Read MUKANDA WANZAMBI Amosi 1 Bible Online

Amosi 1 - MUKANDA WANZAMBI bible

Amosi 1

¹Mazu aAmosa, wadiŋi kudi atubiŋa akuTekowa, mazu amweniyi akutena Isarela hamafuku amwanta wawaYuda Uziya, nihamafukuamwanta wawaIsarela Yerobowami mwana kaYehowashi, henohu muchidi nyaka yiyedi nahenjili mutentanshi.

²Nindi, Yehova wakabuluma kuZiyona, wakahosha izu dakaŋuka muYerusalema; kuwudiilu wawatubiŋa kwakadishona, insa yaKarameli yakalepuka.

³Yehova nahoshi nindi, Hanyiloŋa yaDamakasa yisatu, niyiwana yikwikala, hinakalekesha kubabesha kwawuku; muloŋa wena anahumpuli Gileyadi nayuma yakuhumpula nachu tidiku yayikuŋu.

⁴Dichi ami nakatemesha kesi mwitala daHazayeli, kakalasha matala aBenihadadi awanta.

⁵Nakakotola nawa mukomenu waDamakasa, antu ashakama muchinekineki chaAveni nakayifumishahu, niwakwataŋa nkunyi vawanta nakamufumisha kwitala daEdeni; antu akuSiriya akaya kuKiri muwukoli. Dimu mwanahoshiyi Yehova.

⁶Yehova nahoshi nindi, Hanyiloŋa yaGaza yisatu, niyiwana yikwikala, hinakalekesha kubabesha kwawuku; muloŋa anatwali muza wamukuma muwukoli, kulonda ayihani kudi aEdomi.

⁷Dichi ami nakatemesha kesi hampwembu yaGaza, kakalasha matalawu awanta.

⁸Antu ashakama kuAshidodi nakayifumishahu, niyena wakwata nkunyi yawanta nakamufumisha kuAshekeloni; nakabalumuna chikasa chami chakalwi nawaEkeroni; niaFwilistinu anashaluku akajilumuka. Dimu mwanahoshiyi Mwanta Nzambi.

⁹Yehova nahoshi nindi, Hanyiloŋa yaTira yisatu, niyiwana yikwikala, hinakalekesha kubabesha kwawuku; muloŋa wena aheni muza wamukuma kudi aEdomi ayi muwukoli, hiyaanukili chitiyaŋenu chawubwambuku.

¹⁰Dichi nakatemesha kesi hampwembu yaTira, kakalasha matalawu awanta.

¹¹Yehova nahoshi nindi, Hanyiloŋa yaEdomi yisatu, niyiwana yikwikala, hinakalekesha kubabesha kwawuku; muloŋa yena wahaŋili mana kwindi nampoku yakabali, wakambili muchima, kuzuwa kwindi kwadiŋi nakutabola mafuku ejima, wamulaminini mana kwindi ndombu yahaya nyaka.

¹²Dichi ami nakatemesha kesi haTemani, kakalasha matala aBozira awanta.

¹³Yehova nahoshi nindi, Hanyiloŋa yawaAmoni yisatu, niyiwana yikwikala, hinakalekesha kubabesha kwawuku; muloŋa wena anabuzi dehi ambanda amuGileyadi adiŋi namavumu, kulonda atoheshi ŋinza yawu.

¹⁴Dichi ami nakabutula kesi kumpwembu yaRaba, kakalasha matalawu awanta, nakudikuwa kwamwifuku danjita, nampepela yasweja Ŋovu yefuku dachinjimbi;

¹⁵mwanta wawu wakaya muwukoli, niyena niatulamba twindi hamu. Dimu mwanahoshiyi Yehova.