Read MUKANDA WANZAMBI Amosi 2 Bible Online

Amosi 2 - MUKANDA WANZAMBI bible

Amosi 2

¹Yehova nahoshi nindi, Hanyiloŋa yaMowabi yisatu, niyiwanayikwikala, hinakalekesha kubabesha kwawuku; muloŋa yena wocheli mafwaha amwanta wawaEdomi abalumukili hiswakala.

²Dichi ami nakatemesha kesi hadi Mowabi, kakalasha matala amuKeriyoti awanta; Mowabi wakafwa namuyoyu, nakudikuwa, nachivumu champùŋa;

³ninsompeshi yawu nakamufumishahu mukachi kawu, nakajahila hamu niatulamba twawu ejima. Dimu mwanahoshiyi Yehova.

⁴Hanyiloŋa yaYuda yisatu, niyiwana yikwikala, hinakalekesha kubabesha kwawuku; muloŋa wena analeki dehi nshimbi jaYehova, hiyanalamati muyidika yinduku, kutwambatwamba kwawu kunayiluwishi, kwokutwambatwamba kwalondelaŋawu ankakulula jawu.

⁵Dichi ami nakatemesha kesi hadi Yuda, kakalasha matala pamu Yerusalema awanta.

⁶Yehova nahoshi nindi, Hanyiloŋa yaIsarela yisatu, niyiwana yikwikala, hinakalekesha kubabesha kwawuku; muloŋa wena analandishi waloŋa nasiliva, analandishi niwabula yuma namasapatu ayedi.

⁷Adatolaŋa nyitu yawatuzweŋi mulunkuŋu lwahamaseki, ateŋululaŋa njila yawantu amwovu; mwana natata yindi ayaloŋa kudi chaŋadima wumu, kulonda ajiloli ijina dami dajila.

⁸Kutumeŋa twejima akamaŋa hamahina ayinkeluwu kudi akwanyikudi kukwataku; mwitala daNzambi yawu anwinaŋamu vinyu yanafutishuwu akwawu hanviloŋa.

⁹Kutoŋa yami nayijilumwinini aAmori kumbidi yawu, adiŋi ataluka neyi nyisida, akola neyi nyikula; kutoŋa yami nakisaŋeni nyikabu yindi kwiwulu, ninyiji yindi kwishina.

¹⁰Yami nawa nayifumishili mwituŋa daEjipitu, hinukuyilombolaŋa mwisaŋa nyaka makumi awana, kulonda mwakaheti ituŋa dawaAmori.

¹¹Hadi anyanenu amayala nanyamwinuhu amakwawu ekali atuprofwetu, nihadi anyikwenzi jenu nanyamwinuhu amakwawu ekali aNaziri. Enu anyana kaIsarela, hidimuku, tahindi? Dimu mwanahoshiyi Yehova.

¹²Ilaŋa Naziri mwayinkeli vinyu nenu, Nwenu; atuprofwetu mwayile-kesheli nenu, Bayi muprofwetaŋaku.

¹³Tiyenu, ami nakayilemenena neyi itemba dinalemeneni nyikuta yatidiku yinenzalumu.

¹⁴Wasweja lufuchi, jakutemuka jakamukaŋa, mukwaŋovu hakamona jakudikoleshaku, hela chilobu hakamona jakudipulwishaku;

¹⁵wakwataŋa kuwuta wamukunji hakamona jakwimanaku; wukweti nyendu yasweja lufuchi hakamona jakudipulwishaku; hela wendelaŋa hakawalu hakamona jakudihandishaku;

¹⁶hela wasweja kuumika hadi ayilobu wakatemuka nzekesi dena ifuku odu. Dimu mwanahoshiyi Yehova.