Read MUKANDA WANZAMBI Daniele 8 Bible Online

Daniele 8 - MUKANDA WANZAMBI bible

Daniele 8

¹Mumwaka wamuchisatu wadiŋi nakuyulayi mwanta Beleshaza, chimwenu chamwekeni kudami, kudami Danyeli, chalondeleli hachi-mwenu chamwekeni kudami hakusambila.

²Muchimwenu ochu namweni; ohu nachimweni nadiŋi mwitala dawanta dakuShushani, dekala muwuloŋu wakuElami; muchimwenu ochu namweni, hinidi kukaloŋa Ulai.

³Hinukufumbula mesu ami, hinukumona, kutala oku kukaloŋa kunemani chizamba chamukoku chi kweti nseŋu jiyedi. Nseŋu oju jiyedi jajilehi; ilaŋa lumu lwabadikili lukwawu kuleha, lwalulehi lwolwameneni nkumininaku.

⁴Namweni ochu chizamba chamukoku hakushinjeka chakutalisha kumuji ka nikukabeta nakukabeta; kwosi anyama atwesheli kwimana kumesu induku, hikwadiŋi nawa muntu watwesheli kupulwisha mukwawu kudi yenaku; yena kwindi welili mwaya muchima windi hohu, waditohesheli yomweni.

⁵Chinadiŋi nakutoŋojoka chachiwahi, kutala chizamba champembi hakufuma kumuji ka, hakwinza hewulu deseki dejima, nikukunka tuhu heseki nehi. Ochu chizamba champembi chadiŋi naluseŋu lwatiyakana, lwamena hela disu iku, disu iku.

⁶Hakwinza kudi chizamba chamukoku chadiŋi nanseŋu jiyedi, chinamweni chinemani kukaloŋa, hakumulotokela chakumulendumukila naŋovu jindi.

⁷Namumweni hakwinza kwakwihi nachizamba chamukoku, hakumuzuwila nankashi, hakuhuma owu chizamba chamukoku, hakumukotola nseŋu jindi jiyedi. Chizamba chamukoku hadiŋi nawa naŋovu jakwimana kumesu induku; mukwawu hakumunata hamaseki, hakumudatola. Kwosi watwesheli kumupulwisha ochu chizamba chamukoku kudi yenaku.

⁸Ochu chizamba champembi waditohesheli nankashi. Ilaŋa chakwatiliyi Ŋovu, olu luseŋu lweneni lukotoka nikukotoka; himukuhiŋa nseŋu jiwana jatiyakana, jatala kumpepela jamwiwulu jiwana.

⁹Muluseŋu lumu himukumena kaluseŋu kanyanya, hikakusweja nikutoha chakutalisha kukabeta kakuchidiilu, nikumusela, nikwituŋa dalubanji.

¹⁰Lusweja nikutoha, kutoha kwakushika nikwizaza damwiwulu; lunatila niheseki yuma yamwizaza damwiwulu yi kwawu, nitutumbwa tukwawu, hakuyidatola.

¹¹Eŋa, lwaditohesheli kutoha kwakushika nikudi Kalamba kezaza; hilukumwamuka himulambu wakushita wahefuku hefuku, chipela chamalalindi chanatikili heseki.

¹²Alwinka niizaza hamu nahimulambu wakushita wahefuku hefuku hamuloŋa wakumotoka nshimbi; lwanatili ninsaŋu yalala heseki, lwelili mulwakeŋa eli, luluŋa nikuluŋa.

¹³Hinukutiya wajila wumu wudi nakuhosha; wajila mukwawu hakumwila owu wadiŋi nakuhosha, nindi, Ichi chimwenu chakutena himulambu wakushita wahefuku hefuku, nimuloŋa wakumotoka nshimbi waleteshaŋa mahembi, wakulekela malala niizaza ayidatolaŋa nanyendu yawantu, chanyaka yiŋahi?

¹⁴Hakumwila nindi, Chakashika kujimelela nakujibudidi makombakaji ayedi namakulakaji asatu; henohu dinu hakatookeshewa malala.

¹⁵Chinelili ami, ami Danyeli, namoni dehi ochu chimwenu, hinukukeŋakeŋa kwiluka muchalumbulukila; kutala kumesu ami kunemani wudi nakumwekana neyi muntu.

¹⁶Hinukutiya izu damuntu hakachi kaUlai, hakutambika nindi, Eyi Gabireli, mulumbulwili iwu muntu mwaya ochu chimwenu.

¹⁷Dichi yena hakwinza kwakwihi naniku kunemeni; chenjiliyi hinukutiya woma, hinukudimbuka chamesu heseki. Ilaŋa yena hakuŋila nindi, Eyi mwana kamuntu, ilukaku muchalumbulukila. Muloŋa ochu chimwenu chanyaka yakukuminina.

¹⁸Cheliliyi, iku wudi nakuhosha nanami, ami hinukuya namutulu twatweni chamesu chatala heseki. Ilaŋa yena hakunkunka, hakuŋimika.

¹⁹Nindi, Tiya, nikwilukishi yuma yakekala kunyaka yakukuminina yandombu. Muloŋa chimwenu china chanyaka yakukuminina yakutoŋola dehi.

²⁰Chizamba chamukoku chiwamweni chadiŋi nanoji nseŋu jiyedi, hiyanyanta jaMediyana Peresi.

²¹Yina mpembi yachizamba yavundakana mavuji himwanta wawaHeleni. Luseŋu lweneni lwekala disu iku, disu iku, lwena hakachi, diyi mwanta wakusambila.

²²Hakwila luna luseŋu lwakotokeli, muhiŋi jiwana, kumuzowu kwakamwekana mawanta awana, ilaŋa hiyakekala naŋovu jidi neyi jayenaku.

²³Munyaka yawanta wawu yakukuminina, hakelawu akwakumotoka nshimbi anawani dehi, hakamwekana mwanta wazuwa kumesu, weluka mwaya nsaŋu jakala kwiluka.

²⁴Ŋovu jindi jakasweja, ilaŋa hikuŊovu jindi yomwenuku; wakakisaŋanaŋa chakuhayamisha, wakaluŋa nakwila mwakeŋa ayi; wakakisaŋana amaneni, nimuza wajila.

²⁵Kumaanindi atama, kudimbana kwakemika mushindu muchikasa chindi; wakaditohesha mumuchima windi, wakakisaŋana antu amavulu, hakwilawu nawu tudi hamwena. Wakemana nawa nakudikaŋa naKalamba kawatulamba; hela chochu, wakakotoka chakadi nichikasa chinamukwati.

²⁶Chimwenu chajimelela najibudidi chanashimunuwu, chalala. Ilaŋa chimwenu ichi chiki; muloŋa chakumafuku amavulu akumbidi.

²⁷Ami Danyeli nihwidila nikuhwidila, hinukukata mafuku antesha; nkumininaku hinukunyamuka, hinukukwata kumudimu wamwanta. Ochu chimwenu nachihayamini, hosi muntu wachilukili muchayaku.