Read MUKANDA WANZAMBI Hosea 9 Bible Online

Hosea 9 - MUKANDA WANZAMBI bible

Hosea 9

¹Enu aIsarela, bayi muzaŋalala nakuluŋa neyi chaluŋaŋa nyuzaku; muloŋa eyi washiya dehi Nzambi yeyi, hiwukuya nakwila wuvumbi, wunakeŋi kufwetela ayivumbi hamawuhulilu atidiku ejima.

²Hela kuwuhulilu hela kuwukamwinu wavinyu hiyakamona chakuyidiishaku, nivinyu yayiha hakayimonaku.

³Hiyakashakama mwituŋa daYehovaku; ilaŋa Efweremi wakafunta cheŋi kuEjipitu, akadya yakudya yamajilu kuAshuri.

⁴Hiyakamu mwaŋila Yehova nyilambu yavinyuku, yumoyu hiyakamutiyishaŋa kuwahaku. Yimuna yawu yakaketulaŋawu kudi wena yakekala neyi yakudya yadyaloŋawu akwakudila akwawu; antu ejima akayidya akajilola; muloŋa yakudya yawu akayidiila nzala hohu; hiyakashika mwitala daYehovaku.

⁵Hefuku dachawija chakushiika, nihefuku dachawija chaYehova, mwakela ŋahi?

⁶Muloŋa tiyenu, anatemuki dehi kujilumuka, hela chochu, akayikuŋula kudi aEjipitu, akayijiika kudi akwaMemifwisi. Yuma yawu yayiwahi yasiliva yakekala yambala yatunyuŋi; mumatenti awu mwakamena nyiŋa.

⁷Mafuku akuyibabesha anashiki dehi, mafuku akufuta nyiloŋa anashiki dehi. AIsarela akahosha nawu, Kaprofwetu hichisupi, muntu wukweti spiritu wazaluka; nakuluwaluwa kweyi kunavuli, nawulumbu wunasweji.

⁸Efweremi wadiŋi mukwakutalatala hamu naNzambi yami; hakwila kaprofwetu, kunjila jindi jejima kudi nyihetu yawakwakujaha tujila, mwitala daNzambi yindi mudi wulumbu.

⁹Anaditokeshi chakunama neyi chaditokesheluwu kuGibeya. Wakaanuka kuluwa kwawu; wakayibabesha nanshidi jawu.

¹⁰Ami naweni aIsarela neyi nyikabu yanyivinyu yamwisaŋa; ankakulula jenu nayimweni neyi nyikabu yatachi yachikuyu hachila aka chindi chakusambila. Ilaŋa wena ayili kuBayali Peyori, adijilikilili chuma chansonyi, abalumukili kwikala ayishimashima neyi chumochu chakeŋeluwu.

¹¹Hakwila aEfweremi, kulema kwawu kwakayituuka neyi kajila; hikwakekala kuvwala, hela kwikala nevumu, hela kwimitaku.

¹²Hela akalela anyanawu, nakayijaha kulonda niyibondi, hikwakashala muntu niwumuku; mwalala chinakafuma kudi wena, yayo!

¹³Efweremi anamutumba kwakuwahi, neyi chinamoni Tira; hela chochu, Efweremi wakedisha anyanindi kudi mukwakujaha.

¹⁴Eyi Yehova, yinki. Wukuyinkadi? Yinki mavumu alufwisha, nimayeli ominina chau.

¹⁵Kutama kwawu kwejima kudi muGiligali, kwenoku diku natachikilili kuyihela. Nakayihaŋa mwitala dami, muloŋa wakutama kwyuma yelaŋawu; hinakayikeŋa nawa cheŋuku; atulamba twawu ejima hiyakwakutomboka hohu.

¹⁶Efweremi anamweti, muji wawu woma dehi, hiyakasoŋa nawa cheŋi nyikabuku. Mwalala, hela neyi akavwala, nakajaha anyana akumavumu awu akeŋewa.

¹⁷Nzambi yami wakayinata, nanochu chabuliluwu kutiyilila kudi yena. Akekala akwakutambatamba munyuza yawantu.