Read MUKANDA WANZAMBI Daniele 7 Bible Online

Daniele 7 - MUKANDA WANZAMBI bible

Daniele 7

¹Hamwaka wamuchimu wamwanta wakuBabiloni Beleshaza, Danyeli waloteli, wamweni yimwenu kunamutu windi hakadidi kindi. Hakusoneka mwaloteliyi, hakushimuna mwashika mazu owu.

²Danyeli hakuhosha nindi, Muchimwenu chami chawufuku namweni komana mpepela jamwiwulu jiwana, hijikulundumukila hewulu dakaluŋalwiji keneni.

³Mukaluŋalwiji himukufuma anyama amaneni awana, iwu wacheŋi, iwu wacheŋi, iwu wacheŋi, iwu wacheŋi.

⁴Wakusambila wadiŋi neyi mutupa, wadiŋi nampuula jambuulu. Chinadiŋi nakumutala, mpuula jindi ajibwita nikujibwita, amunyamuna niheseki, amwimika nihanyendu yiyedi neyi muntu, amwinka nimuchima wamuntu.

⁵Nami nitali, hikudi kanyama mukwawu, wamuchiyedi, wudi neyi bera, hakudinyamuna mutamba wumu, mukanwa kindi mudi mbavu jisatu nasumuhu. Hiyakumwila nawu, Nyamukaku wudyai mbiji yayivulu.

⁶Kulondela henaha nami nitali, hikudi mukwawu wudi neyi chisumpa, hanyima yindi hadi mpuula jakajila jiwana; kanyamowu wukweti nawa nyitu yiwana; amwinkeli wanta wakuyula.

⁷Kulondela henaha namweni muyimwenu yawufuku, kutala hikudi kanyama wamuchiwana wakutiya niwoma, wakuzaala, wasweja nankashi Ŋovu, wudi namaji ayikuŋu amaneni. Hakuvwotavwota, hakukotola kotola, yasheluhu hakuyidatola nanyendu yindi. Yena kudifwana nawanyama ejima ásambilili nehi, wacheŋi kwindi; wadiŋi nanseŋu ikumi.

⁸Nashinshikili nseŋu oju, kutala mukachi kaju himukumena kaluseŋu kakwawu kanyanya, nseŋu jakusambila jisatu hijikubwitika ninyiji yaju kumesu aku. Kutala mukaluseŋu oku mudi mesu adi neyi mesu amuntu, nikanwa kadi nakudisansula.

⁹Chinadiŋi nakutala, hiyakutenteka matanda awanta; Wakunyaka nanyaka hakutentama. Yuma yindi yavwalayi yitooka to-o neyi mpeza, nsuki jakunamutu windi jidi neyi wanda wawuwahi; itanda dindi dawanta hinyilaŋu yakesi, tufumbu twadu hikesi kabidimaŋa.

¹⁰Kaloŋa kakesi kadiŋi nakwidika, kadiŋi nakufuma kumesu indi. Makombakaji namakombakaji hiyakumukalakela, makumi amakombakaji amakumi amakombakaji hiyakwimana kumesu indi. Akwata nikukusompesha, hiyakubakula ninyikanda.

¹¹Chatiyakeni izu dadiŋi nakuhosha luseŋu mazu akudisansula hinukutalaku; hinukumona ninichi chakumujahawu owu kanyama, akisaŋana nimujimba windi, amwinka nimukesi kulonda asukumi.

¹²Hakwila awa anyama asheluhu ayifumishili hakuyula kwawu. Hela chochu, kukuhanda kwawu ayishililuku chilaaka chimu nimpinji yimu.

¹³Namweni muyimwenu yawufuku, kutala wumu wudi neyi mwana kamuntu, wudi nakwinza hamu namavu amwiwulu, yena hakwinza kudi Wanyaka nanyaka, hiyakumushikŋa kumesu indi.

