Read MUKANDA WANZAMBI Hosea 2 Bible Online

Hosea 2 - MUKANDA WANZAMBI bible

Hosea 2

¹Yilenu ana kwenu nenu, Amimi;[3] niahelenu nenu, Ruhama.[4]

²Mulembelelenu mama yenu, lembelelenu chacheni; muloŋa yena hiŋodamuku, ninami hininfumwinduku. Akafumishi mawuvumbi indi kumesu indi, nimawujila indi hakachi kamayeli indi;

³mukunkulwayi nakamuvúula akekali nzekesi, akekali neyi chadiŋiyi ifuku davwalikiliyi, nakamubalumuna ekali chinkalampata, ekali neyi mpata yawuma yakadi meji, nakamujaha nampwila;

⁴mwalala, anyanindi hinakayitiyila luwi lwakuyanakenaku; muloŋa wena hiyanyana awuvumbi.

⁵Muloŋa mama yawu nakoŋa koŋi wuvumbi; wayimitili nakoŋi yansonyi; muloŋa yena nahoshi nindi, Nukuya nakulondela ami ankeŋa, anyinkaŋa kudya kwami nimeji ami, anyinkaŋa mavuji ami, niwanda wami nimanji ami, niyuma yinanwaŋa.

⁶Dichi dinu tiya, kunjila yeyi nukukolekaku ikoli danyiŋa, nukunamutuŋila chipaka, kulonda akakaŋanyi kumona njila jindi.

⁷Wakalonda indi amukeŋa, hakayiwanaku; wakayikeŋakeŋa, hakayimonaku; henohu wakahosha nindi, Niyi nifunti kudi nfumwami wakusambila, muloŋa nadiŋi nakumona kuwaha kubadika chinidi nakumona katataka.

⁸Muloŋa yena kwiluka nindi yami namwinkelaŋa tidiku navinyu nimanji, hela nindi yami namuvulishililaŋa siliva nawuru yapeshelaŋawu nachu Bayali, nehi.

⁹Dichi komana nakafumisha tidiku yami hachila aka chayu, nivinyu yami hachila aka chayu, nakafumisha mavuji ami anyikoku, niwanda wami wakeŋeli kuvwalayi hakekalayi nawuvu.

¹⁰Nakamwekesha wusonyi windi hatooka kumesu anowu amukeŋa, kwosi muntu wakamupulwisha kudamuku.

¹¹Kuzaŋajala kwindi kwejima nakakukumisha, niyawija yindi yakushiika, nitukweji twindi tukwalukaŋa, nisabata jindi, niyipompelu yindi yalema yejima.

¹²Nakakisaŋana nyivinyu yindi, niyikuyu yindi yanateniyi nindi wowu wufwetu wami wananyinkuwu kudi ami ankeŋa. Nakayibalumuna kwikala isaŋa, akayidyaloŋa kudi anyama amumpata.

¹³Yehova nindi, Nakamubabesha nansaŋu yamafuku awaBayali ochelelaŋayi insensi; hadiŋi nakudileŋa leŋayi natuzeya twindi twakumatu, niyingelingeli yindi, hadiŋi nakulondelayi indi amukeŋeli, hanvulameneniyi.

¹⁴Dichi dinu tiyenu, nakamukokweja, nakamutwala mwisaŋa, nakahosha nindi mazu ashika nikumuchima windi.

¹⁵Nakamwinka matempindi anyivinyu kwenoku, hichinekineki chaAkori chakekali chisu chachikuhwelela. Yena waketiya kwenoku, neyi cheliliyi mumafuku awansi windi, nimwifuku dakandukiliyi mwituŋa daEjipitu.

¹⁶Yehova nindi, Hefuku odu wakantena neyi, Nfumwami; hiwakantena nawa cheŋi neyi, Bayaluku.[5]

¹⁷Muloŋa ami nakafumisha majina awaBayali mukanwa kindi, hiyakayitena nawa cheŋi hamajinawuku.

¹⁸Hefuku odu nakayitiyaŋena chitiyaŋenu nawanyama amumpata, nawatujila ahaluzwizu, niyuma yazalalaŋa hamaseki. Nakafumisha mwituŋa nimata anyikunji nimpoku jatubali ninjita, nakayikamika chakadi kwakama.

¹⁹Nakakusumbula wakekalaŋa wami haya nyaka; mwalala, nakakusumbula wakekalaŋa wami mukuloŋa, nimuwuŋaji, nimuluwi, nimukwanakena.

²⁰Nakakusumbula wakekalaŋa wami mukashinshi; wakamwiluki Yehova.

²¹Yehova nindi, Hefuku odu naketiya, naketiya mawulu, wena nawa aketiya iseki;

²²iseki daketiya tidiku nivinyu nimanji; niwena aketiya Yezereyeli.

²³Ami nakamuti imba akekalaŋa wami mumaseki; wabulilaŋa kumona kumwanakena nakamwanakena; abulili kwikala antu ami nakayila nami, Muyantu ami; niwena akela iwu nindi, Yeyi Nzambi yami, iwu nindi, Yeyi Nzambi yami.