Read MUKANDA WANZAMBI Joele 3 Bible Online

Joele 3 - MUKANDA WANZAMBI bible

Joele 3

¹Dichi tiyenu, hamafuku owu, nihamwakowu, chinakaleta cheŋi aYuda nawakwaYerusalema ayili muwukoli,

²nakapompesha nyuza yejima, nakayikunkumwisha muchinekineki chaYehoshafwati; nakahosha nawu muloŋa kwenoku, muloŋa wawantu ami niwawuswana wami aIsarela anaŋalaŋeshuwu mukachi kanyuza, hiyakudibalwila niituŋa dami.

³Antu ami anayisakuli nayinjikijilu yakusakula nachu, ananoni mwana weyala anamuhimpi nachivumbi, mwana wamumbanda anamulandishi kuvinyu, kulonda anwaŋa.

⁴Mwalala, enu aTira naZidoni nawakwamutamba wawaFwilistinu, kudami mudi chumanyi? Munakeyi munfweti chuma, tahindi? Neyi mukunfweta, ami nakayilubwila wufwetu wenu hanyitu yenwenu aweni swayi hohu, chakadi nikuleha.

⁵Chimunatwali siliva yami niwuru wami, chimuneŋi yuma yami yalubanji yayiwahi mutembeli jenu,

⁶himukulandisha aYuda nawakwaYerusalema kudi aHeleni kulonda muyifumishi kwakulehi nampata yawu.

⁷Tiyenu, nakayisaŋumuna akafumi oku kumwayilandishili; chuma chimwakoŋeli akayilubwilachu hanyitu yenwenu aweni.

⁸Nakalandisha anyanenu amayala nawambanda kudi aYuda, niwena akayilandulula kudi antu akuSheba, nikudi muza wekala kwakulehi; muloŋa Yehova nachihoshi dehi.

⁹Bidikishenu chumichi mukachi kanyuza; loŋeshenu njita, saŋu munenu ayilobu; amayala akwanjita ejima aswili kwakwihi, akanduki.

¹⁰Chilenu matemwenu ekali mpoku jatubali, chilenu mpoku jenu jakuloŋesha nachu nyitondu yamumatempa jiikali mayoŋa; wabula Ŋovu ahoshi nindi, Ami ni kweti Ŋovu.

¹¹Enu nyuza yanyeŋumukaku kwi-ndo, nyakalenu, inzenu, dipompeshenu. Eyi Yehova kunkumwishilaku ayilobu jeyi.

¹²Nyuza yidi saŋumuni, yinzi kuchinekineki chaYehoshafwati; muloŋa kwenoku diku kunakashakama nakusompesha nyuza yejima yanyeŋumukaku.

¹³Ingenuku chikwakwa, muloŋa mbutu yakwaŋula yinahi dehi. Inzenu, datolenu, muloŋa muwukamwinu mwenzala dehi, manji hiyakusumpoka; kutama kwawu kunasweji.

¹⁴O mazaza! O mazaza muchinekineki chakuketwila nyiloŋa! Muloŋa ifuku daYehova dashika dehi kwakwihi muchinekineki chakuketwila nyiloŋa.

¹⁵Itaŋwa nakakweji eyila dehi, tutumbwa tunaleki dehi kutoŋeka.

¹⁶Yehova wakabuluma kuZiyona, wakahosha izu dakaŋuka muYerusalema, mawulu namaseki akakanka. Yehova wakekala wubataminu wawantu indi, nimpwembu yakudikaŋila anyana kaIsarela.

¹⁷Dichi mwakeluka nenu ami yami Yehova Nzambi yenu, washakamaŋa muZiyona, mpidi yami yajila. Henohu Yerusalema wakekala wajila; himwakahita nawa cheŋi antu akwacheŋuku.

¹⁸Ifuku odu mpidi jamaneni jakavwa vinyu yatowala, mpidi janyanya jakapwapumuka mayeli, tutuloŋa twamuYuda twejima twakapwapumuka meji; mwitala daYehova mwakedika kaseloki, meji aku akahita muchinekineki chaShitimi.

¹⁹Ejipitu wakekala chihembi, Edomi wakekala chinkalampata wamukunkulwayi nandombu jayikoŋeluwu aYuda, namashi akadi nyiloŋa apwekesheluwu mwituŋa dawu.

²⁰AYuda akashakama haya nyaka, niYerusalema nawa, mufwawa muhiŋawa nyaka yonsu.

²¹Nakatookesha mashi awu inabulili kutookesha; muloŋa Yehova washakama muZiyona.