Read MUKANDA WANZAMBI Daniele 11 Bible Online

Daniele 11 - MUKANDA WANZAMBI bible

Daniele 11

¹Hakwila ami mumwaka wakusambila wanowu kaMediya Dariyusa, nemeni nakumukwashaku nakumukolesha.

²Ichi dinu nukukuleja nsaŋu yalala. Tiya, muPeresi mwakemana anyanta amakwawu asatu; wamuchiwana wakabadika akwawu ejima kuheta. Chakelayi nakwati dehi Ŋovu namahetindi, wakayisaŋumuna wejima wawu ayi nakulwa netuŋa dawaHeleni.

³Kwakanyamuka lumwanta lwasweja Ŋovu, wakayula nawanta weneni, wakela mwaya muchima windi.

⁴Chakemanayi, wanta windi wakakotoka, akawubalula chakutalisha kumpepela jamwiwulu jiwana; ilaŋa hiyakawubalwila anyanindi, hela mwaya kuyula kwindi kwayuliliyuku; wanta windi akawubwita, wakekala wawantu acheŋi akulunjika kudawa.

⁵Mwanta wakukabeta kakuchimunswa wakekala naŋovu, nikalamba kindi wumu; yena wakekala naŋovu jakumubadika, wakekala nawanta wakuyula, wanta windi owu wakekala wanta weneni.

⁶Kwakakumina nyaka akadibomba; mwana kamwanta wakukabeta kakuchidiilu wamumbanda wakaya kudi mwanta wakukabeta kakuchimunswa nakutiyaloŋana nindi; ilaŋa yena mumbanda hakalama Ŋovu yachikasa chinduku; hela iyala niyena hakemanaku, hela chikasa chindi; ilaŋa yena mumbanda akamuhana, ninawa amuleteli, niiyala wamuvweli, niiyala wamwinkeli Ŋovu yena nyakoyu.

⁷Ilaŋa kumutombu wakafuma kunyiji yindi kwakemana wumu, wakahiŋaa mwayena, wakenza kwizaza danjita, wakeŋa ila mumpwembu yamwanta wakukabeta kakuchimunswa, wakayikoŋa, wakayiimika mushindu;

⁸wakanona akishi awu, ninkishi jawu jamawumba, niyuma yawu yasiliva nawuru yayiwahi, wakayitwala muEjipitu muwukoli. Nyaka yantesha wakaleka kuya nakulwa namwanta wakukabeta kakuchimunswa.

⁹Yena wakeŋa ila mwituŋa damwanta wakukabeta kakuchidiilu. Ilaŋa yena wakafunta cheŋi mwituŋa dindi yomweni.

¹⁰Anyanindi amayala akabutula njita, akapompesha luntu lwayendu yamaneni, akenzana ho-o, akasumpoka nikusumpoka, akahitamu. Akafunta cheŋi, akaasaŋa njita ndo nikumpwembu yindi.

¹¹Mwanta wakukabeta kakuchidiilu, kumuchima windi kwakamukuma nakuzuwa, wakedika nakulwa nindi, nayenowu mwanta wakukabeta kakuchimunswa. Wakatandamisha Iuntu lwaluvulu, luntu olu akaluhana kudi yena.

¹²Chakelayi natwali dehi luntu olu, muchima windi wakadinyamuna kwiwulu; wakadimbwisha makumi amakombakaji heseki, hela chochu, hakemika mushinduku.

¹³Mwanta wakukabeta kakuchimunswa wakafunta, wakatandamisha luntu lwaluvulu lwakubadika lwakusambila, wakenzaŋa ho-o hakakumina mpinji, yonyaka, wakenza nanjita yeneni, namaheta amavulu.

¹⁴Hampinji oju amavulu akemana nakulwa namwanta wakukabeta kakuchidiilu; akwandombu akumuza wenu nawa akadinyamuna kwiwulu kulonda akoleshi chimwenu ochu; Ilaŋa wena akadimbuka.

