Read MUKANDA WANZAMBI Numere 4 Bible Online

Numere 4 - MUKANDA WANZAMBI bible

Numere 4

²nindi, Chindenu anyana kaKohati amayala, muyambuli hadi anyana kaLevi mwahita yisakayawu, mwahita mavumu awankakulula jawu.

³Kutachikila hadi anyakamakumi asatu anamutuukishi kudi anyaka makumi atanu ayaŋa kunjita ejima, kulonda akakalakalaŋa mudimu wamwitenti dakubulakena.

⁴Tiyenumudimu wawanyana kaKohati wamwitenti dakubulakena wayuma yaswejakujila.

⁵Chakelaŋa chilombu hichikunyamuka, aAroni nawanyanindiakeŋilaŋa, akakululaŋa ihina dakujika nachu, akabutaŋa nachu chimbaŋu chawunsahu;

⁶hiyakashaŋahu chifwiku chayitembi yamayobu, hiyakaalaŋahu ihina dawuzeeli hohu dejima, hiyakaloŋaloŋamu nyikambu yachu.

⁷Hamesa yamankendi yakutentekaŋa kumesu aNzambi akaalaŋahu ihina dawuzeeli, hiyakashaŋahu niyeŋa, nitutuwa, nimbashila, nimpasa jakuhuŋujolaŋa nachu; hakekalaŋa nimankendi amafuku ejima;

⁸akaalaŋahu ihina dichinana nge, akabutapahu chifwiku chayitembi yamayobu, hiyakaŋaloŋamu nyikambu yayu.

⁹Akanonaŋa ihina dawuzeeli, akabutaŋa inoŋu dakutoŋekaŋa nachu, nimanoŋu adu ninzamba jadu, nituyeŋa twadu twakujimaŋa nachu, niyipunda yadu yamanji yejima yakalakalaŋawu nachumudimu wadu;

¹⁰akadishapa niyuma yadu yejima muchifwiku chayitembi yamayobu, akadishapa hamukambu.

¹¹Hakameŋa kawuru akaalaŋahu ihina dawuzeeli, akabutaŋahu chifwiku chayitembi yamayobu akakaloŋaŋa nyikambu yaku,

¹²akanonaŋa yuma yamudimu yejima yakalakalaŋawu nachu mumalala, akayishaŋa mwihina dawuzeeli, akayibutaŋa nachifwiku chayitembi yamayobu, akayishapa hamukambu.

¹³Akafumishaŋa mawutiku kameŋa, akaalaŋahu ihina dawusombu;

¹⁴akashapahu yuma yaku yejima yakalakalaŋawu nachu mudimu waku, niyifoyu yaku yakesi, nitutuwatwaku twanyisomu, ni mafwosholu aku, niyeŋa yaku, yoyuma yakukameŋa yejima; akaalaŋahu chifwiku chayitembi yamayobu, akakaloŋaŋa nyikambuyaku.

¹⁵Chakela aAroni nawanyanindi anakumishi dehi kubutabuta malala niyuma yamalala yejima, hakelaŋa chilombu hichikunyamuka, dihu hakenzaŋawu anyana kaKohati nakudisenda, bayi akakwata kuyumayajilaku, akenda kafwa. Yumiyi yamwitenti dakubulakena diyi yakasendaŋawu anyana kaKohati.

¹⁶Mudimu wakatalaŋayi Eleyazari mwana kakapristu Aroni wowuwamanji enoŋu, niwainsensi yevumba dadiwahi, niwamulambu wawuŋawahefuku hefuku, niwamanji akuwayisha nachu, akatalaŋa mudimu watabanaka yejima niyuma yekalamu yejima, wowu malala niyumayawu.

¹⁷Yehova wahosheli naMosi naAroni,

¹⁸nindi, Bayi mwakafumisha muchidi wayisaka yawaKohati mukachi kawaLevuku;

¹⁹tiyenu chimwakayilaŋa hakakundamaŋawu kwakwihi nayuma yasweja kujila, kulonda akahandi akabuli kufwa; aAroni nawanyanindi akeŋilaŋa nakuyilejaleja, mukwamudimu amuleja mudimu windi, mukwachiteli amuleja chiteli chindi;

²⁰aKohati bayi akeŋilaŋa nakumona yuma yajilaltu hela kukewukilaku disu, akenda kafwa.

²¹Yehova wahosheli naMosi,

²²nindi, Chindaku nawa nianyana kaGereshoni amayala, mwahita mavumu awankakulula jawu, mwahita yisaka yawu;

²³wakayichindi akwimanaŋa kumudimu ejima, kutachikila hadi anyakamakumi asatu anamutuukishi kudi anyaka makumi atanu, kulonda akelaŋamudimu wamwitenti dakubulakena.

