Read MUKANDA WANZAMBI Daniele 6 Bible Online

Daniele 6 - MUKANDA WANZAMBI bible

Daniele 6

¹Dariyusa watoŋojokeli nindi, Chachiwahi kusha mwituŋa dami ayilolu nkulakaji namakumi ayedi, kulonda ekali mwahita ituŋa damidejima.

²Nindi, Niwenowu ayilolu akekali nawawakulumpi jawu asatu; mukulumpi wumu Danyeli. Nindi, Wenowu ayilolu akayishimwinaŋa owu awakulumpi nsaŋu janyilambu, kulonda yuma yambala yamwanta yibulaŋa kuchachaŋana.

³Yeniwu Danyeli amumotwesheli hadi awakulumpi nawayilolu, muloŋa yena wadiŋi namuchima wawuwahi nankashi. Mwanta watoŋojokeli kumwinka wanta wakutala ituŋa dejima.

⁴Henohu niakulumpi niayilolu hiyakukeŋakeŋa hakumwinkela Danyeli muloŋa hansaŋu jetuŋa Ilaŋa wena akapenyi kumona hela hakumwinkela muloŋa, hela haluwilayi. Muloŋa yena wadiŋi washinshika, hiyamweni kachuma kakulweza hela kakuluwa mudi yenaku.

⁵Dichi wenowu amayala ahosheli nawu, Komana etu hitwakamona hakumwinkela iwu Danyeli muloŋaku, chiŋa hanshimbi jaNzambi yindi.

⁶Dichi dinu wenowu awakulumpi niayilolu apompeli kudi mwanta chakutiyaloŋana, hiyakumwila nawu, Mwanta Dariyusa, kalombu.

⁷Niawakulumpi amwituŋa, niatulala, niayilolu, niakulumpi amuyota, nianguvulu ejima anatiyaloŋani dehi nawu ashi lushimbi lwamuŋanda, ajiliki chila chakola nankashi, chakwila nawu, chimwakahita mafuku makumi asatu, antu kulomba chuma chiŋa akalomba kudeyi mwanta hohu, yowu wakalomba chuma kudi Nzambi hela kudi mukwawu muntu akamúumbila muwina wanyitupa.

⁸Dichi eyi mwanta, itŋiaku chila chinu, wusoneki niijina deyi kumukandiwu, kulonaa akabuli kuwubalumuna, neyi chelaŋawu nanshimbi jawaMediya nawaPeresi jakabalumunewaŋa.

⁹Dichi mwanta Dariyusa wasonekeli ijina dindi kumukanda wachila.

¹⁰Danyeli chatiyiliyi nawu anasoneki dehi ijina dambala kumukandowu, hakwipila mwitala dindi. Kwitala dindi dakwiwulu kwadiŋi njanina jachashi jatala mesu kuYerusalema. Hakufukamaŋa hamanuŋu, ifuku dimu mapampa kasatu, ifuku dimu mapampa kasatu, hakusakililaŋa kumesu aNzambi yindi, neyi chelilaŋayi hakusambila.

¹¹Dichi wenowu amayala apompeli chakutiyaloŋana, amumweni Danyeli wudi nakulomba nakulembelela kumesu aNzambi yindi.

¹²Hiyakukundama kwakwihi, hiyakuhosha namwanta nakutena chila chamwanta, nawu, Hiwunasoneki ijina deyi kuchila chakwila nawu, chimwakahita mafuku makumi asatu, antu kulomba chuma chiŋa akalomba kudeyi mwanta hohu, yowu wakalomba chuma kudi Nzambi, hela kudi mukwawu muntu, akumúumbila muwina wawanyitupaku? Mwanta hakuyakula nindi, Chalala, mwomwelaŋa nshimbi yawaMediya nawaPeresi yakabalumunewaŋa.

¹³Dichi wena hiyakuhosha kumesu amwanta, nawu, Iwu Danyeli akwatiluwu hamu nawanyana kaYuda hakusha eyi kumuchimaku, hela kuchila china chiwasoneka dehi niijina deyi, yena habaŋa nikwokuku, ilaŋa yena kwindi wudi nakulomba ifuku dimu mapampa kasatu.

