Read MUKANDA WANZAMBI Daniele 5 Bible Online

Daniele 5 - MUKANDA WANZAMBI bible

Daniele 5

¹Mwanta Beleshaza watelekesheli chawija cheneni chakudiisha ayilolujindi ikombakaji, wanwini walwa kumesu awena ayilolu ikombakaji.

²Beleshaza, iku wudi nakunwa walwa, hakuleja antu nindi, Letenu mpasa nayeŋa, niyawuru niyasiliva, yafumishiliyi tata Nebukaneza mutembeli yamuYerusalema, kulonda ami mwanta, niayilolu jami, ni aŋodi jami, niantombu jami tunwinumu.

³Dichi aleteli mpasa nayeŋa yawuru vafumishiluwu mutembeli, doditala daNzambi dadiŋi kuYerusalema. Mwanta niayilolu jindi, ni aŋodi jindi, niantombu jindi hiyakunwinamu.

⁴Hiyakunwa walwa, hiyakuhameka akishi awuru, niasiliva, niawuneŋu, niayikuŋu, nianyitondu, niamalola.

⁵Hohenohu kwedikili nyinu yakuchikasa chamuntu, hiyikusoneka hashiŋwilawu hambaŋu yetala damwanta kwatalaŋana nenoŋu. Mwanta wamweni insa yachikasa chasonekeli.

⁶Kumesu amwanta hikukubalumuka; kumuchima windi kutoŋojoka kwachikela hohu, nimunkuma zokuzoku, nimumanuŋu zo-o, adihuma nikudihuma.

⁷Mwanta hakubidika naŋovu, nindi, Letenu niakwakutala tutumbwa, niaKaladeya, niatuneŋa. Mwanta hakuyila akwamaana amuBabiloni, nindi, Yowu wukutaŋa nsoŋiji nakulumbulula mujaya, akumuvwika mahina awusombu, niileŋi dawuru munshiŋu yindi, wukwi kala mukwakuyula wamuchisatu mwituŋa.

⁸Akwamaana amwanta ejima eŋila nikwijila. Ilaŋa wena kwawu hiyatwesheli kutaŋa nsonoju, hela kumulumbulwila mwanta mujayaku.

⁹Mwanta Beleshaza hakutiya chikela chakubadika, ni kumesu indi kubalumuka nikubalumuka, ayilolu jindi ahayama nikuhayama.

¹⁰Mwanta wamumbanda chatiyiliyi mazu amwanta nawayilolu jindi, hakwinza mwitala dakudiila. Mwanta wamumbanda hakuhosha nindi, Eyi mwanta, handaku haya nyaka. Yitoŋojoka yeyi bayi yikutiyishaŋa chikelaku, kumesu eyi bayi kubalumukaku.

¹¹Munu mwituŋa deyi mudi muntu wukweti spiritu yaNzambi wajila. Hadiŋiyi tata yeyi, amumweni yenowu muntu wadiŋi nachejeji, nikashinshi, nima ana, neyi maana aNzambi hohu. Tata yeyi mwanta Nebukaneza, diyi tata yeyi mwanta, wamwinkeli yenowu muntu wanta wawatutepa, nawakwakutala tutumbwa, nawaKaladeya, nawatuneŋa;

¹²muloŋa amumweni yenowu Danyeli, atumbiluwu kudi mwanta nindi Beleteshaza, wukweti spiritu yasweja kuwaha, nikwiluka, nikashinshi, watweshaŋa kulumbulula nimwaya yilota, watweshaŋa kushimuna mwaya nsaŋu jakala, nikukasununa nsaŋu jadikasa. Dichi dinu amutambiki Danyeli alumbululi nsoŋiji.

¹³Dichi amwiŋijili Danyeli mwadiŋiyi mwanta, mwanta hakumwihula Danyeli, nindi, Yeyi Danyeli, wukweti niakwenu akwatiluwu muYuda wukoli, afumishiliyi tata yami mwanta muYuda, tahindi?

¹⁴Nakutiyi dehi, nawu mudeyi mwekala spiritu yaNzambi, nawu wukweti chejeji nikashinshi, nima ana abadika kuwaha.

