Read MUKANDA WANZAMBI Hosea 7 Bible Online

Hosea 7 - MUKANDA WANZAMBI bible

Hosea 7

¹Chinukwila nami nimúuki Isarela, kuluwa kwaEfweremi hiku-kumwekana, nikutama kwaSamariya nawa, muloŋa akoŋaŋa yakutwamba. Ikombi weŋilaŋa mukachi, chendu chawakwakubuwa chabuwilaŋa hanzi.

²Hiyatoŋojokaŋa chachiwahi munyichima yawu nawu ami naanukaŋa kutama kwawu kwejimaku. Ichi dinu yuma yelaŋawu yinayijikilili niniku niniku, yidi kumesu ami.

³Amutiyishaŋa mwanta kuwaha nakutama kwawu, nakutwambatwamba kwatwambaŋawu atulamba.

⁴Wejima wawu hiyayivumbi hohu, adi neyi ŋiku danatatishuwu kudi mukwakutuŋa mankendi; walekaŋa kukundakesha kesi, hela kukama wuŋa wanafuŋiyi, chiŋa wunayili dehi neluŋi.

⁵Hefuku damwanta wetu atulamba adisanzishili neyena davinyu; wolweli chikasa chindi hamu nawakwakudiwula akwawu.

⁶Nyichima yawu yekala nakesi kakukasakasa yuma yatama neyi ŋiku, kuzuwa kwawu kwakamaŋa wufuku wejima neyi kesi; habudidi hikakubutuka ninyizuzu.

⁷Wejima wawu atata neyi ŋiku, avwotaŋa ansompeshi jawu; anyanta jawu ejima anadimbuki; mukachi kawu himudi wumu wantambikaŋaku.

⁸Efweremi amufuŋila dehi hamu nanyuza yacheŋi, hidinkendi daha mutamba wumu hohu.

⁹Antu akwacheŋi anadyi Ŋovu jindi, yena kuchiluka nehi, mwalala wamena dehi invu niniku niniku, yena kuchiluka nehi.

¹⁰Wanta wadinkaŋawu aIsarela washimunaŋa wunsahu kumesu indi. Hela mwejimimu wena kubalumuka atala kudi Yehova Nzambi yawu, hela kumukeŋakeŋa, nehi.

¹¹Efweremi wudi neyi katela kazenzalala, kabula muchima; atambikaŋa kuEjipitu, kuya hiyakuya kuAshuri.

¹²Chakayawu nakatanjika wanda wami hadi wena; nakayiholola neyi tujila twahaluzwizu; nakayibabesha mwomwatiya dehi chipompelu chawu.

¹³Yayo akwetu! Ajimbela dehi kwakulehi nanami; ajilumuki kwawu! Anmotoka dehi ami. Wena anantwambili dehi, kutoŋa nakeŋeli kuyikúula.

¹⁴Chakalukaŋawu hatudidi twawu, hiyadililaŋa kudami nanyichima yawuku. Apompelaŋa kwatidiku navinyu hohu, adikaŋaŋa nanami.

¹⁵Kutoŋa yami nayifumbili, yami nawa nakolesheli makasawu, hela chochu, anfuukwilaŋa yatama.

¹⁶Kufunta afuntaŋa, ilaŋa hiyafuntaŋa kudi wekala mwiwuluku; adi neyi wuta wamukunji waluwa. Atulamba twawu akadimbuka kumpoku yakabali muloŋa wakuzuwa kwamadimi awu kwasweja, dichichuma chakayisehelawu mwitaŋa daEjipitu.