Read MUKANDA WANZAMBI Hosea 8 Bible Online

Hosea 8 - MUKANDA WANZAMBI bible

Hosea 8

¹Shaku mpùŋa kukanwa keyi! Hakwinza nakukwatana kwitala daYehova neyi mbuulu, muloŋa amotoka dehi chitiyaŋenu chami, aputola dehi nshimbi jami.

²Akadilila kudami nawu, Eyi Nzambi yami, etu aIsarela twakwiluka.

³AIsarela ananati dehi yuma yayiwahi; akamuhaya kudi chilumbu.

⁴Aswanisha dehi anyanta, ilaŋa hichakudamuku; ashamu dehi atulamba, ilaŋa ami kuchiluka nehi. Kusiliva yawu nikuwuru wawu anonaku dehi yakwila nachu mukishi, kulonda adiŋiyishi nachu.

⁵Eyi Samariya, yena naleki kaneyi kaŋombi; kuzuwa kwami kunayibutukili; mwakanyi wamba kabulawu chuma chakuyinkela nyiloŋa.

⁶Tiyenu chuma chinafumi kudi aIsarela; akatuŋili kudi nkoŋi, chumochu hiNzambuku; mwalala oku kana kaŋombi kakuSamariya akakotola kotu kotu.

⁷Muloŋa wena adi nakukuwa mpepela akaaŋula chinjimbi. Hakweti tidiku yemanaku; mapolela hiyakasoŋa wuŋaku; hela neyi akasoŋa, akawuminya kudi antu akwacheŋi.

⁸AIsarela ayiminya dehi; ichi dinu hiyadi mukachi kanyuza neyi nswaha yaseka dehi.

⁹Anakanduki kuAshuri, neyi chimbulu wamwisaŋa wudi nakudikimbukila kanka windi. Efweremi nondi dehi ambanda akwakumukeŋa.

¹⁰Mwalala anafweteli ankwashi mukachi kanyuza, ilaŋa ami nukuyikuŋula katataka; mpinji yantesha akaleka kuwayisha mwanta nawatulamba manji.

¹¹Chanavulishiyi Efweremi tumeŋa kulonda avulumuni, tumeŋa kudi yena twela dehi twakuvulumuna.

¹²Hela nukumusonekela nshimbi jami yijila ikombakaji, wena akayifuukula neyi chuma chakwacheŋi.

¹³Hakwila yimuna yanyilambu yami yaketulaŋawu, alambulaŋa mbiji nikuyidya ayidyaloŋa; ilaŋa Yehova hayitiyaloŋa kuwaha kwinduku. Ichi dinu wukwanuka kuluwa kwawu, wukuyibabesha nanshidi jawu; akafunta cheŋi kuEjipitu.

¹⁴Ichi dinu Isarela navulameni dehi Wanamutuŋili, hakutuŋatuŋa yipaŋu; niYuda nawa navulishi dehi nyikala yakuhata mumpwembu; ilaŋa ami nakatemesha kesi hanyikala yindi, kakalasha yipaŋu yidumu.