Read MUKANDA WANZAMBI Hosea 1 Bible Online

Hosea 1 - MUKANDA WANZAMBI bible

Hosea 1

¹Izu daYehova denjili kudi mwana kaBeyeri Hoseya, mumafuku awanyanta awaYuda, Uziya, naYotami, naAhazi, naHezekiya, nimumafuku amwanta wawaIsarela, mwana kaYehowashi Yerobowami.

²Hásambilili Yehova kuhosha kukanwa kaHoseya, Yehova wamwilili Hoseya nindi, Yaku wusumbuli mumbanda wawuvumbi, wuvwali anyana nachivumbi; muloŋa itaŋa didi nakukoŋa wuvumbi wasweja chadi nakulekawu Yehova.

³Dichi hakuya nakusumbula mwana kaDibilayimi Gomeri; mumbanda hakubaaba ivumu, hakumuvwela mwana weyala.

⁴Yehova hakumwila nindi, Mutumbi ijina dindi, neyi Yezereyeli; muloŋa chihakuleha chanti nakababesha akwamutaŋa waYehu nansanu yamashi amuYezereyeli, niwanta wawakwamutaŋa waIsarela nakawukumisha.

⁵Ifuku odu nakakotola wuta waIsarela wamukunji muchinekineki chaYezereyeli.

⁶Hakubaaba ivumu di kwawu, hakuvwala mwana wamumbanda. Yehova hakumwila iyala nindi, Mutumbi ijina dindi, neyi Lo-ruhama;[1] muloŋa hinakayitiyila nawa cheŋi akwamutaŋa waIsarela luwi lwakuyanakena nyiloŋa yawu nihantuku.

⁷Ilaŋa kwamutaŋa waYuda nakayitiyila luwi, nakayamwina naYehova Nzambi yawu; hinakayamwina nawuta wamukunji, hela nampoku yakabali, hela nanjita, hela natuwalu, hela nawakwakwenda hatuwaluku.

⁸Chelili Lo-ruhama nasumuki dehi hakubaaba ivumu di kwawu, hakuvwala mwana weyala.

⁹Yehova nindi, Mutumbi ijina dindi, neyi Lo-amimi,[2] muloŋa enu himuyantu amuku, ninami hinukwikala Nzambi yenuku.

¹⁰Hela chochu, anyana kaIsarela akavula neyi wusekulula wakukaluŋalwiji wakesekewaŋa, wakachindewaŋa; muna mwayililuwu nawu, Himuyantu amuku, akayila nawu, Muyanyana kaNzambi wamumi.

¹¹Anyana kaYuda nawanyana kaIsarela akapompa hamu, akato ŋola mwanta wawu wumu, akakanduka mwituŋa, muloŋa ifuku daYezereyeli dakekala dalema.