Read MUKANDA WANZAMBI Hosea 10 Bible Online

Hosea 10 - MUKANDA WANZAMBI bible

Hosea 10

¹Isarela himuvinyu wafwankila, wasoŋaŋa nyikabu yindi. Mwavulila nyikabu yindi, dimu nawa mwanavulishiliyi tumeŋa twindi; mwafukila ituŋa dindi, dimu nawa mwanasoŋeliyi tuposhi twindi twakupeshela twalubanji.

²Muchima wawu wunaambuki mukachi, ichi dinu anayimoni anatanyi; yena wakahumona tumeŋa twawu, wakakisaŋana tuposhi twawu.

³Ichi dinu chalala akahosha nawu, Hitukweti mwantaku; muloŋa hitwamutiya Yehova womaku; ochu mwanta wakeŋa a kutwililadi?

⁴Adi nakuhosha kwamazu hohu, nakusanyika mwakutwamba hatiyaloŋanaŋawu yitiyaŋenu; dihu hakufuma kusompesha hikukumenamena neyi wululu wamwajaŋoŋu chiwamenaŋa munyondoŋolu yamwiha.

⁵Akwakushakama muSamariya akafwa mutentu wanyana kaŋombi akuBetaveni; muloŋa antu amukishi owu, niayikombeji amutiyilaŋa kuwaha, akamudila hansaŋu yakulema kwindi kunamufumi dehi.

⁶Akamutwala kuAshuri, akamuhani kudi mwanta Yarebi yahimulambu; aEfweremi akayitiyisha nsonyi, niaIsarela akatiya nsonyi yampùŋa yawu yatiyaŋenuwu.

⁷Hakwila Samariya, mwanta wawu anamufumishuhu, neyi mafulolu ahameji.

⁸Yinaŋanaŋa yakuAveni, diyi nshidi yawaIsarela, akayikisaŋana. Ninyiŋa ninyisonsonyi yakamena hatumena twawu; akayila mapidi amaneni nawu, Tubutenu; nimpidi janyanya nawu, Tuholokelenu.

⁹Enu aIsarela, kufumisha kumafuku aGibeya saŋa muvulumwina hohu. Kwenoku emeni; alondeli njita yakwasawu akwakuheŋa yakabuli kuyiwana muGibeya.

¹⁰Nakayeta hinakakeŋela; chakayikasilawu kunyiloŋa yawu yiyedi nyuza yawantu yakayipompela nandombu.

¹¹Efweremi wadiŋi iyoŋa daŋombi wamukaji wadiza dehi, wakeŋa elaŋa kudatola tidiku; ami naanakeneni nshiŋu yindi yasweja lubanji. Ichi dinu nukumusha hadi Efweremi mukwakwendelahu; Yuda wakadima, Yakoba wakahumona makenkindi.

¹²Ditumbilenu kuloŋa, mwakaaŋuli luwi; chipululenu mashindi enu; muloŋa diyi mpinji yakumukeŋakeŋa Yehova, nichakenzayi yena nakuyinokeshela nvula yakuloŋa.

¹³Enu munadimi kutama, munaaŋuli kuheŋa; munadyi nyikabu yakutwamba kumwatwambatwambaŋa; muloŋa mwakuhweleleli njila yenu, niizaza dawayilobu jenu.

¹⁴Dichi hakachi kamuza weyi hakavwakuka muyoyu, ninyikala yeyi yayipaka akayipupa yejima, neyi chapupiluwu Betarabeli kudi Shalimani mwifuku danjita. Amama jawantu ayichikili puchi puchi hamu nawanyanawu.

¹⁵Dichi chakayikoŋawu enu kudi Beteli namuloŋa wakutama kwenu kwasweja. Kukucha mwanta wawaIsarela akamufumishahu chikupu.