Read MUKANDA WANZAMBI Jonasi 1 Bible Online

Jonasi 1 - MUKANDA WANZAMBI bible

Jonasi 1

¹Izu daYehova denjili kudi mwana kaAmitayi Yona,

²nindi, Nyamukaku, wuyi kuNineve, mukala wuna weneni, wakayibidiki; Muloŋa kutama kwawu kunakandami dehi kwiwulu kunashiki kudami.

³Iloŋa Yona kwindi wanyamukili akayi kuTarashishi, akamutemuki Yehova. Wayili kuYopa, kwenoku waweni watu hiwukuya kuTarashishi. Wafweteli mwombu wawu, wepililumu, kulonda akayi nawu kuTarashishi afumi kudi Yehova.

⁴Iloŋa Yehova watemesheli mpepela yeneni kukaluŋalwiji, meji hiyakusweja nankashi kuzuwa, niwatu wakeŋa eli kubaluka.

⁵Akwakwendesha watu atiyili woma, hiyakukaloka wejima wawu kudi akishi awu; niyuma yadiŋi muwatu hiyakuyumbila mumeji kulonda awupepeshi. Iloŋa Yona wadiŋi weŋila dehi mukachi kawatu; nakami dehi, hadi ninamutulu twatweni.

⁶Mwanta wawatu wayili kudi yena, hakumwila nindi, Ehee! Eyi Satulu! Wudi nakwila ŋahi? Hindukaku, tambikaku Nzambi yeyi, hadaha Nzambi wukututoŋahu, kulonda tubuli kujilumuka.

⁷Hiyakudileja wejima wawu, nawu, Tuyenu tusakulenu nachinjikijilu chakusakula nachu, kulonda twiluki natukojeji chumichi chatama. Nochu asakwili nachinjikijilu, amukwatili Yona.

⁸Hiyakumwila nawu, Atuleji mwani, chumichi chatama chinatuwani hanka? Indi eyi mudimu weyi wanka? Wafuma kudihi? Kwituŋa denu kudihi? Indi eyi muyakwamuza wanyi?

⁹Yena wayilili nindi, Ami nikaHeberu, namwakamaŋa Yehova, Nzambi wamawulu, diyi waleŋeli nikaluŋalwiji namaseki awuma.

¹⁰Owu amayala hiyakutiya woma waweni, hiyakumwila nawu, Indi eyi dinu wuneli ŋahi? Muloŋa owu amayala elukili nawu yena hakumutemuka Yehova, Muloŋa yena wayilejelumu.

¹¹Hiyakumwila nawu, Ndochu etu tukukwila ŋahi kulonda tumoni meji kumwena? Muloŋa meji hiyakusweja kuzuwa nankashi.

¹²Yena wayilili nindi, Nnyamunenu kwenu, muŋumbili mumeji; mukumona meji akumwena, Muloŋa neluki kwami nami iyi mpepela yeneni nankashi yinayiwani hansaŋu yamami.

¹³Owu amayala avuwili naŋovu nawu afunti cheŋi kuchi kumu, kutwesha nehi, muloŋa meji hiyakusweja nankashi kuzuwa nakufuma kwakuyawu.

¹⁴Dichi wena abileleli kudi Yehova, nawu, Tunalembi, eyi Yehova, tunalembi, bayi tujilumuka nakukoola wumi wayeniwu muntuku, bayi wututwika muloŋa wamukunkulwayuku. Muloŋa eyi Yehova wuneli kweyi mwejima mwaya muchima weyi hohu.

¹⁵Nochu amunyamwini Yona, amuumbilili mumeji, nimeji elili be-te-te, alekeli kuzuwa.

¹⁶Owu amayala hiyakumutiya Yehova woma nankashi, hiyakumuketwila Yehova chimuna, hiyakudishiilamu.

¹⁷Yehova waloŋesheli inshi muneni kulonda amuminyi Yona. Yona wadiŋi mwivumu danshi mafuku asatu nimwaana niwufuku.