Read MUKANDA WANZAMBI Amosi 6 Bible Online

Amosi 6 - MUKANDA WANZAMBI bible

Amosi 6

¹Yayo, awa ashakama muZiyona nakudiwujola; ashakama kumpidi yaSamariya nákubula kwakama! Amayala atúumbakana amunyuza yalema, kwenzaŋa akwamutaŋa waIsarela!

²Hitenu kuKalane, mutali; mufumi nawa kwenoku muyi kuHamati muneni; mukunkumuki nawa kuGati wawaFwilistinu. Komana wena diwu anabadiki mawantawa? Komana ŋinza yawu yinabadiki yenu kutoha?

³Enu mwashinjikaŋa ifuku datama kwakulehi, mwaleteshaŋa itanda dandombu kwakwihi.

⁴Enu mwakamaŋa hatudidi twambiŋa yanjamba, mwadolojolaŋa hatudidi twenu, mwadyaloŋa anyana kanyikoku akusakula hamukanka, ninyana kaŋombi akusakula mwitaŋa;

⁵mwembaŋa tumina twaŋoma twakwimba nayisanji, mwadisoŋelaŋa yisanji yenu neyi Davidi;

⁶mwanwinaŋa vinyu muyikashi yantentu, mwawayaloŋa manji chiŋa wowu abadika kulema; kwinza chamonaŋa Yosefu ihuŋu himwaneŋaŋaku.

⁷Dichi enu mwakaya muwukoli hamu nanawa akasambilaŋahu dehi kuya muwukoli, nikuluŋa kwenu kumwadiŋi nakudolojola kwakahita.

⁸Yehova Nzambi wamazaza nindi, Mwanta Yehova nadisanyiki yomweni, nindi, Kulema kwaYakoba nakutiyi kumuchima bwi, matalindi awanta nayiheli mbe; dichi nimukala niyuma yejima yidumu nakayihana.

⁹Neyi mwitala dimu mwakashala antu ikumi, akafwa.

¹⁰Chakumunyamunawu muntu kudi kawusoku windi mukwakumushita kulonda edishi mafwaha mwitala, wukumwila mukwawu wudi mukachi ketala nindi, Omu muwudi munashali mukwawu? Yena wukwila nindi, Nehi. Wukwila nindi, Shi-shi! Bayi tutena ijina daYehovaku.

¹¹Tiyenu, muloŋa Yehova nahoshi dehi nindi, Matala amaneni chiŋa akayihumona humu-humu, tumatala twanyanya, chiŋa akatusandola mwa-mwa.

¹²Tuwalu twendi lufuchi helola? Muntu adimuhu naŋombi? Mwaka mubalumunaŋa wuŋaji wikali ndulu, ninyikabu yakuloŋa yili mutondu walula.

¹³Enu mwazaŋalalaŋa nachuma chamukunkulwayi, mwelaŋa nenu, ŋi nseŋu tudi naju hitunajimoni nanichi chitunajikishi etu awenuku?

¹⁴Ilaŋa tiyenu, enu akwamutaŋa waIsarela, nakayinyamwina muza, wakayikabisha chakufumisha kuwiŋililu wakuHamati ndo nikukakaloŋa kakuchana. Dimu mwanahoshiyi Yehova, Nzambi wamazaza.