²⁴Mudimu wayisaka yawaGereshoni wowakukalakalaŋa niwakusendaŋa yiteli;

²⁵akasendaŋa mahina atabanaka, niitenti dakubulakena, nichifwiku chadu, nichifwiku chayitembi yamayobu chekala hewulu, niihina dakujikaŋa muchisu chetenti dakubulakena;

²⁶nimahina akukudikaŋa kuchipaŋu, niihina dakujikaŋa kuchisu chachipaŋu chanyeŋumuka tabanaka, nikameŋa, ninyonji yawu, niyuma yamudimu wawu yejima, muwililu wayumiyi yejima, wena diwu akakoŋaŋamu.

²⁷Mudimu wawanyana kaGereshoni wejima, hela wakusendapa yiteliyawu yejima, hela wakukoŋaŋa nyidimu yawu yejima, akayilejaŋawu kudi aAroni nawanyanindi, diwu mwakakunjika kutala yiteli yawu yejima.

²⁸Weniwu diwu mudimu wayisaka yawanyana kaGereshoni mwitenti dakubulakena, akayitalaŋa kudi Itamari mwana kakapristu Aroni.

²⁹Hakwila anyana kaMerari amayala kayichindi mwahita yisaka yawu, mwahita mavumu awankakulula jawu,

³⁰wakachindi akukwata kumudimu ejima, kutachikila hadi anyaka makumi asatu anamutuukishi kudi anyaka makumi atanu, kulonda akelaŋa mudimu wetenti dakubulakena.

³¹Yiteli yakatalaŋa wuwu mwakakoŋelaŋawu mudimu wawu wejima mwitenti dakubulakena wowamapalanga, nankaŋalu jadu, nayishimi yadu, namayandayu;

³²niyishimi yachipaŋu chanyeŋumukaku, nimayandayu, nimpopu jayu, ninyonjiyayu, niyuma yayu yejima, hamu namudimu wayu wejima, yuma yakatalaŋawu yakasendaŋawu mwakayitenenayu hejina hejina.

³³Weniwudiwu mudimu wayisaka yawawanyana kaMerari, mwahita mudimu wawuwejima mwitenti dakubulakena, watalaŋayi Itamari mwana kakapristu Aroni.

³⁴AMosi naAroni nawatulamba twachipompelu achindili anyana kawaKohati amayala mwahita yisaka yawu, mwahita mavumu awankakulula jawu,

³⁵kutachikiia hadi anyaka makumi asatu anamutuukishi kudi anyakamakumi atanu, wowu akwatili kumudimu wejima wawu, amudimu wamwitenti dakubulakena.

³⁶Achindiluwu mwahita yisaka yawu ashikili mumakombakaji ayedi namakulakaji atanu nayedi namakumi atanu.

³⁷Wenawadiwu achindiluwu hayisaka yawaKohati, wowu akalakelaŋa mwitenti dakubulakena, wowu ejima achindiluwu aMosi naAroni mwomwayilejeleliyi Yehova kukanwa kaMosi.

³⁸Anyana kaGereshoni amayala achindiluwu mwahita yisaka yawu, mwahita mavumu awankakulula jawu,

³⁹kutachikila hadi anyaka makumi asatu anamutuukishi kudi anyaka makumi atanu, wowu akwatili kumudimu wejima wawu, amudimu wamwitenti dakubulakena,

⁴⁰achindiluwu mwahita yisaka yawu, mwahita mavumu awankakulula jawu, ashikili mumakombakaji ayedi, namakulakaji atanu nadimu, namakumi asatu.

⁴¹Wenawadiwu achindiluwu hayisaka yawanyana kaGereshoni, wowu akalakelaŋa mwitenti dakubulakena wejima wawu, wowu achindiluwu aMosi naAroni mwayilejeliyi Yehova.

⁴²Achindiluwu hayisaka yawanyana kaMerari amayala; mwahita yisakayawu, mwahita mavumu awankakulula jawu,

⁴³kutachikila hadi anyakamakumi asatu anamutuukishi kudi anyaka makumi atanu, wowu akwatili kumudi muwejima wawu, amudimu wamwitenti dakubulakena,

⁴⁴achindiluwu mwahita yisaka yawu, ashikili mumakombakaji asatu namakulakaji ayedi.

⁴⁵Wenawa diwu achindiluwu hayisaka yawanyana kaMerari achindiluwu aMosi naAroni mwayilejeleliyi Yehova kukanwa kaMosi.

⁴⁶ALevi achindiluwu ejima, achindiluwu aMosi naAroni nawatulamba twawaIsarela, mwahita yisaka yawu, mwahita mavumu awankakulula jawu,

⁴⁷kutachikila hadi anyaka makumi asatu anamutuukishi kudi anyaka makumi atanu, ejima epililaŋa nakwila mudimu wakukalakalaŋa nimudimu wakusendaŋayiteli mwitenti dakubulakena,

⁴⁸achindiluwu ashikili mumakombakaji atanu nasatu, namakulakaji atanu namakumi atanu nasatu.

⁴⁹Ayichindili kudi Mosi mwomwamulejeliyi Yehova, mwahita nyidimu yawu, mwahita yiteli yawu, wejima wawu; dimu mwayichindililiyi mwomwa mulejelu wuMosi kudi Yehova.