¹⁴Amwinka nikuyula, nimpuhu, niwanta, kulonda antu amwacheŋi namwacheŋi ejima, ninyuza yawantu yejima, niakwamadimi eŋi na eŋi ejima akamukala kelaŋa. Kuyula kwindi Iilikuyula kwahaya nyaka nanyaka, hikwamba kahitaku, niwanta windi hiwamba kakisikaku.

¹⁵Hakwila ami Danyeli nitiya nimuchima mwivumu puchi, yimwenu yakunamutu wami yiŋakamisha nikuŋakamisha.

¹⁶Hinukukundama kwakwihi namwinawu wumu wemenuku, hinukumwihula mwaya yuma yejimiyi mwalala chikupu. Dichi hakunleja, hakunlumbulwila yumiyi.

¹⁷Nindi, Anyamawa amaneni, ekala awana, hiyanyanta awana akafuma hamaseki.

¹⁸Ilaŋa wanta akawutambula kudi akwakujila ambala aMukwakubadika Mwiwulu, diwu akekala nawantowu haya nyaka, nanyaka, nanyaka.

¹⁹Hinukukeŋa kwiluka mwalala chikupu nsaŋu yanowu kanyama wamuchiwana, wadiŋi wacheŋi, wabula kudifwana nawakwawu ejima; wakutiya niwoma, wukweti maji ayikuŋu, wukweti mazala awuneŋu; wadiŋi nakuvwotavwota, nikukotola kotola, nikudatola yasheluku nanyendu yindi;

²⁰nimwaya nsaŋu janseŋu ikumi jadiŋi kunamutu windi, nŋaluseŋu lukwawu lwameneni, lukweti nseŋu jikwawu jisatu jadimbukili kumesu alu; lwena Iuseŋolu lwadiŋi namesu, nikanwa kadiŋi nakudisansula, wamwekeni neyi nabadiki akwawu.

²¹Chinadiŋi nakutala, luseŋolu hilukudasa njita nawakwakujila, hilukuyiimika mushindu;

²²ninichi chakwinzayi Wanyaka nanyaka, ninichi chakuyinkawu akwakujila aMukwakubadika Mwiwulu mudimu wakusompesha; nichikushika mwaka wakwikalawu akwakujila nawantowu.

²³Hakwila nindi, Owu kanyama wamuchiwana wakekala wanta wamuchiwana hanu hamaseki, wakekala wacheŋi kwindi, wabula kudifwana namawanta acheŋi ejima, wakavwotavwotaŋa heseki dejima, wakadidatolaŋa nakudikotola kotola.

²⁴Hakwila oji nseŋu ikumi, muwantowu mwakamwekana anyanta ikumi. Munyima yawu mwakamwekana mwanta mukwawu; niyena nawa wakekala wacheŋi kwindi, wákubula kudifwana nawakwawu akusambila, wakafwomona anyanta asatu.

²⁵Wakahosha mazu achibeŋu akutena Mukwakubadika Mwiwulu, wakazeyesha akwakujila aMukwakubadika Mwiwulu. Wakatoŋojoka kubalumuna mpinji ninshimbi; akamwinkaju muchikasa chindi, kushika nikumpinji ŋijimpinji nimpinji yahafu.

²⁶Ilaŋa kakwata kukusompesha, akamutambula kuyula kwindi, kulonda akunoŋeshi, akukisaŋani ndo nikunsa.

²⁷Wantowu, nikuyuloku, ni kulema kwamawantowu mwishina dewulu dejima, akenka antu awakwakujila aMukwakubadika Mwiwulu. Wanta windi hiwanta wahaya nyaka, anyuli ejima akamukala kelaŋa nakumwovwahila.

²⁸Mwenimu dimu munakumini nsaŋu. Hakwila ami Danyeli, vitoŋojoka yami yaloŋakamishili nankashi, kumesu ami kubalumuka nikubalumuka. Ilaŋa nsaŋu oyu nayihembeli kumuchima wami.