Read MUKANDA WANZAMBI Daniele 2 Bible Online

Daniele 2 - MUKANDA WANZAMBI bible

Daniele 2

¹Mumwaka wamuchiyedi wadiiliyi Nebukaneza wanta windi, Nebukaneza waloteli yilota. Muchima windi waakamini, nitulu twinditwamufumini.

²Mwanta hakutambika niatutepa, niakwakutala tutumbwa, niakwakupanda, niaKaladeya, kulonda amuleji mwanta yilota yindi. Dichi wena epilili nakwimana kumesu amwanta.

³Mwanta hakuyila nindi, Ami naloti, muchima wami hiwukwakama, nakeŋi kwiluka munaloti.

⁴AKaladeya hiyakumwila mwanta mwidimi daSiriya, nawu, Kalombu mwanta. Atuleji etu ambuŋeyi muwunaloti, etu tukulumbulula muchaya.

⁵Mwanta hakuyakula aKaladeya, nindi, Chuma chinanfumi dehi. Neyi mukubula kunleja munaloti, mubula kulumbulula muchaya, akayiketwola ngwa, ngwa, kwayikunku hohu, nimatalenu akayibalumuna mazalelu.

⁶Ilaŋa neyi mukunleja munaloti, munlumbulwila muchaya, mwakatambula kudami niyamukunkulu, nimasomu, ni kulema kwakweni. Dichi dinu nlejenu munaloti munlumbulwili muchaya.

⁷Wena hiyakumwakula kamuchiyedi, nawu, Mwanta atuleji etu ambuŋindi mwanalotiyi, etu tukulumbulula muchaya.

⁸Kuchinka mwanta nindi, Neluki dehi chalala komana munalondi kulabilamu nachu, muloŋa munanmoni chuma chinanfumi dehi.

⁹Dichi dinu neyi mukubula kunleja munaloti kunashali lushimbi lwenu lumu hohu. Muloŋa munandimbeki dehi namazu akutwamba atoka dehi, nichichamba kabalumuka mwaka. Dichi dinu nlejenu munaloti, dimu nakelukila nami munatweshi nikushimuna muchaya.

¹⁰AKaladeya ahosheli kumesu amwanta, nawu, Hanu hamaseki hihekala muntu niwumu wukutwesha kushimuna nsaŋu yamwantaku. Hela mwanta, hela chilolu, hela nyuli, hosi wehulahu dehi nsaŋu yidi neyi oyu kudi katepa, hela kudi mukwakutala tutumbwa, hela kudi kaKaladeyaku.

¹¹Chuma chanakeŋiyi mwanta hichuma chakala nankashi, kwosi muntu wacheŋi wakatwesha kuchishimuna kumesu amwantaku, chiŋa yomweni Nzambi hohu, wabulaŋa kushakama nawantu.

¹²Dichi mwanta wahilili, waswejeli kuzuwa, wahosheli nindi, Jahenu akwamaana amuBabiloni ejima.

¹³Ashimwini nawu akwamaana akuyijaha; hiyakukeŋakeŋa niDanyeli, ni akwawu ashakaminiyi nawu kulonda ayijahi.

¹⁴Danyeli hakuhosha nama ana nakashinshi naAriyoki, diyi wadiŋi mukulumpi wawambanji amwanta, atemesheluwu nawu akajahi akwamaana amuBabiloni.

¹⁵Wahosheli naAriyoki, mukulumpi wawambanji amwanta, nindi, Indi mwanta nadi hindilidi kuketula nsaŋu swayi chochichi? Ariyoki wamulejeli Danyeli chachiwahi mwaya nsaŋu.

¹⁶Danyeli wepilili mwadiŋiyi mwanta, wamulombeli nindi amuchindili mafuku, kulonda amulumbulwili mwaloteliyi.

¹⁷Danyeli wayili kwitala dindi, walejelumu aHananiya naMishayeli naAzariya, akwawu ashakaminiyi nawu,

¹⁸nindi, Tumulembelelenu Nzambi wamwiwulu atutiyili luwi nansaŋu iyi yakujinda, kulonda ninami Danyeli, ninenu akwetu nashakama nenu, twakabuli kujilumuka hamu nawakwetu akwamaana amuBabiloni.