¹⁵Dichi mwanta wakukabeta kakuchimunswa wakenza, wakadima mpwembu, wakatambula mukala wadihata naŋovu. Yitwa yakukabeta kakuchidiilu hiyakadikaŋaku, hela muza windi watondayi, hikwakekala hela Ŋovu yakudikaŋa nihantuku.

¹⁶Ilaŋa yena wakenza nakulwa nindi, wakela mwaya muchima windi hohu, kwosi wakemana kumesu induku. Wakemana mwituŋa dalubanji, muchikasa chindi mwakekala jakujilumuna.

¹⁷Wakatalisha mesu indi chakwinza naŋovu yawanta windi wejima, wakenza namazu akutiyaloŋana nawakwakwoloka hamu nayena, wakela mwakeŋa ayi. Akamwinka mwana wamumbanda wakudi ambanda kulonda amutamishi; ilaŋa yena mumbanda hakemana hela kwikala wakumukwasha yenaku.

¹⁸Kulondela henohu wakatalisha mesu indi kuyitutu, wakatambula yayivulu. Ilaŋa kalamba wumu wakakumisha kusawula kwasawilaŋayi, mwalala, wakabalumuna kusawula kwasawilaŋayi kumubalumukili yomweni.

¹⁹Henohu wakatalisha mesu indi kumpwembu jakuhata mwituŋa dindi yomweni; ilaŋa yena wakahukana, wakadimbuka, hakamwekana nawa cheŋuku.

²⁰Mudi yena wuwabulili kwiluka muntu wakahitisha mukwakudya nyilambu mulubanji lwetuŋa; ilaŋa chimwakahita mafuku antesha akamukotola, hichakuzuwa indi kwiji chanjitaku.

²¹Mudi yena nawa mwakahina muntu wasekeshewa, abulili kwinkawu kulema kwetuŋa; ilaŋa wakenza mumwaka wakashakamawu antu chachiwahi, wakatambula ituŋa namazu akulambisha akwawu.

²²Akayikumpula kumesu indi nayitwa yadibaji, akakotoka; eŋa, nikalamba kachitiyaŋenu nawa.

²³Kulondela hakukana kwadikaninuwu nayena wakakoŋa mwakudimbana; muloŋa yena wakenza nakukanduka, wakakwata Ŋovu namuza wanyanya.

²⁴Hamwaka wakushakama chachiwahi wakenza hayipela yamuwuloŋu yasweja manji, wakela mwabulahu dehi kwila ankakulula jindi, hela ankakulula jawankakulula jindi; wakayimwaŋila mwaŋila niyanakwatuwu, niyanapupuwu, nimaheta. Eŋa, wakafuukula yifuukula yindi yakulwa nampwembu jakola, mwakahita mpinji.

²⁵Wakasaŋumuna Ŋovu jindi nawulobu windi wakuya nakulwa namwanta wakukabeta kakuchidiilu nanjita yeneni. Mwanta wakukabeta kakuchidiilu waka asa njita nanjita yindi yeneni nankashi yasweja Ŋovu. Hela chochu, hakemanaku, muloŋa akamufuukwila yifuukula yatama.

²⁶Eŋa, akadya yakudya yindi diwu akamukotola, ninjita yindi yakasumpoka; amavulu akadimboka afwa dehi.

²⁷Hakwila wenawa anyanta ayedi nyichima yawu yakaya mukwila chatama, akahosha yuma yakutwamba kumesa yawu yimu. Ilaŋa hichakalu mbulukaku; hela chochu, kukuma kwakenza hampinji yakutoŋola dehi.

²⁸Henohu wakafunta mwituŋa dindi namaheta amavulu; muchima windi hiwakakeŋa chitiyaŋenu chajilaku; wakakoŋa mwakeŋa ayi, wakafunta kwituŋa dindi yomweni.

²⁹Hampinji yakutoŋola dehi wakafunta, wakenza kukabeta kakuchidiilu; ilaŋa hakukuminina hichakekala neyi hakusambilaku.

