Read MUKANDA WANZAMBI Numere 25 Bible Online

Numere 25 - MUKANDA WANZAMBI bible

Numere 25

¹AIsarela ashakamini muShitimi, antu atachikili kwila wuvumbina wanyana kawaMowabi awambanda.

²Muloŋa wena atambikili antu ayi kwakuketwilawu akishi awu yimuna. Antu adiili, adifukwili kudi akishi awu.

³AIsarela adibombeli naBayali Peyori. Yehova wazuwilina waIsarela.

⁴Yehova wamwilili Mosi, nindi, Kwataku tulamba twawantutwejima, wumukudikiluwu Yehova kumesu etaŋwa, kulonda kuzuwa kwaYehova kunasweji kwakafumi kudi aIsarela.

⁵Mosi wayilili ansompeshi awaIsarela, nindi, Wejima wenu jahenu antu enu anadibombi naBayali Peyori.

⁶Akasumukili mwana kaIsarela wumu hakwinza hakuleta kudi anakwindi mumbanda wakaMidiyani kumesu aMosi, ni kumesu achipompelu chawanyana kaIsarela chejima, chadiŋi nakudilawu kuchisu chetenti dakubulakena.

⁷Fwinehasi, mwana kaEleyazari, Eleyazari mwana kakapristu Aroni, chachimweniyi, wanyamukili mukachi kachipompelu, wasendeliiyoŋa muchikasa chindi,

⁸walondeleli owu iyala wakaIsarela mwitenti, wayitapili mwayedi wawu, niiyala wakaIsarela nimumbanda, mumbanda amutapila mwivumu. Emika ninachu chipúpu hadi anyana kaIsarela.

⁹Afwili nachipúpu ochu makombakaji makumi ayedi nawana.

¹⁰Yehova wahosheli naMosi,

¹¹nindi, Fwinehasi, mwana kaEleyazari, Eleyazari mwana kakapristu Aroni, nafumishi kuzuwa kwami kudi anyana kaIsarela, nanichi chanatiyiyi mukawu wunatiyami mukachi kawu, kulondanibuli kuyinoŋesha anyana kaIsarela zo-o namukawu wami.

¹²Dichikahoshi neyi, Tiya, nukumwinka chitiyaŋenu chami chakuwunda.

¹³Chakekalaŋa chindi nanyanindi akamulondelaŋa, chitiyaŋenu chawupristu wahaya nyaka; nanichi chanamutiyiliyi Nzambi yindi mukawu, hakuyilila anyana kaIsarela chakuyibuta nachu.

¹⁴Owu iyala wakaIsarela ajahiluwu, ajahiluwu namumbanda wakaMidiyani, ijina dindi Zimiri, mwana kaSalu, kalamba kakwivumu dawankakululaja waSimeyona.

¹⁵Mumbanda wakaMidiyani ajahiluwu ijina dindiKozibi, mwana kaZuri. Yena wadiŋi mwanta wawantu akwivumu dawankakulula jawu muMidiyani.

¹⁶Yehova wahosheli naMosi,

¹⁷nindi, Yikabishi aMidiyani, wuyitapi.

¹⁸Muloŋa wena ayikabishili nakudimbana kwawu kwayidimbiluwu nansaŋu yaPeyori, ninansaŋu yaKozibi, mwana kakalamba kawaMidiyani, yowumuhelawu atapiluwu mwifuku dachipúpu chahansaŋu yaPeyori.