Read MUKANDA WANZAMBI Amosi 9 Bible Online

Amosi 9 - MUKANDA WANZAMBI bible

Amosi 9

¹Namumweni Mwanta nemani kumbadi yakameŋa. Nindi, Etaku nyitu yayishimi kulonda yipamba yakuchisu yikanki; yikotweli hanyitu yawu wejima wawu; akushalaku nukuyijaha nampoku yakabali; hikwakatemuka niwumuku, hikwakapuluka niwumuku.

²Hela akapunda nawu epili mukaluŋa, chikasa chami chakayinonamu; hela akakandama mwiwulu, nakayihulumunamu.

³Hela akabatama hewulu daKarameli, nakayikeŋakeŋa, nakayifumishaku; hela akabatama kumesu ami mwishina dakaluŋalwiji mwamweni, hela mwenomu nakamuleja kapela wakayisuma.

⁴Hela akaya kumesu awayilumbu jawu muwukoli, nikwenoku nawa nakaleja mpoku yakabali yakayiŋaha, nakayita mesu ami kulonda niyikoŋi chatama, hichakuyikoŋa chachiwahuku.

⁵Muloŋa Mwanta Yehova wamazaza, diyi welaŋa akunka iseki dinowa nikunowa, niantu ashakamamu ejima hiyakudishonashona; dakababa dejima neyi Kaloŋa; dakanyikumuka cheŋi neyi Kaloŋa kaEjipitu.

⁶Diyi watuŋaŋa mwiwulu matalindi ahewulu, diyi washimatisha ifumbafumba dindi heseki; diyi watambikaŋa meji amukaluŋalwiji hakuyiichila hewulu deseki; ijina dindi diyi Yehova.

⁷Yehova nindi, Enu anyana kaIsarela, kudami himudi neyi anyana kawaEtiyopiya ku? Hinayifumishili mwituŋa daEjipituku? Hinafumishili aFwilistinu kuKafwatoru ku? Hinafumishili aSiriya kuKiruku?

⁸Tiyenu, mesu aMwanta Yehova atala hawantiwu wanshidi, nakawujilumuna wufumi hewulu deseki; hela chochu, hinakajilumuna chikupu mutaŋa waYakobaku. Dimu mwanahoshiyi Yehova.

⁹Muloŋatala, nakaleja antu, nakasala akwamutaŋa waIsarela mukachi kanyuza yejima, neyi chasalaŋawu mbutu mumusalu, hela chochu, kalubutu kakuminamu kukeha hikakaholoka hesekuku.

¹⁰Akwanshidi ejima ahadi antu ami ahoshaŋa nawu, Kutama hikwakatuwana, hela kutuketulwila kumbiduku; akafwa kumpoku yakabali.

¹¹Ifuku odu nakatuŋiulula cheŋi tabanaka yaDavidi yashiwuka, nakajika mwahumoka; nakatuŋulula cheŋi mbaŋu jayu jafwa, nakayituŋulula neyi chiyadiŋi hamafuku akumwaka;

¹²akayiheta aEdomi anashaluku, ninyuza yejima yatumbawu ijina dami. Dimu mwanahoshiyi Yehova wudi nakwila chumichi.

¹³Yehova nindi, Tiyenu, kwakenza mafuku akwila mukwakudima wakamuwana mukwakwaŋula, mukwakudatola nyikabu yavinyu wakamuwana mukwakukuwa mbutu; mapidi akavwa vinyu yatowala, mpidi janyanya jejima jakanowa.

¹⁴Nakafuntisha cheŋi antu ami aIsarela ayili muwukoli, akatuŋulula cheŋi nyikala yela dehi mahembi hohu, akashakamamu; akadima matempa anyivinyu, akanwamu vinyu yawu; akadima maha, akadyamu yakudya yawu.

¹⁵Nakayitumba mwituŋa dawu, hiyamba kayibwita nawa chiŋa mwituŋa dawu dinayinkuku. Dimu mwanahoshiyi Yehova Nzambi yeyi.