Read MUKANDA WANZAMBI Amosi 5 Bible Online

Amosi 5 - MUKANDA WANZAMBI bible

Amosi 5

¹Enu akwamutaŋa waIsarela, tiyenu izu damukeŋa dinukuyimbila.

²Nami, Mujiki Isarela nadimbuki; hamba kanyamuka nawa cheŋuku. Anamunatili dehi hetuŋa dindi; hikudi wakumuhindwishaku.

³Muloŋa Mwanta Yehova nahoshi nindi, Kumukala kwafuminaŋa ikombakaji dawantu kwakashala nkulakaji hohu, kwafuminaŋa nkulakaji kwakashala ikumi hohu, kudi akwamutaŋa waIsarela.

⁴Muloŋa Yehova nayili akwamutaŋa waIsarela, nindi, Nkeŋakeŋenu muhandi.

⁵Bayi mukeŋakeŋa kuBeteluku, bayi mwiŋila muGiligaluku, bayi muhita kuBerishebaku; muloŋa akwaGiligali akaya muwukoli chalala, nikuBeteli kwakekala kwamukunkulwayi.

⁶Keŋakeŋenu Yehova muhandi; mukunkulwayi wakayimotokela neyi kesi mwitala daYosefu, kakalashamu, hikwaka mwekana muntu wakakajima muBeteluku.

⁷Enu mwabalumunaŋa wuŋaji, hiwukwikala mutondu walula, mwanataŋa kuloŋa heseki.

⁸Mukeŋakeŋenu waleŋa tutumbwa Akwakutwa Masaŋu naNyama naKawa, wabalumunaŋa wulelu wakufwa hiwukwikala budidi, wabalumunaŋa mwaana hiwukwiyila nawufuku; watambikaŋa meji amukaluŋalwiji, hakuyiichila hewulu deseki; ijina dindi diyi Yehova,

⁹waletelaŋa akwaŋovu kujilumuka kwakukasumuka, kulonda kujilumuka kuwani mukala wachipaka.

¹⁰Ahelaŋa woka andaŋa akwawu muchota, atiyaloŋa kumuchima bwi muntu wahoshaŋa yalala.

¹¹Ichi chimudi nakuvidatola atuzweŋi nakuyidiila tidiku yawu yanyilami; chimunatuŋi matala amalola akubalula, himwakashakama mwokuku; munadimi matempa anyivinyu amawahi, himwakanwamu vinyuku.

¹²Muloŋa ami neluki nyiloŋa yenu chiyavula, ninshidi jenu chiasweja Ŋovu; mwakabishaŋa ntu aloŋa, mwatambulaŋa maseleka, mwafwopelaŋa atuzweŋi nyiloŋa yawu muchota.

¹³Dichi muntu wadihoŋesha kumuchima wakamwena zo-o hamwaka wudi chochochu; muloŋa himwaka watama.

¹⁴Keŋakeŋenu yayiwahi, bayi yatamaku, kulonda muhandi; niYehova, Nzambi wamazaza, wakekala nanenu, neyi chimunahoshi.

¹⁵Helenu yatama, mukeŋi yayiwahi, mukoleshi wuŋaji muchota; wamba kela Yehova Nzambi wamazaza wakayitoŋa akwaYosefu anashali.

¹⁶Dichi Yehova, Nzambi wamazaza, Mwanta, nahoshi nindi, Mumalubanza ejima akadila makumbu; munyikwakwa yejima akela nawu, Yayo! Yayo! Akatambika andimi enzi nakudishonashona, akatambika akweti wukalawenu wakudila nyikeŋa enzi nakudila makumbu.

¹⁷Mumatempa anyivinyu ejima mwakekala kudila makumbu; muloŋa ami nakahita mukachi kenu. Dimu mwanahoshiyi Yehova.

¹⁸Yayo, enu mwakeŋa aŋa ifuku daYehova! Ochu ifuku daYehova mukudikeŋeladi? Himwidima, hichejejuku.

¹⁹Chidi neyi muntu wukutemuka mutupa hákubulakana nabera; nindi epili mwitala, asachili chikasa chindi kumbaŋu, amusuma nikudi kapela.

²⁰Ifuku daYehova dibuli kwikala mwidima? Indi diikali chejeji? Dibuli kwikala mwidima wasweja, wakadi nihatooka?

²¹Naheli, nadiwuli yawija yenu, hinukutiya kuwaha nakukumaŋana kwenu kwakudihudikaku.

²²Mwalala, hela mukunlambula nyilambu yenu yakushita, ninyilambu yenu yawuŋa, hinukuyitambulaku. Hela nyilambu yenu yakuwunda yawanyama anuna hinakayitala nidisuku.

²³Fumishenu muyoyu watumina twenu kudami; hinakeŋi kwami kutiya yisanji yenu yidi nakuvumaku.

²⁴Chiŋa wuŋaji wupwapumukaŋa neyi meji, nikuloŋa kupwapumukaŋa neyi lukaloŋa lweneni.

²⁵Enu akwamutaŋa waIsarela, mwanleteli ayimuna akuketula ninyilambu nyaka makumi awana muna mwisaŋa, tahindi?

²⁶Mwalala, mwasendelaŋa itenti daMoloki wenu, nimalala awakishi enu akutuŋa, yowu katumbwa kamukishi wenu imwadikoŋeleli.

²⁷Dichi nakayitwalisha muwukoli kupandakana Damakasa. Dimu mwanahoshiyi Yehova, ijina dindi diyi Nzambi wamazaza.