Read MUKANDA WANZAMBI Numere 16 Bible Online

Numere 16 - MUKANDA WANZAMBI bible

Numere 16

¹Henohu Kora, mwana kaIzihari, mwana kaKohati, mwana kaLevi, akwatili mpuna naDatani naAbirami, anyana kaEliyabi, naOni, mwana kaPeleti, anyana kaRubeni;

²aleteli winyi naMosi hamu nawanyana kaIsarela amakwawu atulamba amuchipompelu, alema muchipompelu, ayampuhu, makulakaji ayedi namakumi atanu;

³apompeleli aMosi naAroni na ndombu, ayilili nawu, Munadikila keshi dehi, chipompelu chejima chajila niwunashaluhu hosi, Yehova wudi mukachi kawu hohu. Indi enu munadilemeshelidi hachipompelu chaYehova?

⁴Chachitiyiliyi Mosi wadinatili chamesu hamaseki.

⁵Wahosheli naKora nawantu apompeliyi nawu, nindi, Kumadiki budidi Yehova wakamwekesha windi niwajila wuduhu, wakamukundamisha kwakwihi nayena. Yowu akatondayi diyi akakundamishayi kwakwihi nayena.

⁶T iyenu chimwakela. Mwakanona yeŋa yakusendela insensi, nineyi Kora, niakwenu ejima wunapompi nawu;

⁷mwakashu mukesi, mwakashuhu niinsensi kumesu aYehova kumadiki. Twakamona iyala akatondayi Yehova diyi wakajila, munadikilakeshi enu anyana kaLevi.

⁸Mosi hakumwila Kora, nindi, Tiyenu mwani, enu anyana kaLevi;

⁹komana chanayambuliyi Nzambi yaIsarela kudi chipompelu chaIsarela, ayikundamishi kwakwihi nayomweni, nindi, mukoŋi mudimu watabanaka yaYehova, mwimani kumesu achipompelu nakuyikalakela, chinakehi?

¹⁰Yena nayikundamishi dehi kwakwihi nineyi niana kweyi anyana kaLevi ejima, mukeŋi niwupristu nawa?

¹¹Dichi dinu nineyi niakwenu wunapompinawu munamupompeli Yehova nandombu. Indi Aroni hinyi mwakamumutobeli?

¹²Mosi watemesheli nakutambika Datani naAbirami, anyana kaEliyabi. Wena nawu, Hitukwinza kwokuku;

¹³chiwunatufumishi mwituŋa datuloŋa twamayeli nawuchi hiwukutujahisha munu mwisaŋa, komana chinakehi, winzi wubombeluku nikudilisha kalamba ketu?

¹⁴Ochu wunatushikiji mwituŋa datuloŋa twamayeli nawuchi wanyi. Wunatwinki wuswanawamaha namatempa anyivinyu wanyi. Keŋa wulokoli awa mayala mesutahindi? Hitukwinza kwokuku.

¹⁵Mosi waswejeli kuzuwa, hakumwila Yehova, nindi, Bayi wutala hahimulambu wawuku. Hinayidiili hoku chimbulu niwumuhu, hela kukatishahu muntu niwumuhu kwamuku.

¹⁶Mosi hakumwila Kora, nindi, Kumadiki kemanenu kumesu aYehova, nineyi, nichipompelu cheyi chejima, nineyi, niwena, niAroni.

¹⁷Mwakasendi wejima wenu yeŋa yenu yakusendela insensi, mwakashuhu insensi, mwakaleti wejima wenu yeŋa yenu kumesu aYehova, yeŋa makulakaji ayedi namakumi atanu; nineyi niAroni, iwunacheŋa chindi, iwu nacheŋa chindi.

¹⁸Asendeli wejima wawu yeŋa yawu, ashilumu kesi, ashiluhu niinsensi, emeni kuchisu chetenti dakubulakena hamu naMosi naAroni.

¹⁹Kora wayipompesheleli chipompelu chejima nandombu kuchisu chetenti dakubulakena; kulema kwaYehova kwamwekeneni chipompelu chejima.

²⁰Yehova wahosheli naMosi naAroni,

²¹nindi, Ambukenu mufumi mukachi kachipompelu ichi, kulonda niyinoŋeshi hohenahanu zo-o chikupu.

²²Adinatili chamesu awu hamaseki, nawu, Eyi Nzambi, Nzambi yawaspirituja wantu ejima, muntu wukuvulumuna wumu hohu, wuzuwili chipompelu chejima?

²³Yehova wahosheli naMosi,

²⁴nindi, Hoshaku nachipompelu, neyi, Oku kutabanaka yaKora, naDatani, naAbirami, fumenuku.

²⁵Mosi wanyamukili, wayili kudi aDatani naAbirami. Akulumpi awaIsarela amulondeli.

