Read MUKANDA WANZAMBI Amosi 7 Bible Online

Amosi 7 - MUKANDA WANZAMBI bible

Amosi 7

¹Tiyenu chuma chanimwekesheleliyi Mwanta Yehova. Kutala, hakwila tubola hatachikaŋa kumena matahu akukuminina; hikumena kwakukuminina kwelaŋa neyi mwanta nakesi dehi matahu indi.

²Cheliluwu anamanishi dehi kudya matahu amwituŋa, hinukwila nami, Eyi Mwanta Yehova, anakenaku mwani, nalembi! Indi Yakoba wakemana ŋahi? muloŋayena himunyanya.

³Yehova hakufuntisha muchima mwivumu hansaŋu iyi; Yehova nindi, Hichakekalaku.

⁴Tiyenu chuma chanmwekesheleliyi Yehova. Kutala, Mwanta Yehova hakutambika kusompesha kwakusompesha nakesi; hikakulasha inyiŋi deneni, hikakukeŋa kulasha nimpata.

⁵Hinukwila nami, Eyi Mwanta Yehova, lekaku mwani, nalembi! Indi Yakoba wakemana ŋahi? muloŋa yena himunyanya.

⁶Yehova hakufuntisha muchima mwivumu hansaŋu iyi; Yehova nindi, Nichumichi nawa hichakekalaku.

⁷Tiyenu chuma chanmwekesheleliyi. Kutala, Mwanta nemani kumbaŋu yakutuŋa namwonji wakuzenzumuna, muchikasa chindi mudi mwonji wakuzenzumuna.

⁸Yehova hakuŋila nindi, Eyi Amosa, wunamoni chumanyi? Nami, Mwonji wakuzenzumuna. Mwanta nindi, Tiya, nakasha mwonji wakuzenzumuna mukachi kawantu ami aIsarela, hinakahitila nawa cheŋi kudi wenaku.

⁹Yinaŋanaŋa yaIsaka yakabalumuka yihembi, malala aIsarela akashesheka; nakanyamukila akwamutaŋa waYerobowami nampoku yakabali.

¹⁰Dichi kapristu wakuBeteli Amaziya hakutemesha mazu kudi mwanta wawaIsarela Yerobowami, nindi, Amosa nakukwati chikuchi mukachi kawakwamutaŋa waIsarela; ituŋa hidinatweshi mazu indi ejimaku.

¹¹Muloŋa Amosa nahoshi dehi nindi, Yerobowami wakafwa nampoku yakabali, niaIsarela chalala akayifumisha mwituŋa dawu akayitwala muwukoli.

¹²Amaziya hakumwila Amosa, nindi, Eyi mukwakumona, temukaku wuyi mwituŋa daYuda, wakadiiluku yakudya yeyi, wakaprofweteluku;

¹³bayi wakaprofwetaŋa nawa cheŋi kuBeteluku; muloŋa diku kumalala amwanta, diku nawa kuchipaŋu chamwanta.

¹⁴Amosa hakwakula, hakumwila Amaziya nindi, Ami hinikaprofwetuku, hela mwana kakaprofwetuku; nikabiŋa kwami, nimukwakukunkula nyishikimi.

¹⁵Yehova diyi wanfumishili kumudimu wakulondela mukuya mukanka wanyikoku, Yehova diyi nawa waŋilili nindi, Yaku wakaprofweti kudi antu ami aIsarela.

¹⁶Ichi dinu tiyaku izu daYehova. Eyi wudi nakwila neyi, Bayi wakaprofwetaŋa mazu akubayisha aIsarelaku, bayi wutaŋisha mazu akubayisha akwamutaŋa waIsakaku.

¹⁷Dichi dinu tiya mwanahoshiyi Yehova. Nindi, Iŋodeyi wakekala chivumbi mutawuni, anyaneyi amayala nawambanda akadimboka nampoku jatubali, nimpata yeyi akayibalula balula namwonji; nineyi aweni wakafwila mwituŋa dakadi kujila, chalala niaIsarela akayifumisha mwituŋa dawu, akayitwala muwukoli.