Read MUKANDA WANZAMBI Jonasi 3 Bible Online

Jonasi 3 - MUKANDA WANZAMBI bible

Jonasi 3

¹Izu daYehova dashikili kudi Yona kapampa kamuchiyedi,

²nindi, Nyamukaku, yaku kuNineve, mukala wuna weneni, wakayibidiki mazu inakakuleja.

³Nochu Yona wanyamukili, wayili kuNineve, mwomwizu daYehova. Hakwila Nineve wadiŋi mukala weneni wasweja kutoha, wakwenda kwamafuku asatu.

⁴Yona watachikili kwijila mumukalowu, wendeli kwenda kwefuku dimu, wabidikili nindi, Kunashali mafuku makumi awana Nineve akawukisaŋana.

⁵Antu amuNineve amwitiyili Nzambi; adibidikili nawu, Tujiŋenu nanzala. Avweli yikeleyi, kufumisha hadi wadiŋi walema mukachi kawu nakushi ka kudi wadiŋi wamukunkulwayi.

⁶Nsaŋu yashi kili kudi mwanta wakuNineve, yena wanyamukili hetanda dindi dawanta, wavúulili ihina dindi, wavweli chikeleyi, washakamini mumawuti.

⁷Nimwanta niayilolu jindi atiyaŋeni muchota abidikishi muNineve mwejima, nawu, Kwosi hela muntu hela kanyama, hela ŋombi hela mpembi, wakatompahu chumaku. Hela kudya bayi adyaku, hela kunwa meji bayi anwa mejuku.

⁸Akavwali yikeleyi hohu, niantu nianyama, akalembi nankashi kudi Nzambi; chalala, akaleki wejima wawu mwelaŋawu mwatama, akaleki nimadombu awu ekalawu nawu.

⁹Wunachiluki hinyi? Wamba kela neyi Nzambi wakabalumuka akafuntishi muchima mwivumu, akaleki kuzuwa kwindi kunasweji, kulonda tubuli kujilumuka.

¹⁰Nzambi wamweni nyidimu yawu, nichakulekawu mwelilanawu mwatama, Nzambi wafuntishili muchima mwivumu nachumochu chatama chahosheliyi nindi nakayikoŋa; hachilili kwinduku.