²⁶Wahosheli nachipompelu, nindi, Fumenu mwani, kumatenti anawamayala atama, bayi mukwata kuyuma yawuku, mwakenza kanoŋela kumunanshidi jawu jejima.

²⁷Afuma nikutabanaka yaKora, naDatani, naAbirami, mwa-mwa. Datani naAbirami edi kili, emeni kuyisu yamatentawu, ni aŋodi jawu, ni anyanawu amayala, ninyikeki yawu.

²⁸Mosi welilinindi, Tiyenu mumwakelukila nenu Yehova diyi wantemesheli, nindinakeli nyidimu yejimiyi, mwiluki nenu hinayilaŋa chakumuchima wamuku;

²⁹neyi amayalawa akufwa neyi chafwaŋawu akwawu antu ejima, indi neyiakamona chamonaŋawu akwawu antu ejima, komana Yehova hantemesheluku.

³⁰Ilaŋa neyi Yehova wukwila chuma chachiha, niiseki dikwasamamukanwa kadu, dikuyiminya niyuma yawu yejima, hiyakuholokela amomi mwikela, dihu himwakashinshikila nenu amayalawa anamudiwuli Yehova.

³¹Amweni, nakumishi dehi kuhosha mazu awa ejima, iseki dadiŋi kwishina dawu dabalukili.

³²Iseki daasamini mukanwa kadu dayiminyini, nimatalawu, niantu aKora ejima, niyuma yawu yejima.

³³Niwena niyuma yawuyejima aholokeli amomi mwikela, iseki dibulakana nicheŋi hewulu dawundwa, ajilumukili muchipompelu.

³⁴AIsarela ejima adiŋi emajala kwakwihi, atemukili chatiyiluwu nyiteti yawu. Nawu, Iseki dakenza katuminya.

³⁵Kesi kafumini kudi Yehova, kayinoŋesheli owu amayala makulakaji ayedi namakumi atanu aleteli insensi.

³⁶Yehova wahosheli naMosi,

³⁷nindi, Muleji Eleyazari mwana kakapristu Aroni anoni yeŋa yakusendela insensi mukesi, ni kesi akasandili kunakwakulehi, muloŋa yajila;

³⁸Iyi yeŋa yanawa akwanshidi anatamishi wumiwawu awenawu, ayichili yeŋa yawubasa yakujika hakameŋa; muloŋa anayilambuli kumesu aYehova, dichi yajila. Yakekalaŋa chinjikijilu chakutalilaŋahu anyana kaIsarela.

³⁹Kapristu Eleyazari wanoneni yeŋa yainsensiya wuneŋu yalambwiluwu owu ocheluwu; ayichilili chifwiku chakameŋa;

⁴⁰kulonda kwanukishaŋa nachu anyana kaIsarela, kulonda hakabuli kumwekana mwenyi wabula kusemuka kudi Aroni wakenza kwakwihi nakwocha insensi kumesu aYehova; wakenza kamona chamweniyi Kora nawakwawu apompeliyi nawu; mwomwahosheliyi Yehova nayena kukanwa kaMosi.

⁴¹Chikwachili, chipompelu chawanyana kaIsarela chejima chatobeleli aMosi naAroni, nawu, Munajahi antu aYehova.

⁴²Chelili chipompelu chinapompeli dehi aMosi naAroni, hiyakutala kwitenti dakubulakena, hiyakumonavu dinabutuhu, ni kulema kwaYehova hikukumwekana.

⁴³Amosi na Aroni enjili kumesu etenti dakubulakena.

⁴⁴Yehova wahosheli naMosi,

⁴⁵nindi, Fumenu mukachi kachipompelu ichi kulonda niyinoŋeshi hohenahanuzo-o. Hiyakudinata chamesu hamaseki.

⁴⁶Mosi wamwilili Aroni, nindi, Nonaku cheŋa cheyi chakusendela insensi, wushumu kesi kahakameŋa, wushuhu insensi, wutwali swayi kudi chipompelu, wuyilili yakuyibuta nachu; kudi Yehova kunenzi dehi ndombu, chipúpu chinatachiki dehi.

⁴⁷Aroni wanoneni mwomwamulejeli Mosi, wayili lufuchi mukachika chipompelu. Nindi atali, chipúpu mwaka chinatachiki dehi mukachikawantu. Washiluhu insensi, welili yakubuta nachu antu.

⁴⁸Wemenihakachi kawafu nawamomi. Chipúpu chiimana ni kwimana.

⁴⁹Antu afwili nachipúpu makombakaji ikumi nawana namakulakaji atanu nayedi, akubombela hadi awa afwili nansaŋu yaKora.

⁵⁰Aroni wafuntili cheŋi kudi Mosi kuchisu chetenti dakubulakena. Chipúpu chiimana ni kwimana.