Read MUKANDA WANZAMBI Joele 2 Bible Online

Joele 2 - MUKANDA WANZAMBI bible

Joele 2

¹Imbenu mpùŋa muZiyona, jisweji kuvuma kumpidi yami yajila; kulonda antu ejima ashakama mwituŋa akumini dakuzaala; muloŋa ifuku daYehova hidikwinza, didi kwakwihi;

²ifuku damwidima dakwiyila, ifuku damavu damwidima wakushishita, neyi kucha kunatookeshi hamapidi kwejima; muza wasweja kuvula, wukweti Ŋovu, kanda kumwekanaŋahu dehi muza wudi chochochuku, himwamba kalondela acheŋi adi chochochuku, hela kunyaka yamakiŋu amavulu amba kavwalikilaŋawu antu.

³Kukuyawu kulasha kwakesi hohu, kwakufumawu nawa kubidimaŋa kwanyilaŋu yakesi hohu. Kukuyawu ituŋa didi neyi itempa daEdeni, kwakufumawu kwesaŋa dakisika dehi hohu; mwalala, kwosi chuma nichimu chikupulukaku.

⁴Chamwekanawu amwekana neyi atuwalu; chatemukaŋawu atemukaŋa neyi akwakwendela hatuwalu.

⁵Amotokaŋa hewulu damapidi nalushindu ludi neyi lwamakálu, nilushindu ludi neyi nyilaŋu yakesi kalashaŋa ntotu, neyi muza wukweti Ŋovu wunatandami kunjita.

⁶Kukuyawu nyuza yawantu hiyikukumina dakwalaŋana; ni kumesu awu ejima hikukufumunuka.

⁷Hiyakutemoka neyi ayilobu, hiyakukandama mpwembu neyi akwanjita. Hiyakwenda iwu nakudimakena nahindi, iwu nakudimakena nahindi, hiyaluwaŋeshaŋa nyisululu yawuku.

⁸Hiyadishinjika ŋaku; adimakenaŋa iwu nahindi, iwu nahindi. Akuminaŋa dakuhanuka hayitwa yawakwawu chakadi kufuma munjila yawu.

⁹Hiyakulotokela mukala; hiyakuhitahita lufuchi hewulu dampwembu; hiyakukandama mumatala; hiyakwijila munjanina neyi chelaŋa ikombi.

¹⁰Kukuyawu iseki hidikukanka, mawulu hiyakuza ala; itaŋwa nikakweji hiyakwiyila, tutumbwa tuleka nikutoŋaeka.

¹¹Yehova hakutwala izu dindi kukuya njita yindi, muloŋa chilombu chindi chinasweji kutoha, niyena wakoŋaŋa mwaya izu dindi wukweti Ŋovu; muloŋa ifuku daYehova deneni dakutiya woma nankashi; wukutwesha kudi imena hinyi?

¹²Yehova nindi, Hela mwomu, funtenu kudami nanyichima yenu yejima, muleki kudya, mudili, mudishoni;

¹³mutabuli nyichima yenu, bayi mahinenuku. Mufunti kudi Yehova Nzambi yenu; muloŋa yena wukweti luwi, wasweja wushona, hazuwaŋa swayuku, wavulisha nikwanakena, wafuntishaŋa muchima mwivumu kwila chuma chatama nehi.

¹⁴Neluki hinyi? Hadaha wakabalumuka, wakafuntisha muchima mwivumu, wakashiya nkisu kwakufumayi, wowu himulambu wawuŋa, nihimulambu wakuhuŋununa wakuhimulambu la Yehova Nzambi yenu.

¹⁵Imbenu mpùŋa muZiyona; jilikenu ifuku dakuleka kudya; tambikenu kukumaŋana kwakudihudika,

¹⁶Kumaŋejenu antu, jilikenu chipompelu, pompeshenu awakulumpi, kumaŋejenu atwansi, ninawa achidi kwamwa kumayeli. Nsumbuli afumi mwitala dindi, ninsumbuki ediki mukapeka kindi.

¹⁷Atupristu, akwakukalakela Yehova, adilili madilu hakachi kachisu nakameŋa, ahoshi nawu, Eyi Yehova, anakenaku antu eyi, bayi wuhana wuswana weyi mukusawuka, kulonda nyuza yawantu yakayiyuluku. Indi antu adi munyuza adi kuhoshelaŋadi nawu, Nzambi yawu wudi kudihi?

¹⁸Henohu Yehova hakutiyila ituŋa dindi mukawu, hakutiyila muza windi luwi.

¹⁹Yehova hakwakula, hakwila muza windi nindi, Tiyenu, nakayitemeshela nitidiku, nivinyu, nimanji, mwakayiikuta; hinakayisawisha cheŋi mukachi kanyuzaku.

²⁰Antu akukabeta kakuchimunswa nakayifumishaku, nakayitwala kwakulehi nanenu, nakayihaŋila kwituŋa dominina chau, dela kwamahembi hohu, chamesu awu mukaluŋalwiji kakumusela, chanyima yawu mukaluŋalwiji kakumujika; wakafulumuka ivumba dindi datama, wakanunka kahu kindi katama, muloŋa yena nakoŋi dehi nyidimu yamaneni.

²¹Eyi ituŋa, bayi wutiya womaku; tiyaku kuwaha, zaŋalalaku, muloŋa Yehova nakoŋi dehi nyidimu yamaneni.

²²Enu anyama amumpata, bayi mutiya womaku, muloŋa matahu akudya mwisaŋa hiyakumena, muloŋa mutondu hiwukusoŋa nyikabu yindi, nichikuyu nimuvinyu hiyikwidisha Ŋovu jayu.

²³Enu anyana kaZiyona, tiyenu kuwaha, zaŋalalenu mudi Yehova Nzambi yenu; muloŋa yena hakuyinka nvula yamusanvu chamukuloŋa hohu, hakuyinokeshela nvula, niyamusanvu, niyamayinza, neyi hakusambila.

²⁴Hawuhulilu hakenzala tidiku, muwukamwinu mwakasumpoka nivinyu nimanji.

²⁵Nukuyifuntishila nyaka yadiili atubola, niatubola amotokaŋa, niatubola akisaŋanaŋa, niansenya, yoyi njita yami yeneni yinatemesheli mukachi kenu.

²⁶Mwakadya yalumbama mwakekuta, mwakahameka ijina daYehova Nzambi yenu, diyi nayili chakuhayamisha. Antu ami hiyamba katiya cheŋi nsonyuku.

²⁷Mwakeluka nenu ami nidi mukachi kawaIsarela, nenu yami Yehova Nzambi yenu, hikudi wacheŋuku. Antu ami hiyamba katiya cheŋi nsonyuku.

²⁸Hakulondelahu, ami nakechila Spiritu yami hadi antu ejima; anyanenu amayala nawambanda akaprofweta, mapalenu amayala akalota yilota, anyikwenzi jenu akamona yimwenu.

²⁹Hadi ambuŋenu amayala nihadi ambuŋenu awambanda hamafuku owu nakechila Spiritu yami.

³⁰Nakamwekesha yihayamisha nimumawulu, nihamaseki, nimashi ni kesi, niyishimi yawishi.

³¹Itaŋwa dakabalumuka mwidima, kakweji kakabalumuka mashi, chidikukeŋa kwinza ifuku daYehova deneni, dakutiya niwoma.

³²Hichakela yowu muntu wakatambika ijina daYehova wakapuluka; muloŋa mumpidi yaZiyona nimuYerusalema mwakekala akapuluka, mwomwanahoshiyi dehi Yehova, akekala nimudi anashaluku anatambiki Yehova.