Read MUKANDA WANZAMBI Daniele 9 Bible Online

Daniele 9 - MUKANDA WANZAMBI bible

Daniele 9

¹Mumwaka wakusambila wamwana kaAhasuwenausi Dariyusa, wakumuchidi wawaMediya, diyi Dariyusa adiishiluwu wanta wamwituŋa dawaKaladeya;

²mumwaka wayuliliyi wakusambila, ami Danyeli nashinshikili kunyikanda mwachindiluwu nyaka yateneni izu daYehova denjili kudi kaprofwetu Yeremiya, yakuwanisha nachu mahembi akuYerusalema yonyaka makumi atanu nayedi.

³Hinukutalisha mesu ami kudi Mwanta Yehova, nimukeŋakeŋi nakulomba, nakulembelela, nakuleka kudya, nayikeleyi, namawuti.

⁴Hinukulomba kudi Yehova Nzambi yami, hinukudibayisha nami, Eyi Mwanta, eyi Nzambi muneni wakutiya woma, wahembaŋa chitiyaŋenu naluwi nanawa amukeŋa, ahembaŋa nshimbi jindi;

⁵tunavulumuni, tunaluwi, tunakoŋi chatama, tunadikani, tunasenuki nimuwalejaŋa nimuwuŋaji.

⁶Hitunatiyilili ambuneyi atuprofwetu ahoshelana mwijina deyi, alejelaŋa anyanta jetu, niatulamba twetu, niankakulula jetu, niantu ejima amwituŋaku.

⁷Eyi Mwanta, kuloŋa kwambala kweyeyi, hakwila etu kwetu kwansonyi hohu kumesu, neyi chitunamoni lelu, niaYuda, niashakama muYerusalema, niaIsarela ejima adi kwakwihi niadi kwakulehi, adi mwahita matuŋa ejima muwayihaŋahaŋila dehi nakumotoka kwamotokawu dehi nshimbi jeyi.

⁸Eyi Mwanta, nsonyi jinatukwati kumesu, nianyanta jetu, niatulamba twetu, niankakulula jetu, muloŋa tunakuvulumuni dehi.

⁹Yehova Nzambi yetu diyi wukweti luwi nŋakwanakena, hela tunadikaninindi.

¹⁰Hitunovwahili izu daYehova Nzambi yetu, twendi munshimbijindi janatushiliyi kumesu etu kutunwa twawambuŋindi atuprofwetuku.

¹¹Mwalala, aIsarela ejima anamotoki dehi nshimbi jeyi, anasenuki dehi hambadi, kulonda abuli kwovwahila izu deyi. Dihu hanafumi kutwichilaishiŋu nikusanyika kwasonekeluwu munshimbi jakambuŋa Nzambi Mosi; muloŋa tunakuvulumuni.

¹²Nakoleshi dehi mazu indi atuhosheliyi, etunawanyuli jetu atuyulilaŋa, nakutama kweneni kwanatuleteliyi. Muloŋa mwishina dewulu dejima kukoŋahu chuma chanakoŋuwu Yerusalema nehi.

¹³Kutama kwejimiku kunatuwani dehi neyi chanasonekuwu munshimbi jaMosi. Hela chochu, hitunalembi kudi Yehova Nzambi yetu netu tumoni wuselewa windi, kulonda tubalumuki tuleki kuluwaluwa kwetu, tushinshiki mwaya nsaŋu yeyi yalalaku.

¹⁴Dihu hanafumi kututala kudi Yehova kutala kwakutuletela vatama; muloŋa Yehova Nzambi yetu waloŋa kunyidimu yindi yejima yakoŋaŋayi; hakwila etu hitunovwahili izu dinduku.

¹⁵Ichi dinu, eyi Yehova Nzambi yetu wafumishili antu eyi muEjipitu nachikasa chaŋovu, watiyakana dehi mpuhu, neyi chitunamoni ifuku dalelu; etu tunavulumuni, tunakoŋi chatama.

