Read MUKANDA WANZAMBI Amosi 4 Bible Online

Amosi 4 - MUKANDA WANZAMBI bible

Amosi 4

¹Enu aŋombi akuBashani awakaji mwekala kumpidi yaSamariya, mwakabishaŋa tuzweŋi, mwachikachikaŋa abula yuma, mwelaŋa anfumu jenu nenu, Letenu tunwi; tiyenu izu idi.

²Mwanta Yehova nasanyiki kujila kwindi, nindi, Tiyenu, kwakayiwana mafuku akayitwalawu namalonda, niakwenu akashalaku akayitwala namayumba.

³Mwakedikila kumapana akumpwembu, mwakemakana wejima wenu iwu nahindi, iwu nahindi; akayinatila muHaramoni. Dimu mwanahoshiyi Yehova.

⁴Inzenu kuBeteli mumotoki nshimbi; nikuGiligali muvulishi nyiloŋa; letenu yimuna yenu yakuketula habudidi habudidi, niyuma yenu yamwikumi, muhitaŋa mafuku asatu asatu;

⁵lambulenu himulambu wakusakilila nachu wyuma yikweti iluŋi, bidikishenu nyilambu yakulambula chakunyichima yenu, muyishimwaŋeni; muloŋa chumichi chayitelela, enu anyana kaIsarela. Dimu mwanahoshiyi Mwanta Yehova.

⁶Nayinki kubula majilu kumaji munyikala yenu yejima, nikutonda yakudya mwejima mumwekalila. Hela chochu, himunafunti kudamuku. Dimu mwanahoshiyi Yehova.

⁷Nayikwatilili nvula helili kunashali dehi tukweji tusatu nakwaŋula; nelili hamukala wumu ninokeshahu nvula, hamukala wukwawu kunokeshahu nvula nehi; ihidi hanokela nvula, iha di kwawu nvula kunokelahu nehi, dilepuka nilepu.

⁸Dichi nyikala yiyedi, hela yisatu, hiyi kuya nakululuta kumukala wumu nawu anwi meji, mpwila kuketuka nehi. Hela chochu, himunafunti kudamuku. Dimu mwanahoshiyi Yehova.

⁹Nayeti nakukonyata kunakonyati mbutu, nambuwa nawa. Mahenu amavulu, nimatempenu anyivinyu, niyikuyu, ninyiolive yenu, anayidyi kudi atubola amotokaŋa. Hela chochu, himunafunti kudamuku. Dimu mwanahoshiyi Yehova.

¹⁰Nayitemesheli chipupu chidi neyi chamwenuwu aEjipitu; natapi anyikwenzi jenu nampoku yakabali; natwali nawa tuwalu twenu; nanunkishi chilombu chenu ivumba datama, dinepili nimumazulu enu. Hela chochu, himunafunti kudamuku. Dimu mwanahoshiyi Yehova.

¹¹Enu amakwawu nayikindumuni neyi chakindumwinuwu Sodoma naGomora kudi Nzambi; mwadiŋi neyi luchawa lwakuhukula mukesi. Hela chochu, himunafunti kudamuku. Dimu mwanahoshiyi Yehova.

¹²Dichi chinakakwila eyi Isarela; ochu chinakakwila mwenimu, kadiloŋeshi wudimoni naNzambi yeyi, eyi Isarela.

¹³Tiyenu, wawumbaŋa mapidi, waleŋaŋa mpepela, walejaŋa muntu chuma chadi nakutoŋojokayi, wabalumunaŋa budidi hiyikwikala mwidima, wadatolaŋa hayinaŋanaŋa yahamaseki, ijina dindi diyi Yehova, Nzambi wamazaza.