Read MUKANDA WANZAMBI Hosea 13 Bible Online

Hosea 13 - MUKANDA WANZAMBI bible

Hosea 13

¹Chahoshelaŋayi Efweremi nakuzaala, watiiumbakeni muIsarela; ilaŋa chatanyiniyi nansaŋu yaBayali, ofwa ni kufwa.

²Ichi dinu hiyakusweja nikuvulumuna, adisuŋunwina dehi akishi asiliva yawu, wowu akishi aya mwaya maanawu awenawu, ejima hinyidimu yawukalawenu, hiyakuyila nawu, Amayala akuketwilaku yimuna diwu akupwepujola anyana kaŋombi awuru.

³Dichi wena akekala neyi ivu dabudidi, neyi wuumi womaŋa swayi hohu, neyi muzuŋu walelokaŋa kuwuhulilu nachinjimbi, neyi wishi wafumaŋa mumunkinyi.

⁴Ami saŋa nekalila Yehova Nzambi yeyi wakufuma kwitaŋa daEjipitu; bayi wakeluka nzambi wacheŋuku, chiŋa yami hohu; hikudi chamwinu wacheŋuku, chiŋa yami hohu kanka wami.

⁵Yami nayilukili mwisaŋa, mwitaŋa dasweja yaaŋa.

⁶Chadiiluwu ekuta nikwikuta, nimavumu mbe, atwala ninyichima yawu kwiwulu; dichi chananvulamenuwu ami.

⁷Dichi ami anmona nekala neyi mutupa; nakayibelamina kunjila neyi chisumpa;

⁸nakayibulakana neyi bera anajahiluwu anyanindi, nakayibalula hakapaamba kamuchima; kwenoku nakayivwota neyi mutupa; akayitabola kudi kanyama wamwisaŋa.

⁹Eyi Isarela, ochu chiwunamoni kukisika, chinafumi hakudikaŋa nami nkwashi yeyi.

¹⁰Ichi dinu mwanta wenu wudi kudihi kulonda ayamwini munyikala yenu yejima? Niansompeshi jenu imwelili nenu, Twinkenu nimwanta niatulamba; adi kudihi?

¹¹Chinazuwili nayinkeli mwanta, chinatiyili jandombu namufumishiluku.

¹²Anakasi kuluwa kwaEfwenae-mi; anatudiki nshidi yindi.

¹³Nyisoŋu yamonaŋa mumbanda wudi nakuvwala yakamuwana. Himwana weyala wakadi maana; muloŋa hatelela kuvwalika, yena kushikila hakuvwalika mwivumu nehi.

¹⁴Ami nakayikuula kuŊovu yejamu; nakayikuula kukufwa. Eyi kufwa, nyisoŋu yeyi yidihi? Eyi ŋamu, kukisaŋana kweyi kudihi? Kubalumuka mumuchima kwakajindewa kumesu ami.

¹⁵Hela wakasemununa mukachi kawana kwindi, kwakenza mpepela yakumusela; yoyi mpepela yaYehova yakafuma kwisaŋa, nikasulu kindi kakoma chau, nikaseloki kindi kakoma chikupu; yakakisaŋana mwaswekaŋayi yuma yindi yayiwahi yejima.

¹⁶Samariya kutanya kwindi wakakukoola; muloŋa yena wadikaŋili naNzambi yindi. Akadimbuka kumpoku yakabali; anyanawu akayichika puchi puchi; ambandawu adi namavumu akayibuza.