Read MUKANDA WANZAMBI Hosea 5 Bible Online

Hosea 5 - MUKANDA WANZAMBI bible

Hosea 5

¹Enu atupristu, tiyenu chumichi; enu akwamutaŋa waIsarela, tiyililenu; enu akwamutaŋa wamwanta, tenuku matu; muŋa kudenu kwekala kusompesha; muloŋa yenu mwadiŋi muhetu kuMizipa, niwanda wakuta haTabori.

²Akwakutomboka anapundi mena akunama kulonda kujahana; hakwila ami yami mukwakuyihoshola wejima wawu.

³Efweremi namwiluka, niIsarela hiyamujinda kudamuku. Ichi dinu eyi Efweremi, wunakoŋi dehi wuvumbi, Isarela wajilola dehi.

⁴Yuma yelaŋawu yinayikaŋeshi dehi kubalumuka cheŋi kudi Nzambi yawu, muloŋa mudi wena mudi spiritu yawuvumbi, hiyamwiluka Yehovaku.

⁵Wanta wadinkayi Isarela wudi nakumushimuna wunsahu kumesu indi; dichi aIsarela naEfweremi akadimbuka mukuluwa kwawu; niYuda nawa wakadimbuka hamu nawu.

⁶Akaya nanyikanka yawu yayimuna ninyikanka yawu yaŋombi, nawu tumukeŋakeŋi Yehova; hiyakamuwanaku. Yena wadifumisha dehi kudi wena.

⁷Wena anamukwatili dehi Yehova makasu; muloŋa wena anavwali dehi anyana akuvwela muyiputa. Ichi dinu kakweji kakaha kakayivwotela kumu namahawu.

⁸Imbenu koleneti muGibeya, imbenu mpùŋa muRama; imbenu muBetaveni pu-u, munyima yeyeyi Benjamini.

⁹Mwifuku dakuyihoshola Efweremi wakabalumuka mahembi; mukachi kanyuza yaIsarela ami nayileji dehi yuma yakamwekana chalala.

¹⁰Atulamba twawaYuda adi neyi antu atutujolaŋa ŋinza; nukwichila ndombu yami hadi wena neyi meji.

¹¹Efweremi anamukabishi, kukusompesha anamufwishi puchi, nanochu chatiyiliyi kuwaha nakwenda mwaya yuma yakuhemesha.

¹²Ami kudi Efweremi nidi neyi kabubu kadyaloŋa yuma, kudi akwamutaŋa waYuda nidi neyi mbumbu wafulaŋa.

¹³Efweremi namoni yikatu yindi, Yuda namoni chitu chindi; Efweremi hakuya kudi aAshuri, hakutemesha atuŋanda kudi mwanta Yarebi. Ilaŋa yena hanatweshi kuyukaku, hakayikuswisha chitu chenuku.

¹⁴Muloŋa ami kudi Efweremi nakekala neyi mutupa, hela kudi akwamutaŋa waYuda nakekala neyi mwenzi wamutupa. Ami, ami chi, nakatabula, hinukudiyila; nakasenda kwami, hikwakekala wakuyipulwishaku.

¹⁵Nakaya, nakafunta kunadiŋi, nichamba ketŋiawu muloŋa wawu, nichamba kakeŋakeŋawu mesu ami. Mumakabi awu akadanuka nakunkeŋakeŋa.