¹⁴Dichi dinu mwanta chatiyiliyi mazu awa hakutiya kutama nankashi, hakuta muchima windi wejima hadi Danyeli nindi amupulwishi. Welili kabakane-e, nindi kwiji amuhandishi, niitena pokolu.

¹⁵Dichi wenowu amayala apompeli kudi mwanta chakutiyaloŋana, hiyakumwila mwanta nawu, Eyi mwanta tiyaku, aMediya nawaPeresi akweti lushimbi lwakwila nawu, kwosi hela chila hela izu dahoshayi dehi mwanta dakatwesha kubalununewaku.

¹⁶Dichi mwanta wayilejeli nindi, Muletenu Danyeli, mumúumbili muwina wawanyitupa. Mwanta hakumwila Danyeli nindi, Nzambi yeyi wakalakelaŋa mafuku ejima, diyi wakakuhandisha.

¹⁷Hiyakuleta ilola, hiyakudisha kuchisu chawina, mwanta hakulamikahu chilamiki chindi yomweni, nichilamiki chawayilolu jindi, kulonda abuli kubalumuna nsaŋu yaDanyeli.

¹⁸Mwanta hakufunta nikuchipaŋu chindi, hakukonkama wufuku wejima nanzala; mwadiŋiyi hiyatweli mwoku hela yuma yakwimbaku; nitulu twamufumini.

¹⁹Mwanta hakumenekesha budidi yayeni, hakuya kuwina wawanyitupa chakunyakala hohu.

²⁰Chashikiliyi kwakwihi nawina wadiŋiyi Danyeli, hakumubilela Danyeli nezu didi neyi dakudila hohu, nindi, Eyi Danyeli, eyi kambuŋa Nzambi wamumi, Nzambi yeyi wakalakelaŋa mafuku ejima, natweshi kukuhandisha kudi anyitupa?

²¹Kutiya Danyeli hakumwila mwanta nindi, Eyi mwanta, kalombu.

²²Nzambi yami natemeshi kaŋelu kindi, najiki tunwa twawanyitupa, hiyanankatishuku; muloŋa hinadiŋi namuloŋa kumesu induku, hela kumesu eyeyi mwanta hineli chuma chatamaku.

²³Dichi mwanta watiyili kuwaha nankashi, wayilejeli antu nindi, Mufumishenu Danyeli muwina. Amufumisha niDanyeli muwina, kumutala hosi hela hanti hanamukatishuwuku, muloŋa yena wakuhweleleli Nzambi yindi.

²⁴Mwanta hakuleja antu, antu hiyakuleta awa amayala amuholokeleli Danyeli; hiyakuyumbila muwina wawanyitupa, niwena, ni anyanawu, ni aŋodi jawu. Iku kanda ashiki nikwishina dawina, anyitupa ayikwata nikuyikwata, ayikotola nimafwahawu ejima kotu-kotu.

²⁵Dichi mwanta Dariyusa wasonekeli mukanda wakutemesha kudi antu akwacheŋi nakwacheŋi ejima, nikunyuza yawantu yejima, nikudi akwamadimi eŋi na eŋi ejima ashakama mwahita iseki dejima, nindi, Kuwunda kuyivulili.

²⁶Ami hinukushamu lushimbi lwakwila nami, mwahita ituŋa dawanta wami dejima, antu akamuzaali Nzambi yaDanyeli woma; muloŋa diyi Nzambi wamumi, wakola chahaya nyaka, wanta windi hiwamba kakisikaku, kuyula kwindi kwamba kashika nikunsa yanyaka.

²⁷Nikupulwisha antu diyi, nikuyihandisha diyi, diyi nawa wakoŋaŋa yinjikijilu nayihayamisha nimwiwulu nihamaseki. Diyi nahandishi Danyeli kudi anyitupa.

²⁸Dichi yeniwu Danyeli washakamini chachiwahi hanyaka yawanta waDariyusa niyawanta wakaPeresi Kirusi.