Read MUKANDA WANZAMBI Amosi 8 Bible Online

Amosi 8 - MUKANDA WANZAMBI bible

Amosi 8

¹Tiyenu chuma chanmwekesheleliyi Mwanta Yehova. Kutala, muloŋa wanyikabu yahankanza.

²Hakuŋila nindi, Eyi Amosa, wunamoni chumanyi? Nami, Muloŋa wanyikabu yahankanza. Yehova hakuŋila nindi, Antu ami aIsarela kunayikumi dehi, hinakahitilaku nawa cheŋuku.

³Dena ifuku odu tumina twamutembeli twakabalumuka kukaloka nyiteti. Dimu mwanahoshiyi Mwanta Yehova. Afu akavula; akayinatolaŋa hanzi kwejima kwejima chawumweneni hohu.

⁴Enu mwakeŋa a kuminya abula yuma, mukaŋeshi atuzweŋi amwituŋa,

⁵mwelaŋa nenu, Kakweji kakafwa ifukwinyi, kulonda twakalandishaŋa kudya kwansaachi? Sabata yikuhita mwakanyi kulonda twakalandishi tidiku, twakakeheshi chimpaya, twakatoheshi lushekeli, twakabalumuni pezu yiikali yakudimbana;

⁶kulonda twakalandi kazweŋi nasiliva, twakalandi wabula yuma namasapatu ayedi, twakalandishi tidiku jankuuku jashalashalaŋa? Tiyenu munukuyileja.

⁷Yehova nasanyiki dehi kulema kwaYakoba, nindi, Chalala yuma yaneluwu yejima hinamba kayivulamenaku haya nyaka.

⁸Ituŋa dibuli kuzaala nachumichi, niantu ejima ashakamamu abuli kudishonashona? Mwalala, dakababa dejima neyi Kaloŋa, dakabwankaŋila, dakanyikumuka cheŋi neyi Kaloŋa kaEjipitu.

⁹Mwanta Yehova nindi, Hefuku odu nakahumisha itaŋwa iku dichidi mukachi kewulu, nakeyilisha hanu hamaseki iku kuchidi mwaana to-o.

¹⁰Yawija yenu nakayibalumuna kudishonashona, tumina twenu twejima nakatubalumuna nyikeŋa yakudila; nakavwikisha antu ejima yikeleyi mumbunda, nakatewisha antu ejima tuwewa; nakayidilisha kudila kudi neyi kwakudila mwana wasemuka wunka, kukuma kwayumoyu kwakekala neyi ifuku dalula.

¹¹Mwanta Yehova nindi, Tiyenu, kwakenza mafuku inakaleta nzala mwituŋa, hinzala yayakudyaku, hela mpwila yamejuku, yakela nzala vakutiya mazu aYehova.

¹²Akata mbatamba, afuma kaluŋalwiji aka, aya kaluŋalwiji kakwawu, afuma kukabeta kakuchimunswa, aya kumusela; akaya niniku niniku lufuchi nakukeŋakeŋa izu daYehova, hiyakadimonaku.

¹³Ifuku odu ayaloŋadima amawahi nianyikwenzi akaheŋela nampwila.

¹⁴Awa asanyikaŋa muloŋa waSamariya, nawu, Eyi Dani, chahandayi Nzambi yeyi kwaamu; nawu, Chahanda njila yaBerisheba kwaamu; wenawa diwu akadimbuka, hiyamba kanyamuka nawa cheŋuku.