Read MUKANDA WANZAMBI Daniele 3 Bible Online

Daniele 3 - MUKANDA WANZAMBI bible

Daniele 3

¹Mwanta Nebukaneza welili nkishi yawuru, chiminu chayu munkotweli jamakasa makumi atanu nadimu, mukutoha kwayu munkotwelŋamakasa jitanu nayimu. Wayiimikili muchana chaDura muwuloŋu waBabiloni.

²Mwanta Nebukaneza watemesheli antu nakupompesha ayilolu, niatulala, nianguvulu, niakwakuhosha nyiloŋa, niakwakukuŋa nyilambu, niakulumpi amuyota, niatupita, niayulilaŋa mawuloŋu, kulonda akenzi akajiliki mukishi wemikiliyi mwanta Nebukaneza.

³Nochu ayilolu, niatulala, nianguvulu, niakwakuhosha nyiloŋa, niakwakukuŋa nyilambu, niakulumpi amuyota, niatupita, niayulilaŋa mawuloŋu ejima, apompeli kulonda kujilika mukishi wemikiliyi mwanta Nebukaneza. Emeni kumesu amukishi wemikiliyi Nebukaneza.

⁴Mukwakubidika nsaŋu wabidikili naŋovu, nindi, Enu antu amwacheŋi namwacheŋi, enu nyuza yawantu, enu akwamadimi eŋi na eŋi, anayileji,

⁵nawu, Chimukutiya hiyakwimba jimpùŋa, nimapeleli, nitudada, nindimba, niyisanji, nimpanda, niyuma yakwimba yacheŋi nayacheŋi, mwakadinata hamaseki nakudifukula kudi mukishi wawuru wanemikiyi mwanta Nebukaneza.

⁶Yowu wakabula kudi nata hamaseki nakudifukula, yoyena mpinji oyu akamúumbila mukachi kaluteŋi ludi nakubidima kesi.

⁷Dichi dinu henohu owu antu amwacheŋi namwacheŋi ejima, chatiyiluwu hiyakwimba ŋŋimpùŋa, nimapeleli, nitudada, nindimba, niyisanji, niyuma yakwimba yacheŋi nayacheŋi, wenowu antu amwacheŋi namwacheŋi ejima, ninyuza yawantu, niakwamadimi eŋi na eŋi, hiyakudinata hamaseki nakudifukula kudi mukishi wawuru wemikiliyi mwanta Nebukaneza.

⁸Dichi henohu aKaladeya amakwawu aswilili kwakwihi nakuyinka aYudeya muloŋa.

⁹Ahosheli namwanta Nebukaneza nawu, Kalombu mwanta;

¹⁰eyi mwanta wunenkumu lushimbi lwakwila neyi antu ejima chiyakutiyawu jimpùŋa, nimapeleli, nitudada, nindimba, niyisanji, nimpanda, niyuma yakwimba yacheŋi nayacheŋi, akadinata hamaseki nakudifukula kudi mukishi wawuru.

¹¹Muntu wakabula kudi nata hamaseki nakudifukula, akamúumbila mukachi kaluteŋi ludi nakubidima kesi.

¹²Kudi aYudeya amakwawu wunakunjiki kumudimu wakutala nsaŋu jamuwuloŋu waBabiloni, wowu aShadaraki, naMeshaki, naAbedinego, wenowu antu kwawu, eyi mwanta, hiyanakushi kumuchimaku. Wena hiyapeshaŋa akishi eyuku, hiyadifukulaŋa kudi mukishi wawuru wunemikuku.

¹³Nebukaneza hakuzuwa, hakulendumuka, hakuyila nindi, Kaletenu aShadaraki, naMeshaki, naAbedinego. Nochu ayileteli wenowu amayala kudi mwanta.

¹⁴Nebukaneza hakuhosha nawena, nindi, Indi enu aShadaraki, naMeshaki, naAbedinego, chimwabulaŋa kupesha mukishi wami, hela kudifukula kudi mukishi wami wawuru wunemiki nehi, munatoŋojoki ŋahi?

¹⁵Ichi dinu chimukutiya jimpùŋa, nimapeleli, nitudada, nindimba, niyisanji, nimpanda, niyuma yakwimba yacheŋi nayacheŋi, neyi munatweshi kudi nata hamaseki nakudifukula kudi mukishi wami wuneli, chachiwahi. Neyi kudifukula nehi, akuyumbila mukachi kaluteŋi ludi nakubidima kesi, mpinji yoyenoyu hohu, indi Nzambinyi wukuyipulwisha kudami?