¹⁵Tiya dinu, akwamaana wowu akwakutala tutumbwa, anayileti dehi kunu kudami, kulonda ataŋi nsoŋiji, anlumbulwili mujaya. Ilaŋa wena kwawu anakaŋanyi kunlumbulwila mwaya chumichi.

¹⁶Hakwila eyi nakutiyi nawu watweshaŋa kulumbujola yuma, nakukasununa nsaŋu jadikasa. Tiya dinu, neyi wukutwesha kutaŋa ŋi nsona, nakulumbulula mujaya, akukuvwika mahina awusombu, niileŋi dawuru kunshiŋu yeyi, wukwi kala mukwakuyula wamuchisatu mwituŋa.

¹⁷Danyeli wa akwili nakuhosha kumesu amwanta, nindi, Yamukunkulu yeyi yidi shakamini, wufwetu weyi inkaku wacheŋi. Hela chochu, nukumutaŋila tuhu mwanta ŋi nsona, nakumulumbulwila mujaya.

¹⁸Eyi mwanta tiyaku, Nzambi Wabadika Mwiwulu wamwinkeli tata yeyi Nebukaneza nikuyula, ni kulema, nimpuhu, niwanta.

¹⁹Nanoku kulema kwamwinkeliyi, antu amwacheŋi namwacheŋi ejima, ninyuza yawantu yejima, niakwamadimi eŋi na eŋi ejima, akuminini dakumuzaala nikumutiya woma. Akeŋeliyi kujaha wayijahili tuhu, akeŋeliyi kuhandisha wayihandishili tuhu, akeŋeliyi kulemesha wayilemesheli tuhu, akeŋeliyi kukehesha wayikehesheli tuhu kwindi.

²⁰Ilaŋa chadivwimbiliyi mumuchima windi, nakuchinchika muspiritu yindi nakudivuna, amumwaŋili muwanta windi, amwamukili mpuhu yindi.

²¹Amutemwini mudi antu; muchima windi welili neyi wawanyama, washakamini hamu nawayimbulu amwisaŋa. Amudiishili matahu neyi ŋombi, nimujimba windi wadiŋi nakuzowa nawuumi wamuluzwizu, ninichi chelukiliyi nindikomana Nzambi Wabadika Mwiwulu diyi wayulaŋa mwituŋa dawantu, diyi wadiishaŋamu wanta yowu anatoŋoliyi yowu.

²²Hakwila eyi mwanindi, eyi Beleshaza, hiwunadizozi mumuchima weyuku, kutoŋa mwejimimu welukamu dehi tuhu kweyi.

²³Ilaŋa eyi kweyi wunadivwimbi naMwanta wamwiwulu, nimpasa jamwitala dambala anajileti kumesu eyi, nineyi, niayilolu jeyi, ni aŋodi jeyi, niantombu jeyi munanwinumu walwa. Eyi kweyi wunahameki akishi asiliva, niawuru, niawuneŋu, nianyitondu, niamalola, abulaŋa kumona, hela kutiya, hela kwiluka maana. Hakwila Nzambi wakwataŋa muuya weyi muchikasa chindi, wakwendeshaŋa muwayaloŋa mwejima, hiwunamulemeshi kweyuku.

²⁴Henohu dihu hanatemeshuwu insa yachikasa chakufuma kudi yena, hiyakusoneka ninsoniyi.

²⁵Tiya nsona yanasonekuwu, nawu, MENE, MENE, TEKELI, UPARISINI.

²⁶Tiya mwalumbulukila chumichi. MENE; Nzambi nachindi dehi wanta weyi, nawukumishi dehi.

²⁷Tekeli; eyi anakupezeleshi dehi hapezu, hiwunashiki mwoku.

²⁸Peresi; wanta weyi anawambuli dehi, anawinki aMediya nawaPeresi.

²⁹Dichi Beleshaza walejeli antu, amuvwikili Danyeli mahina awusombu, amuvwikili ileŋi dawuru munshiŋu yindi, abidikili nsaŋu yindi nawu, Diyi wukwi kala mukwakuyula wamuchisatu mwituŋa.

³⁰Wena wufuku owu kaKaladeya mwanta Beleshaza amujahili.

³¹KaMediya Dariyusa watambwili wanta, henohu nashiki dehi munyaka makumi atanu nadimu nanyaka yiyedi.