Read MUKANDA WANZAMBI Hosea 12 Bible Online

Hosea 12 - MUKANDA WANZAMBI bible

Hosea 12

¹Efweremi hakudya mpepela, hakuhaŋa mpepela yakumusela. Mafuku ejima wavulishaŋa niyakutwamba niyakukisika; hiyakutiyaloŋana chitiyaŋenu nawaAshuri, hiyakutwalaŋa manji kuEjipitu.

²NiYuda nawa wudi namuloŋa kudi Yehova, wakababesha Yakoba chakweseka nanjila jenda ŋayi, wakamufweta chakweseka nayuma yelaŋayi.

³Chadiŋiyi mwivumu wakwatili mana kwindi kukapokosu, chakuliliyi welili mukwaŋovu naNzambi.

⁴Mwalala wabadikili nakaŋelu Ŋovu, wemi kili mushindu; wadilili, wamulembeleleli. Wamuweni kuBeteli, kwenoku diku kwahosheliyi nanetu;

⁵diyi Yehova Nzambi wamazaza, ijina dindi dakumwanuka nachu diyi Yehova.

⁶Dichi funtaku kudi hitunyikala twahilili hamu naSodoma. Nzambi yeyi. Kakelaku luwi nawuŋaji, muchiŋilili Nzambi yeyi mafuku ejima.

⁷Isarela himukwakulandujola, kuchikasa chindi kudi pezu jakudimbana nachu; yena watiyaloŋa kuwaha kukabisha akwawu.

⁸Efweremi welili nindi, Chalala ami naheta dehi, nawana dehi maheta. Munakabakanaŋa mwejima hiyakawana mudami chuma chakuluwa chinekali nshiduku.

⁹Ami Yehova Nzambi yeyi, saŋa nekalila wakufuma kwituŋa daEjipitu; yami nakakushakamisha cheŋi mumatenti, neyi chimwelili hachawija chakushiika.

¹⁰Yami nahosheli nawatuprofwetu; yami navulishili yimwenu, yami natili yishimu kutunwa twawatuprofwetu.

¹¹Komana Gileyadi diyi kuluwa? Wena kwawu anekali akuhemesha chikupu. MuGiligali dimu mwaketwililuwu aŋombi amayala. Mwalala tumeŋa twawu tudi neyi nyilumba yamunyondoŋolu yamumaha.

¹²Yakoba watemukilili mpata yaSiriya, Isarela wakalakeleli mumbanda wakusumbula, wabiŋilaŋa nyikoku kulonda amoni mumbanda wakusumbula.

¹³Yehova wafumishili aIsarela muEjipitu nakaprofwetu, wayihembeli nakaprofwetu nawa.

¹⁴Efweremi namuvuloki Nzambi kulonda azuwi chalula nankashi; dichi mashi indi akamukumina yomweni, Yehova windi wakamulubwila cheŋi kusawuka kwanasawukiyi.