Read MUKANDA WANZAMBI Daniele 4 Bible Online

Daniele 4 - MUKANDA WANZAMBI bible

Daniele 4

¹Ami Nebukaneza nasoneki mukanda wakutemeshela antu amwacheŋi namwacheŋi ejima, ninyuza yawantu yejima, niakwamadimi eŋi naŋi ejima, ashakama mwahita iseki dejima. Kuwunda kuyivulili.

²Natoŋojoki nami chachiwahi kushimuna niyinjikijilu, niyihayamisha yanankoŋiyi Nzambi Wabadika Mwiwulu.

³Yinjikijilu yindi o kutoha! Yihayamisha yindi o chiyasweja Ŋovu! Wanta windi hiwanta wahaya nyaka nanyaka, kuyula kwayulaŋayi yena kwakwila mufwawa muhiŋawa, mufwawa muhiŋawa.

⁴Ami Nebukaneza nadiŋi nakushakama mwitala dami chachiwahi, nadiŋi nakuluŋa muchipaŋu chami.

⁵Hinukulota chuma chantiyishili woma. Niyitoŋojoka yami yinatoŋojokeli hakadidi kami, niyuma yinamweni kunamutu wami yaloŋakamishili.

⁶Dichi nashilumu lushimbi lwakumpompeshela akwamaana amuBabiloni ejima, kulonda akanlumbulwili chachiwahi mwaya kulota kunaloteli.

⁷Niatutepa, niakwakutala tutumbwa, niaKaladeya, niatuneŋa, enjili munadiŋi. Ami nayawilili munaloteli, ilaŋa wena akaŋenyi kunlumbulwila muchayili.

⁸Nkumininaku Danyeli wenjili nakwimana kumesu ami, diyi atumbawu nawu Beleteshaza, mwomwekala niijina damukishi wami, mudi yena dimu mwekala spiritu yaNzambi wajila. Ami namwawilili munaloteli,

⁹nami, Eyi Beleteshaza, yeyi mukulumpi wawatutepa, neluki dehi nami mudeyi mwekala spiritu yaNzambi wajila, hikwekala chuma chakujinda chakwakamishaŋa eyuku, nleji dinu yimwenu yamukulota yinamoni, nlumbulwili muyaya.

¹⁰Tiya yuma yinamweni kunamutu wami hakadidi kami. Namweni mutondu fwi-i mukachi kampata yahamaseki, wasweja kuleha.

¹¹Mutondu owu hiwukukula, hiwukwikala naŋovu, insa yawu hiyikushika nimwiwulu, wenda wumwekana ho-o kunsa yampata kwejima.

¹²Mafu awu amawahi, ninyikabu yawu yayivulu, wadiŋi nayakudya yakuwanina antu ejima. Anyama amwisaŋa abatamini muwulelu wawu, atujila ahaluzwizu atunta mini munyitayi yawu, akwanyijimba ejima hiyakudiilaku.

¹³Kuyimwenu yakunamutu wami yinamweni hakadidi kami, namweni mukwakutalatala, mukwakujila, hakufuma mwiwulu nakwinza mwishina.

¹⁴Wabidikili naŋovu, welili nindi, Temenu owu mutondu, sakululenu nyitayi yawu, nyikumunenu mafu awu, palaŋeshenu nyikabu yawu; awa anyama afumi mwishina dawu, niatujila afumi munyitayi yawu.

¹⁵Hakwinza chishinji chawu shiyenu mumaseki yakukasa nakankasi kachikuŋu nawuneŋu, yishali mumunyenvu wamatahu amwisaŋa; wuzowaŋa nawuumi wamuluzwizu. Akadyaloŋa matahu indi hamu nawanyama.

¹⁶Muchima windi wadiŋi wamuntu wubalumuki, amwinki muchima wakanyama. Hadi yena hakahiti mpinji jitanu najiyedi.

¹⁷Nsaŋu yinu hinshimbiyawakwakutalatala. Hinsaŋu yambala yamukanwa kawakwakujila; kulondaakwakuhanda akeluki nawu komana Mukwakubadika Mwiwulu diyiwayulaŋa wanta wawantu, wawinkaŋa muntu anatoŋoliyi yowu, wadiishaŋamu wanta antu amukunkulu akadi kulema.

¹⁸Ami mwanta Nebukanezanaloti mwenimu. Eyi Beleteshaza, nlumbulwili muchaya, muloŋa akwamaana amwituŋa dami ejima anakaŋanyi kunlumbulwila muchaya, ilaŋaeyi kweyi wukutwesha, muloŋa mudeyi mwekala spiritu yaNzambiwajila.

¹⁹Danyeli, atumbawu nawu Beleteshaza, hakuhayama, hayamee. Yitoŋojoka yindi yamwakamishili. Mwanta hakumwila nindi, Eyi Beleteshaza, bayi wakama munaloti hela kulumbululamuku. Beleteshaza hakumwila nindi, Eyi nkaka yami, kulota kuwunaloti adi kuchimona kudi akuhelaŋa, hela muchaya adi kumonamu kudi ayilumbu jeyi.

