Read MUKANDA WANZAMBI Joele 1 Bible Online

Joele 1 - MUKANDA WANZAMBI bible

Joele 1

¹Izu daYehova denjili kudi mwana kaPetuweli Yoweli.

²Enu awakulumpi, tiyenu kunu, shenu matu kunu, enu wejima wenu mwashakama mwituŋa. Tiyenu chuma chabulahu dehi kumwekana mumafuku enu, hela mumafuku awankakulula jenu.

³Muyilejumu anyanenu, anyanenu nawa akalejumu anyanawu, anyanawu nawa akalejumu amba kavwalikamu.

⁴Yanashiyuwu ansenya, anayidyi kudi atubola amotokaŋa; yanashiyuwu atubola amotokaŋa, anayidyi kudi atubola adi nakutuuka; yanashiyuwu atubola adi nakutuuka, anayidyi kudi atubola akisaŋanaŋa.

⁵Enu akwakusheta, hindukenu mudili makumbu; enu mwanwaŋa walwa, kalokenu nyiteti nansaŋu yawalwa watowala; muloŋa anayihukuluwu kutunwa twenu.

⁶Muloŋa mwituŋa dami munenzi muza, wasweja Ŋovu, wakachindewaŋa; maji awu adi neyi maji amutupa, akweti mawunji adi neyi amutupa weneni.

⁷Abola dehi nyivinyu yami, abalola dehi yikuyu yami; ayibwambola dehi, ayinata dehi niheseki; nyitayi yayu yatookoloka dehi to-o.

⁸Dilenu neyi mujiki wudi nakudila nfumwindi wahawusanda windi, navwali kwayikeleyi hohu.

⁹Kwitala daYehova kwaketuka dehi ninyilambu yawuŋa ninyilambu yakuhuŋununa. Atupristu, akwakukalakela Yehova, hiyakudila.

¹⁰Mumaha mwakisika dehi, ituŋa hidikudila; hiyakudila tidiku yakisika dehi, nivinyu yayiha yoma dehi chau, manji hiyakuzeela.

¹¹Enu akwakudima, tiyenu nsonyi, enu akwakuloŋesha nyivinyu, kalokenu nyiteti, nansaŋu yatidiku nabali; muloŋa yakudya yakeŋa kwaŋulawu mumaha yinakisiki dehi.

¹²Nyivinyu yinomi dehi, yikuyu hiyikuzeela. Nyibula yakudima, ninyikoma, ninyitondu yanyikabu yacheŋi, kafwampi nyitondu yamumpata yejima yalepuka dehi; muloŋa kuluŋa kunakaŋanyi dehi kudi anyana kawantu.

¹³Enu atupristu, vwalenu yikeleyi mudili; enu akwakukalakala kukameŋa, kalokenu nyiteti. Enu akwakukalakela Nzambi yami, inzenu mukami wufuku wejima muyikeleyi; muloŋa kwitala daNzambi yenu analekeshuku dehi nyilambu yawuŋa ninyilambu yakuhuŋununa.

¹⁴Jilikenu ifuku dakuleka kudya, tambikenu chawija chakushiika. Pompeshenu awakulumpi niantu amwituŋa ejima, enzi kwitala daYehova Nzambi yenu, mwakadilili madilu kudi Yehova.

¹⁵Yayo, o difuku! muloŋa ifuku daYehova didi kwakwihi; dakenza neyi kujilumuka kukufuma kudi Chinaweji.

¹⁶Yakudya hiyaketuka dehi kumesu etuku? Muzaŋalu nikutiya kuwaha hiyaketuka dehi kwitala daNzambi yetuku?

¹⁷Mbutu hijikutokela mwishina damakenka aju; nkalaŋa jashala dehi jamukunkulwayi; matala akusweka yakudya ahumoka dehi, muloŋa tidiku yinakaŋanyi dehi.

¹⁸O chakwabawu anyama! Nyikanka yaŋombi hiyikululuta, hiyanamoni kwakudiilaku. Nyikanka yanyikoku yinamoni ihuŋu.

¹⁹Eyi Yehova, nukudilila kudeyi; muloŋa kesi kalasha dehi matahu adyaloŋa ayimuna mwisaŋa, nyilaŋu yakesi yocha dehi nyitondu yakumpata yejima.

²⁰Mwalala anyama amumpata adi nakuhaakwila kudeyi, muloŋa tuloŋa twoma dehi, ni kesi kalasha dehi matahu amwisaŋa kwadiilaŋawu.