Read MUKANDA WANZAMBI Numere 20 Bible Online

Numere 20 - MUKANDA WANZAMBI bible

Numere 20

¹Anyana kaIsarela, chochipompelu chejima, ashikili mwisaŋa daZini hakakweji kakusambila. Antu ashakamini muKadeshi. Kwoku kwafwililiyi Miriyami, kwoku kwamujiikiluwu.

²Hi kwadiŋi meji achipompeluku. Apompeleli aMosi naAroni nandombu.

³Antu azuŋili naMosi, elili nawu, Mutenowu twafwilili tuhu kwetuhafwiluwu ana kwetu kumesu aYehova!

⁴Indi munaletelidi chipompelu chaYehova munu mwisaŋa tufwilumu niyimuna yetu ninetu aweni?

⁵Mwatufumishililidi muEjipitu namutuleti munu mwatama? Munu mwakadinimbutu, hela yikuyu, hela nyivinyu, hela mabula; nimeji akunwakwosi.

⁶AMosi naAroni afumini kwadiŋi chipompelu, ayili kuchisu chetenti dakubulakena, adinatili chamesu hamaseki. Kulema kwaYehova kuyimwekenanikuyimwekena.

⁷Yehova wahosheli naMosi,

⁸nindi, Nonakumbwechi, wupompeshi chipompelu, nineyi nimana kweyi Aroni, muhoshi ilola kumesu awu, diidishi meji adu, wakayiidishili meji mwilola, wakanwishi nichipompelu niyimuna yawu.

⁹Mosi wanoneni mbwechi yadiŋi kumesu aYehova mwomwamulejeluwu.

¹⁰AMosi naAroni apompesheli chipompelu kumesu elola, wayilili nindi, Tiyenu dinu, enu akwakudikaŋa, tuyiidishili meji mwilolidi tahindi?

¹¹Mosi wanyamwini chikasa chindi kwiwulu, weteli ilola nambwechi yindikayedi. Mwedikili meji amavulu, chipompelu chanwini niyimuna yawu.

¹²Yehova hakwila aMosi naAroni, nindi, Ichi chimunabuli kuŋitiya, mubuli kunjilika kumesu awanyana kaIsarela, dichi himwamba keŋachipompelu ichi mwituŋa dinayinkuku.

¹³Wenawa diwu meji aMeriba; nanochu chazuŋiluwu anyana kaIsarela naYehova, niyena wadijilikili hadiwena.

¹⁴Mosi watemesheli antemesha afumi kuKadeshi ayi kudi mwanta wakuEdomi. Nindi, Tiya chanahoshiyi mana kweyi Isarela, nindi, Eyi wuneluki kukabakana kwejima kutunakabakani;

¹⁵ninichi chakunku mukiluwu ankakulula jetu muEjipitu, ninichi chitwashakamini nyakayayivulu muEjipitu, ninichi chatukabishiluwu aEjipitu, ninetu nankakulula jetu;

¹⁶hitukudilila, kudi Yehova, hakutiya izu detu, hakutemesha kapelu watufumishili muEjipitu. Yetu awa kunu kuKadeshi, mukala wakunsa kwakumina ŋinzayeyi.

¹⁷Atwitiji mwani, kuhitakana mwituŋa deyi. Hitwakahitila kumaha, hela kumatempa anyivinyuku. Hitwakanwa hela meji amumashimaku. Twakahita kwamumukwakwa wambala wamwanta hohu, hitwakasenukatuya hela kuchidiilu hela kuchimunswaku, ninichi chitwakamotoka pinza yeyi.

¹⁸Edomi wamwilili nindi, Eyi kuhita mwamami nehi, nakenza kakulotokelana mpoku yakabali.

¹⁹Anyana kaIsarela amwilili nawu, Twaka kandukilaya mukwakwa. Neyi twakanwa meji eyi, ninami niyimuna yami, nakafweta. Nikumini dakuhitamu kwanyendu hohu, bayi chuma chacheŋuku.

²⁰Yena nindi, Eyi kuhita nehi. Edomi hakwinza kudi yena nawantu amavuluna Ŋovu.

²¹Dichi Edomi walekeli kwitŋa Isarela kuhita muŋinza yindi. Isarela abalumuka nikubalumuka hakufuma kudi yena.

²²Anyana kaIsarela chochipompelu chejima, afumini kuKadeshi ayilikumpidi yaHori.

²³Yehova wahosheli naMosi naAroni kumpidi yaHori kuŋinza yetuŋa daEdomi,

²⁴nindi, Aroni akamupompesha kudi ayindi. Hakepila kwindi mwituŋa dinenki anyana kaIsarelaku, muŋa mwadikaŋili nezu dami kumeji aMeriba.

²⁵Yaku naAroni namwanindi Eleyazari, wukandami nawu hampidi yaHori,

²⁶wakamuvúuli Aroni maninindi, wakamuvwikuwu mwanindi Eleyazari. Aroni akamupompesha kudi ayindi, wakafwila kwenoku.

²⁷Mosi welili mwamulejeliyi Yehova. Akandukili hampidi yaHori, chipompelu chejima chiyimonaŋa.

²⁸Mosi wamuvúulili Aroni mahinindi, wamuvwikiluwu mwanindi Eleyazari. Aroni wafwilili henohu hewuludampidi. AMosi naEleyazari akunkumukili mpidi.

²⁹Chipompelu chejima chamwenuwu Aroni nafwi dehi, amudilili Aroni mafuku makumi asatu, wowu mutaŋa waIsarela wejima.