¹⁶AShadaraki, naMeshaki, naAbedinego amwakwili mwanta nawu, Eyi Nebukaneza, hitukukaba nakukwakula chumichuku.

¹⁷Hela chochu, Nzambi yetu twakalakelaŋa natweshi kutupulwisha muluteŋi ludi nakubidima kesi, ninodu wukutupulwisha kudeyi, eyi mwanta.

¹⁸Hela neyi nehi, ilukaku chachiwahi, eyi mwanta, etu kwetu kwonti kwetu kupesha akishi eyi, hela kudifukula kudi mukishi weyi wawuru wuwunemiki.

¹⁹Nebukaneza hakusweja kulendumuka nankashi, hakuzuwa nankashi, kumesu kwabalumukili neyi kwacheŋi hohu nawaShadaraki, naMeshaki, naAbedinego. Hakuhosha, hakuleja antu, nindi, Kazakasenu luteŋi mapampa katanu nakayedi, kakubadika muna muyaluzakasilaŋawu dikalu.

²⁰Hakuleja amayala amakwawu amunjita yindi asweja Ŋovu, nindi, Yikasenu aShadaraki, naMeshaki, naAbedinego, muyumbili muluteŋi ludi nakubidima kesi.

²¹Wenowu amayala ayikasili iku saŋa avwelelawu niyikovwelu yawu, nimahinawu, niyuma yawu yakuvwala yi kwawu, ayumbilili mukachi kaluteŋi ludi nakubidima kesi.

²²Nanochu chayihindishiliyi mwanta, nichaswejeli luteŋi kutata, nyizuzu yakesi yajahili owu amayala asendeli aShadaraki, naMeshaki, naAbedinego.

²³Hakwila awa amayala asatu aShadaraki, naMeshaki, naAbedinego aholokeli mukachi kaluteŋi ludi nakubidima kesi, iku saŋa ayikasilawu.

²⁴Mwanta Nebukaneza hakuhayama, hakunyamuka swayi swayi hohu, hakuhosha nakuyiihula antu indi awakulumpi amuchota, nindi, Etu hitwanata amayala asatu akukasa dehi mukachi kakesuku? Wena amwakwili mwanta nawu, Chalala mwanta.

²⁵Yena hakuyila nindi, Talenu, ami namoni amayala awana akadi kukasa adi nakwenda mukachi kakesi, hiyanamoni chuma chakuyikatishaku, wamuchiwana wudi neyi mwana kaNzambi.

²⁶Nebukaneza hakuya kwakwihi nachisu chaluteŋi ludi nakubidima kesi, hakwila nindi, Enu aShadaraki, naMeshaki, naAbedinego, enu aŋamba jaNzambi Wabadika Mwiwulu, idikenumu, twayenu kunu. AShadaraki, naMeshaki, naAbedinego hiyakufuma mukachi kakesi.

²⁷Niayilolu, niatulala, nianguvulu, niakulumpi amuchota chamwanta, apompeli, amweni awa amayala, komana kesi hikadiŋi naŋovu yakuyila nyijimba yawu chatamaku, kwosi hela kalusuki kakunyitu yawu kababikiluku, hela yi kovwelu yawu hiyabalumukiluku, nikadivumba kakesi kanunkiluwu kwosi.

²⁸Nebukaneza wahosheli nindi, Kisu kisu Nzambi yawaShadaraki, naMeshaki, naAbedinego, natemeshi kaŋelu kindi, napulwishi ambuŋindi amukuhwelela, anabalumuni izu damwanta, anahani nyijimba yawu, muŋa kwonti kwawu kupesha hela kudifukula kudi mukishi, chiŋa kudi Nzambi yawu hohu.

²⁹Dichi ami nashumu dehi lushimbi, nami, Antu amwacheŋi namwacheŋi ejima, ninyuza yawantu yejima, niakwamadimi acheŋi niacheŋi ejima, amba katenahu Nzambi yaShadaraki, naMeshaki, naAbedinego chatama, akayitetola ngwa, ngwa, kwayikunku hohu, nimatalawu akekala mazalelu. Muloŋa hikwekala mukishi watweshaŋa kupulwisha antu chochichuku.

³⁰Dichi mwanta wayilemesheli aShadaraki, naMeshaki, naAbedinego muwuloŋu waBabiloni.