hinukufukama kwakwila nakwati nimakasa heseki, iku nidi nakuzaala.

¹¹Hakuŋila nindi, Eyi Danyeli, eyi muntu wasweja kukeŋewa, ilukaku mazu inukukeŋa kuhosha naneyi, imanaku zulumba; muloŋa ami anantemeshi dehi kudeyi. Chananlejiyi izu idi, hinukwimana nakuzaala.

¹²Hakuŋila nindi, Danyeli, bayi wutiya womaku, muloŋa kufumisha kwifuku datachi diwashili muchima weyi kukwiluka nikukudizoza kumesu aNzambi yeyi, mazu eyi ayitiyili. Ninami nenzi dehi hansaŋu yamazu eyi.

¹³Ilaŋa kalamba ketuŋa dawaPeresi wadikaŋili nanami mafuku makumi ayedi nefuku dimu; kutala Mikeli, kalamba wumu wahadi atulamba abadika, hakwinza nakunkwashaku, namushiyi kwenoku hamu nawanyanta amuPeresi.

¹⁴Ichi dinu nenzi dehi nikuleji, kulonda wiluki yakamona muza wenu kumafuku akukuminina; chimwenu ochu muchidi mafuku amavulu.

¹⁵Chahosheliyi nanami mwaya mazu awa, hinukutalisha mesu ami heseki, niikala nikamama.

¹⁶Kutala wumu wafwana neyi anyana kawantu hakukunka kunyivumbu yami; hinukwasama mukanwa kami hinukuhosha, hinukumwila wemeni kumesu ami nami, Eyi nkaka yami, nachimwenu ochu nyisoŋu yinanwani dehi, hinikweti nawa cheŋi Ŋovuku.

¹⁷Eyi nkaka yami, ami kambuŋevi nukutwesha kuhosha ŋahi naneyi nkaka yami? muloŋa ami henohu mudami himwasheli nawa cheŋi Ŋovuku, himwasheli nawa cheŋi muuya ku.

¹⁸Hikukunkunka nawa cheŋi wumu wamwekana neyi muntu, hakunkolesha.

¹⁹Hakwila nindi, Eyi muntu wasweja kukeŋewa, bayi wutiya womaku; kuwunda kwikali naneyi; kolaku, eŋa kolaku. Chahosheliyi nanami nitiya niŋovu, nami, Eyi nkaka yami, hoshaŋa; muloŋa wunankoleshi dehi.

²⁰Hakwila nindi, Eyi wuneluki yinenjili kudeyi? Ichi dinu hinukufunta nakulwisha nakalamba kawaPeresi. Chinukuya kalamba kawaHeleni wakenza.

²¹Ilaŋa nukukuleja yanasonekuwu munsona yansaŋu yalala. Kwosi wankwashaŋa kulwa nawenawaku, chiŋa kalamba kenu Mikeli hohu.