¹⁹Chumochu chakujinda amumwekeshelelichu Danyeli hachimwenu chahawufuku. Danyeli wamukiswilili Nzambi wamwiwulu nkisu.

²⁰Danyeli wahosheli nindi, ijina daNzambi wamwiwulu datela adikiswili nkisu haya nyaka nanyaka. Muloŋa diyi wukweti nima ana niŋovu.

²¹Diyi wabalumunaŋa ninyaka niyilaaka. Diyi wafumishaŋa nyanta, diyi wadiishaŋa nawa anyanta wanta. Diyi wayinkaŋa a akwamaana maanawu, diyi wenkaŋa akwakashinshi kashinshi kawu.

²²Diyi nawa wamwekeshaŋa yuma yakunama yakujinda. Diyi weluka yekala mumwidima, nikucha kwekala kwadiyi yena.

²³Nakusakilili, nakuhameki, eyi Nzambi yawankakulula jami, yeyi wunanyinki nima ana niŋovu, yeyi wunanleji katataka chuma chitwadiŋi nakulomba. Muloŋa wunatuleji dehi nsaŋu yamwanta.

²⁴Dichi Danyeli hakuya mwadiŋiyi Ariyoki, akunjikiluwu kudi mwanta mudimu wakujaha akwamaana adiŋi muBabiloni. Wayili, wamulejeli nindi, Bayi wujaha akwamaana amuBabilonuku. Ntwali kudi mwanta, nimushimwini mwaloteliyi.

²⁵Hohenohu Ariyoki wamutweli Danyeli kudi mwanta lufuchi hohu, wamwilili nindi, Nawani dehi muntu wahadi anyana amuYuda akwatiluwu wukoli, diyi wukumulumbulwila mwanta mwaloteliyi.

²⁶Mwanta wahosheli naDanyeli wukweti ijina daBeleteshaza, nindi, Eyi kwaamu, wukutwesha kunleja munaloteli, wunlumbulwili muchaya?

²⁷Danyeli wahosheli kumesu amwanta, nindi, Hela akwamaana, hela akwakutala tutumbwa, hela atutepa, hela atuneŋa anakaŋanyi kumuleja mwanta chumochu chakujinda;

²⁸Ilaŋa Nzambi wudi kwoku, wekala mwiwulu, diyi wamwekeshaŋa hatooka yuma yakujinda, diyi namuleji mwanta Nebukaneza yuma yamba kamwekana kumafuku akukuminina. Tiya muwaloteli, tiya yuma yiwamweni kunamutu weyi hakadidi keyi.

²⁹Eyi mwanta, watachikili kweyi kutoŋojoka hakadidi keyi yuma yamba kamwekana kunyaka, niyenowu wamwekeshaŋa hatooka yuma yakujinda, nakuleji yuma yamba kamwekana.

³⁰Ami kwami hiyananmwekesheli chumichi chakujinda, nawu nabadiki antu ejima maanaku, ilaŋa analondi kumulumbulwila mwanta muchaya, kulonda eyi wakeluki yitoŋojoka yamumuchima weyi.

³¹Eyi mwanta, wadiŋi kweyi nakutala, hiwukumona nkishi yeneni. Nkishi oyu yadiŋi yatoha, yasweja kuwaha, yidi nikeji keji, yemeni kumesu eyi; yikweti woma nankashi kuyitala.

³²Nkishi oyu namutu windi wadiŋi wawuru wakoseka, nintulu yindi nimakasindi asiliva, ivumu dindi nimakatindi awuneŋu,

³³nyendu yindi yachikuŋu, madachilu indi ela aha nichikuŋu aha iwumba.

³⁴Chiwadiŋi nakutala wamweni ilola anadibaluli chakubula kubalula namakasa, hidikuhuma nkishi oyu kwokumadachilu indi adiŋi nichikuŋu niiwumba, dayichikili puchi puchi.