²⁰Mutondu wamona, wadiŋi nakukula, wadiŋi naŋovu, washika nimwiwulu, wamwekana mwahita iseki dejima;

²¹wadiŋi namafu amawahi, wasoŋa ninyikabu yayivulu, wadiŋi nayakudya yakuwanina antu ejima, mwishina dawu mwashakama anyama amwisaŋa, wukweti ninyitayi yadiŋi nakushakama atujila ahaluzwizu;

²²mutondu owu yeyi mwanta, yeyi wunakuli, wunakwati Ŋovu; muloŋa kulema kweyeyi kunakuli, kunashiki nimwiwulu, wanta weyi wunashiki nikwakumina iseki.

²³Ochu chamonayi mwanta mukwakutalatala, mukwakujila, hakufuma mwiwulu hakwinza mwishina, hakwila nindi, Temenu owu mutondu, muwukisaŋani; shiyenu chishinji ninyiji yachu mumaseki, chakukasa nakankasi kachikuŋu nawuneŋu, chakashali mumunyenvu wamatahu amwisaŋa; wakazowaŋa nawuumi wamuluzwizu; akadyaloŋa hamu nawanyama amwisaŋa, ninichi chihakahita hadi yena mpinji jitanu najiyedi.

²⁴Tiya muchaya, eyi mwanta, hilushimbi lwambala lwaMukwakubadika Mwiwulu, dilu lunashiki dehi hadi nkaka yami mwanta.

²⁵Eyi akakuhaŋa mukachi kawantu, wakashakama hamu nawanyama amwisaŋa, akakudiishaŋa matahu neyi ŋombi, wakazowaŋa nawuumi wahaluzwizu, mpinji jitanu najiyedi jakahita hadeyi, nichiwamba keluka neyi komana Mukwakubadika Mwiwulu diyi wayulaŋa wanta wawantu, diyi wawinkaŋa anatoŋoliyi yowu.

²⁶Ochu chelawu nawu akashiyi chishinji chamutondu ninyiji yachu, wanta weyi wakela weyeyi chikupu, neyi wuneluki dehi neyi amwiwulu diwu ayulaŋa.

²⁷Dichi dinu mwanta, itŋiaku munukukuleja, lekaku nshidi jeyi wilaŋa mwaloŋa, lekaku muwaluwaluwaŋa, wuyikoŋelaŋa atuzweŋi yaluwi; wamba kela akakwanakena, wakashakama chachiwahi.

²⁸Yumiyi Nebukaneza wayimweni yejima.

²⁹Chimuneli tukweji ikumi natuyedi hitukuya nakumana, yena wadiŋi nakwendola muchipaŋu chindi chawanta chamuBabiloni.

³⁰Mwanta hakuhosha nindi, Iwu hidiyi Babiloni munenuku? Nawutuŋa dehi naŋovu jami jasweja; wikali mwami mwakushakama mwawanta, kulonda mpuhu yawanta wami yisweji.

³¹Iku izu dichidi tuhu mukanwa kamwanta, kwiwulu kuholoka niizu, nawu, Eyi mwanta Nebukaneza, anakuleji dehi; wanta weyi wunakufumi dehi.

³²Akukutemuna hadi antu, wakashakama hamu nawanyama amwisaŋa, akakudiishaŋa matahu neyi ŋombi, mpinji jitanu najiyedi jakahita hadeyi, ninichi chiwakeluka neyi Mukwakubadika Mwiwulu diyi wayulaŋa muwanta wawantu, diyi wawinkaŋa anatoŋoliyi yowu.

³³Yoyena mpinji oyu Nebukaneza wamweni chumochu. Amutemwini hadi antu, hakudyaloŋa matahu neyi ŋombi, mujimba windi hiwukuzowaŋa nawuumi wamuluzwizu; nsuki jindi jaleheli neyi mavuji ambuulu, mazalindi aleheli neyi mazala awatujila.

³⁴Chakumini wena mafuku owu, ami Nebukaneza hinukutala mwiwulu, hinukukiswila Mukwakubadika Mwiwulu nkisu, hinukumuhameka nakumulemesha yena wahanda haya nyaka; muloŋa kuyula kwindi kwahaya nyaka, niwanta windi saŋa wayila mufwawa muhiŋawa, mufwawa muhiŋawa.

³⁵Antu ejima ashakama hamaseki wayifuukula neyi hiyekala nikwokuku. Hela hayileŋaleŋa yamwiwulu, hela hadi ashakama hamaseki wakuminaŋa dakwila mwomwaya muchima windi hohu; kwosi muntu niwumu wukutwesha kumweta kuchikasa, hela kumwila nindi, Eyi wudi nakwila ŋahuku?

³⁶Henohu maanami afuntili cheŋi, nimpuhu yawanta wami, ni kulema kwami, nikuzúuma kwami kwafuntili cheŋi; niantu ami awakulumpi amuchota, niayilolu jami enjili nakunkeŋakeŋa. Wanta wami wakoleli cheŋi, hiyakunshilaku ni kulema kwakubadika.

³⁷Ichi dinu ami Nebukaneza hinukuhameka nakutúumbakesha nakulemesha Mwanta wamwiwulu; muloŋa nyidimu yindi yejima yalala hohu yákubula kutwamba, mwejima mwelaŋayi mwaloŋa hohu. Antu endaŋa nakudinka wanta, yena natweshi kuyikehesha.