Read MUKANDA WANZAMBI Amosi 3 Bible Online

Amosi 3 - MUKANDA WANZAMBI bible

Amosi 3

¹Enu anyana kaIsarela, tiyenu izu dakuyizuwila danahoshiyi Yehova, dakuhosha nakuzuwila chisaka chejima chinafumishili mwituŋa daEjipitu.

²Nindi, Hayisaka yahamaseki yejima nelukuhu enu hohu; dichi chinakayibabeshelaŋa nakuluwa kwenu kwejima.

³Antu ayedi endi hamu chakadi kutiyaloŋana?

⁴Mutuŋa abulumi mwisaŋa chakadi yanakwatiyi? Mwenzi wamutupa ahoshi muchididi chindi chakadi yanakwatiyi?

⁵Kajila afwi mumuhetu hamaseki chakadi kumuta? Muhetu wusahuki heseki chakadi chuma chinafumu?

⁶Mpuŋa yivumi mumukala antu kutiya woma nehi? Chuma chatama chiwani mukala chakadi Yehova kuchikoŋa?

⁷Chalala Mwanta Yehova hakela chuma chakadi kumwekeshela ambuŋindi atuprofwetu chuma chindi chanajindiyuku.

⁸Mutuŋa nabulumi wukubula kutiya woma hinyi? Mwanta Yehova nahoshi wukuleka kuprofweta hinyi?

⁹Bidikishenu mumatala amuAshidodi awanta, nimumatala amwituŋa daEjipitu awanta, nenu, Dipompeshenu hamapidi amuSamariya mutali masoyoyu asweja aduku, nimakabisha aduku.

¹⁰Yehova nindi, Aswekaŋa nindombu nikubuwa mumatalawu awanta, hiyeluka kwila mwaloŋaku.

¹¹Dichi Yehova nahoshi nindi, Kwituŋa kwakanyeŋumuka mukwankunyi hohu; wakakusandila Ŋovu jeyi, nimataleyi awanta akayipupa.

¹²Yehova nindi, Anyana kaIsarela ashakama kunsa yakadidi, hela hanyisawu yakukadidi yaswara, akayihukula chakuhukula neyi chahukulaŋayi kabiŋa tunyendu tuyedi, hela kachibalu ketelu mukanwa kamutupa.

¹³Mwanta Yehova, Nzambi yamazaza, nindi, Tiyenu, muyishimwini akwamutaŋa waYakoba wunsahu,

¹⁴nenu, Mwifuku dinakababesha aIsarela nanyiloŋa yawu, nakababesha nawa nitumeŋa twakuBeteli, nseŋu jakukameŋa jakaketukaku, jakaholoka hamaseki.

¹⁵Naketela kumu niitala dahachishika niitala dahankanza; matala ambiŋa yanjamba akakisika,