³⁵Henohu nichikuŋu, niiwumba, niwuneŋu, nisiliva, niwuru, yahumokeli kumu, humu humu, yelili neyi chelaŋa mafulu kuwuhulilu hamwaka wakwaŋula, yalelokeli nampepela, hiyamwekeni cheŋi nikuyayiluku. Ilola dahumini nkishi hidikubalumuka himpidi yeneni nankashi, hidikuwanina mumpata yejima.

³⁶Dimu waloteli. Tukulumbulula kumesu amwanta muchaya.

³⁷Eyi mwanta, eyi yeyi mwanta wawanyanta, Nzambi wamwiwulu nakwinki niwanta, niŋovu, nikukola, nimpuhu.

³⁸Kwejima kwashakamawu antu nakwinki dehi nianyama amwisaŋa, niatujila ahaluzwizu; nakwili dehi hiwumwanta wawu wejima wawu. Yeyi namutu wawuru.

³⁹Hadeyi hamba kalondela wanta wacheŋi wakuminamu, wákubula kweseka nawanta weyi; niwanta wukwawu wamuchisatu wawuneŋu, wakayula mpata yejima.

⁴⁰Wanta wamuchiwana wakekala wakola neyi chikuŋu; chahumunaŋa chikuŋu nakufwomona yuma yejima, chachikaŋa chikuŋu yuma yejimiyi, dichi chakela niwantowu, wakahumunaŋa nakuchika choche nochu.

⁴¹Chiwamweni nimadachilu ninyinu yela aha iwumba aha chikuŋu, wantowu wakela wanta wadambula. Ilaŋa mwakekala Ŋovu yidi neyi yachikuŋu, nanochu chiwamweni chikuŋu chakubomba newumba.

⁴²Chiyelili nyinu yakumadachilu aha chikuŋu, aha iwumba, dichi chiwakela niwantowu, aha wakola, aha wominina.

⁴³Ochu chiwamweni chikuŋu achibomba newumba, dichi chamba kadibombabombawu antu, hiyakalamata hamuku, chochabulaŋa chikuŋu kudibomba newumba.

⁴⁴Hamaluku amba kekala anyantowu, Nzambi wamwiwulu wamba kaloŋesha wanta wákubula kukisika haya nyaka, wantowu hiyamba kawushiyila antu acheŋuku; wakahumonaŋa mawantawa ejima puchi puchi, nakuyinoŋesha, wakemana mbe haya nyaka.

⁴⁵Ochu chiwamweni ilola anadibaluli mumpidi chakubula kubalula namakasa, hidikuchika nichikuŋu, niwuneŋu, niiwumba, nisiliva, niwuru, puchi puchi, Nzambi muneni namuleji mwanta yuma yamba kamwekana kwaya mbidi. Mwanalotuwu mwalala, ninamutunalumbululi, dimu nawa.

⁴⁶Mwanta Nebukaneza wadumbili chamesu indi heseki nakudifukula kudi Danyeli, hakuleja antu nindi, Mulambulenu Danyeli himulambu, mumwipukishi mavumba amawahi.

⁴⁷Mwanta wamwilili Danyeli nindi, Chalala Nzambi yeyi diyi Nzambi yawanzambi, diyi mukulumpi wawanyanta, diyi wamwekeshaŋa yayuma yajindewa, muloŋa eyi wunatweshi kumwekesha chumichi chadiŋi chakujinda.

⁴⁸Dichi mwanta wamutohesheli Danyeli, wamwinkeli yamukunkulu yayivulu yalema, wamwinkeli niwanta wakuyulaŋa wuloŋu waBabiloni wejima, akekali nguvulu wamukulumpi wakuyulaŋa akwamaana amuBabiloni ejima.

⁴⁹Danyeli walombeli kudi mwanta, yena hakuyinka aShadaraki, naMeshaki, naAbedinego nyidimu yakutala nsaŋu jamuwuloŋu waBabiloni. Hakwila Danyeli washakamini kuchota chamwanta.