Read MUKANDA WANZAMBI Hosea 4 Bible Online

Hosea 4 - MUKANDA WANZAMBI bible

Hosea 4

¹Enu anyana kaIsarela, tiyenu izu daYehova, muloŋa Yehova nenki ashakama mwituŋa muloŋa, muloŋa mwituŋa himudi kuhosha nsaŋu yalala, hela kwanakena, hela kwiluka Nzambuku;

²mudi kwakusanyika, nakutwamba, nikujahana, nikwiya, nikwila wuvumbi; akuminaŋa dakudilundamu hohu, niwubanji wadilonda nawubanji.

³Dichi ituŋa dakadila, niantu ejima ashakamamu akazeelela hamu nawanyama amumpata, nawatujila ahaluzwizu; mwalala, ninshi jamukaluŋalwiji akajifumishaku nawa.

⁴Hela chochu, bayi muntu azuŋa namukwawu hela kwinka mukwawu muloŋaku; muloŋa antu ami adi neyi antu azuŋaŋa nakapristu.

⁵Eyi wakadimbuka namwa ana, kaprofwetu nawa wakadimbukila hamu naneyi nawufuku; ninami nakakisaŋana mama yeyi.

⁶Antu ami anakisikili kubula kwiluka; ochu chiwunaleki kwiluka, ninami nakakulekeyi, kulonda wubuli kwikala kapristu kami. Chiwunavulameni nshimbi jaNzambi yeyi, ami nawa nakavulamena anyaneyi.

⁷Chaswejeluwu kuvula, hiyakusweja nikunvulumuna. Nakabalumuna kulema kwawu kwakekali nsonyi.

⁸Adiilaŋa kunshidi yawantu ami, asha dehi nyichima yawu kukuluwa kwawu.

⁹Chakela mukwikalila antu, dimu mukwikalila nikapristu; nakayibabesha nanjila jendaŋawu, nakayilubwila niyuma yelaŋawu.

¹⁰Akadya ilaŋa kwikuta nehi; akela wuvumbi ilaŋa kuvula nehi; muŋa wena analeki dehi kutiyilila kudi Yehova.

¹¹Wuvumbi navinyu nivinyu yayiha yidi nakuyifumisha kashinshi.

¹²Antu ami ehulaŋa maana kunyitondu yawu, nyishi yawu diyi yidi nakuyishimwina; spiritu yawujila yinayiluwishi, anafumi mwishina daNzambi yawu, anayi nakwila wuvumbi.

¹³Adi nakuketula yimuna hewulu dampidi jamaneni; adi nakwocha yamavumba amawahi hamapidi, nimumashina anyisoli ninamutuseliseli, nimunyikula, nanochu chiyikweti wulelu wawuwahi. Dichi chakoŋelaŋawu wuvumbi anyanenu awambanda, ni aŋodi jenu hiyakwila wujila.

¹⁴Chakukoŋawu anyanenu awambanda wuvumbi, nichakwilawu aŋodi jenu wujila hinakayibabesha kwamuku; muloŋa awenawu amayala aambukaŋa kwakanka wawu nawayivumbi, aketulaŋa yimuna hamu nawatubola; antu akadi kashinshi akayidimbwisha hamaseki.

¹⁵Hela eyi Isarela wudi nakukoŋakoŋa wuvumbi, eyi Yuda kweyi bayi wutamishaku. Bayi mwinza kuGiligali, hela kukanduka kuBetavenuku. Bayi wusanyika neyi, Chahandayi Yehova kwaamuku.

¹⁶Isarela wadikaŋaŋa neyi chadikaŋaŋayi iyoŋa daŋombi wamukaji. Ichi dinu Yehova wukuyidiisha neyi chadiishaŋawu mwana kamukoku muwudiilu weneni.

¹⁷Efweremi nadibombi dehi nawakishi akutuŋa, muleki tuhu kwindi.

¹⁸Yanwaŋawu yabatuka dehi; adi nakwila wuvumbi hefuku hefuku; anyuli jawu anakeŋi nankashi nsonyi.

¹⁹Mpepela yinayikumbakeshi mumpuula jindi; akatiya nsonyi nansaŋu yayimuna yawu yaketwiluwu.