¹⁶Eyi Mwanta, nalembi, itŋiaku kuteŋulula kuzuwa kweyi nikulendumuka kweyi kufumi kumukala weyi waYerusalema, kumpidi yeyi yajila, mwomwaya kuloŋa kweyi kwejima. Yerusalema nawantu eyi anasawuki kudi antu ejima atunyeŋumuka, namuloŋa wanshidi jetu nakuluwaluwa kwaluwilaŋa nkakulula jetu.

¹⁷Dichi dinu, eyi Nzambi yetu, tiyililaku kulomba kukulomba kambuŋeyi; nikulembelela kwakulembelelayi, malaleyi aneli dehi mahembi wuyitoŋekeli mesu eyi hamujimba waMwanta.

¹⁸Eyi Nzambi yami, teŋelekaku itu deyi wutiyi; tonaku mesu eyi wutali mahembetu, nimukala watumbawu ijina deyi; muloŋa kulembelela kwetu hitunakushikija kumesu eyi netu twaloŋaku, chiŋa naluwi lweyi lwasweja.

¹⁹Eyi Mwanta, tiya. Eyi Mwanta, anakenaku. Eyi Mwanta, tiyililaku wukoŋi. Eyi Nzambi yami, bayi wulabaku, ilaku yumiyi hamujimba weyeyi aweni, muloŋa mukala weyi niantu eyi ayitumba ijina deyi.

²⁰Iku nichidi kuhosha, nakulomba, nakudibayisha nanshidi yami, ninshidi yamuza wetu aIsarela, anamutuukishi kulembelela kwami kumesu aYehova Nzambi yami, hansaŋu yampidi yaNzambi yami yajila;

²¹mwalala, iku nidi nakuhosha mukulomba, owu iyala Gabireli namweni hakusambila muchimwenu ochu, anamutuukishi dehi lufuchi, hakunkunka kwakwihi nampinji yahimulambu wamelela.

²²Hakunlumbulwila, hakuhanjika nanami nindi, Eyi Danyeli, ami nediki dehi dinu, nenzi nakukwinka wukalawenu wakwiluka mwaya yuma.

²³Hiwatachikili kulembelela kwedikili izu, ami hinukwinza nakukuleja, muloŋa eyi wasweja kukeŋewa. Dichi toŋojokaku chachiwahi iyi nsaŋu, wushinshiki mwaya ochu chimwenu.

²⁴Hamuza wenu nihamukala wenu wajila ashahu dehi lushimbi lwanyilungu makumi atanu nayedi, kulonda kumanisha muloŋa wakumotoka nshimbi, kulonda kukumisha nshidi, kulonda kubuta kuluwa, kulonda kuletamu kuloŋa kwahaya nyaka, kulonda kulamika chimwenu nawupro-fwetu nachilamiki, kulonda kuwayisha wasweja kujila manji.

²⁵Ilukaku Lulufu; wushinshiki neyi, kufumisha hakwidika izu dakuloŋesha nakutuŋiulula Yerusalema, nakushikija kudi yena awayishawu dehi manji, yowu Kalamba, kwakekala nyilungu yitanu nayiyedi; ninyilungu makumi atanu nadimu nanyilungu yiyedi, akawutuŋulula cheŋi nimukwakwa, nimpwembu, m akuri, munyaka yakwakama.

²⁶Chimwakahita nyilungu oyu makumi atanu nadimu nanyilungu yiyedi, awayishawu dehi manji akamufumishamu, Makulona hakekala nachumaku. Antu akalamba wakenza akakisaŋana nimukala nimalala; kukumisha kwachu kwakekala nadibaji, hakekala njita ndo nikukukuminina; mahembi ayifuukula dehi.

²⁷Yena wakatiyaloŋana chitiyaŋenu chakola nawantu amavulu mulungu wumu; hakachi kamulungu owu wakalekesha nikuketula chimuna nihimulambu; halupuula lwayishi-mashima hakenza wumu waleteshaŋa mahembi, ndo nihakechilawu hadi mukwakuletesha mahembi kumanisha kwafuukulawu dehi.