³⁰Muloŋa maatu akuKitimi amaneni akenza nakulwa nayena; dichi yena wakatiya chikela, wakafunta cheŋi, wakazuwa nankashi nachitiyaŋenu chajila, wakakoŋa mwakeŋa ayi. Mwalala wakafunta, wakakwata mpùŋa nanawa akaleka chitiyaŋenu chajila.

³¹Kumutamba windi yena kwakemana yitwa, yakajilola malala, yoyi mpwembu yakuhata, yakafumisha himulambu wakushita wahefuku hefuku, yakashamu chishimashima chaleteshaŋa mahembi.

³²Awa akumotoka chitiyaŋenu wakayitamisha namazu akulambisha. Hakwila antu eluka Nzambi yawu akakola ngu, akakoŋa.

³³Awa ahadi antu akweti maana akaleja akwawu amavulu. Hela chochu, akadimbuka kumpoku yakabali, nikumulaŋu wakesi, nikuwukoli, nikukuyipupa, mafuku amavulu.

³⁴Chakadimbukawu akayikwasha kukwasha kwantesha; ilaŋa ntu amavulu akadibomba nawu namazu akulambisha.

³⁵Amakwawu akweti maana akadimbuka, kulonda kuyikosa, nikuyitookesha akatooki to-o, ndo nikumpinji yakukuminina; muloŋa chumichi chichidi chakumpinji yakutoŋola dehi.

³⁶Mwanta wakela mwakeŋa a muchima windi. Wakaditwala kwiwulu, wakaditohesha chakudibadisha hadi amaneni ejima, wakahosha yuma yakuhayama yakudiwula Nzambi yawanzambi. Wakaluŋa nichakawanishawu kuzuwa. Muloŋa chuma chatoŋolawu dehi akachikoŋa.

³⁷Hakasha muchima kudi Nzambi yawankakulula jindi, hela kukukeŋamba nda, hela kukubaŋa mukishuku; wakaditohesha chakudibadisha hadi ejima.

³⁸Wakalemeshaŋa mukishi wampwembu jakuhata; mukishi abulili kwilukawu ankakulula jindi diyi akalemeshayi yena nawuru, nasiliva, natumalola twalema wuseya, nayuma yayiwahi.

³⁹Mpwembu jakuhata jasweja Ŋovu wakajikoŋa naŋovu jamukishi wakwacheŋi, akamwitŋa wakayitohesha nakulema. Wakayinka wanta wakuyula antu amavulu, wakabalula balula ituŋa muwuseya muwuseya.

⁴⁰Hampinji yakukuminina mwanta wakukabeta kakuchidiilu wakamulotokela nanjita; mwanta wakukabeta kakuchimunswa wakenza nakulwa nindi neyi chinjimbi, namakálu, nawantu akwendela hatuwalu, namaatu amaneni amavulu. Wakeŋila mumatuŋa, wakasumpoka, ahita nikuhita.

⁴¹Wakeŋila nawa mwituŋa dalubanji, akashenkumuna matuŋa amavulu; tiyenu akapuluka kudi yena, Edomi, naMowabi, nachibalu chawanyana kaAmoni cheneni.

⁴²Wakolola makasindi hamatuŋa; niituŋa daEjipitu hidakapulukaku.

⁴³Wakekala nawanta wakuyula yuma yalema yawuru nasiliva, niyuma yamuEjipitu yalema; aLibiya nawaEtiyopiya akamulondelaŋa muchendu chindi.

⁴⁴Ilaŋa nsaŋu jakumusela nŋakukabeta kakuchimunswa jakamwakamisha; wakaya nakulendumuka nindi akakisaŋani, akajilumuni chikupu antu amavulu.

⁴⁵Wakalema matenti indi amaneni awanta kuneli kaluŋalwiji iku, mpidi yalubanji yajila iku, yena hakachi; ilaŋa jakamukuma, kwosi niniwu wakamukwashaku.